America Sipaite Martial Law atan Inralring -Tun hi Tawngtai Hun Chu a Ni

MIKE PENCE-A TAN I ṬAWNGṬAI ANG U

Dr. PC Biaksiama,

30 Dec 20, Nilaini.

Thuhma: KHAWVEL SUALNA HLIMTHLA America ram leh an buaina khu khawvel hlimthla dik tak a ni. He America suahsualna inlar chhuah dan hian ram tin leh hnam tin te, mimal nun thleng pawhin a entir vek a ni. Hun hnuhnunga sakawlh lo chhuahna HUN THIM (tribulation) erawh chu la thleng êm lovin, ram tina ringtute ṭawngṭaina avang hian Pathian khawngaihna leh chhandamna hun hi pawh seiin a la awm chauh zawk a ni. Tunah pawh hian Setana – Anti-christ lalna ram a inhawng thei reng tawh tih ngaihtuah lem lo, a ṭha lam hawisana Bidena ṭan tlat hi Mizo zingah pawh bengchheng sawt ve tak kan ni. FB leh media danga mahni hming chhâl ngam lo, Daibuaia inti te leh account lem hmanga an chirhthehna lo dawngtu tan phei chuan, an kêl-êk tam ve ta viau emaw tih tur an ni. Hei hian Sakawlh lo chhuah huna a hnung zuia lo pakai ve mai turtr hlimthlâ an lo entir lâwk bawk.

Lawrkhawm: Vawiin chu chhui chianna (news analysis) tel lovin chanchin thar leh thu benglut deuh deuh tawite tea lâwr khawm kan hmatheh phawt dawn a ni:

Donald Trump-a: 2020 a Mi Lâr Bera Puan Politik inchirhthehna dawng hnem bertu a nih mek laiin mipui ngaihdan lakkhawmna - Gallup Poll-ah chuan President Donald Trump-a chu America mipuiten an mi duh leh ngainat ber (most admired man) ah an vawrh chhuak ta luah mai! A vote hmuh zat hi 18% a ni a; a khingpui Biden-a erawh chu a hnuai fe-ah vote 6% a hmu ve chauh a ni. Inthlan campaign laia mipui an in neih tam hleih dan khan thui tak a hril awm e. Trumoa president chhung hian economy ropui ber, sipai chak ber, Middle East-ah remna siamtu thawh hlawk ber, Nobel Peace Prize dawng tura an nominate fo (a committee-ah Leftist liberal politik rilru puten hleih nei taka an hnar thlak leh thin); America mipui maktaduai tam takin President ropui bera an ngaih leh GOP mipuiten an ngainat leh an chhuan em em, President ṭang lai zinga vote hmu hnem ber (74 million); pro-Israel ber, khawvel puma evangelical christianten an ṭan ber a ni. Rassmussen poll-ah phei chuan Republican mipui 72% ten Trump-a hnathawhah an lungawi bawk (FOX news; Dr Steve Turley Talk etc.).

America Sipaite Martial Law atan Inralring Sipaiten Donald Trump-a an support zia leh, sipai lal pension tawh General kai chinte hialin martial law puang tura president an nawr zawk mah thu kan chhuah tawh thin kha. Mahse tute nge tih hriat lohvin, sipai hotu thenkhat atangin martial law sawihnawm lam an awm a; Trump-a politik khelhnaah sipaite kan inrawlh lo vang, tia sipai thuneitute thuchhuah ni awm taka ngaih theih, Democrat-hovin an vawrh darh a awm nual awm e. Mahse USA lama ṭhian ṭhate ka zuk zawhin, chutianga lo sawiseltute chu Obama hun laia dinhmun ṭha a pek ho, deep state hnawmhnawkho, Trump-a dotute mai an nih thu min hrilh a. Mahse heng Obama la ṭantute hi mi tlem zawk an ni a; Trumpa’n general engemaw zat dinhmun pawimawha a dah te, Army, Air Force leh Navy zinga sipai lal ber bera a dahte leh an hnuaia mite hian Trump-a ṭantu deuh vek an nih thu te min hrilh a. Tunah pawh hian a rûkin America khawchhak leh khawthlang lama sipai hmunpuiah 82nd Airborne Paratroopers te, Marines te, Navy etc. te chu martial law emaw, Insurrection Act emaw puan a nih veleha che chhuak nghal vat thei turin an inralring reng tawh a ni.

Mike Pence-an President Tur a Ruat Dawn? America mipuiin nghakhlel taka an thlir ṭhup mai chu eng dang ni lovin, kumthar January ni 6 ah Mike Pence-an Biden-a nge Trump-a zawk president-ah a puan dawn, tih hi a ni. Hemi nia thil thlen dan tur hi sawi theih chin chu awm bawk mahse, a taka thil thlen dan tur chungchangah inhnialna a tam nuk nuk hle mai. A thu hmasa lam ‘background’ chu kan sawi zin tawh avangin chipchiarin kan sawi tawh lovang. US Constitution dan hre mite pawh an awmna party-in a kaihhruai avangin, an ngaihdan a inhmu hlawm lo.

He parliament inkhawmpui joint session – Senate leh House of Representatives inhmukhawm Congress lo awm tur hmaah hian Mike Pence-a chu Presiding Officer a ni dawn a; state tin atanga electoral college thlan chhuah memberte list a lo hawng ang a. Buaina awm lo state atanga elector tlingte chu dan angin a lo pawm mai ang a; mahse state buai 6 atanga Democrat leh Republican list chi hnihte chu pakhat pawmin pakhat a hnawl dawn nge, inthlana vote tihchingpen a nih avangin a pahnihin a hnawl ve ve dawn? Engchen nge thuneihna a neih? America Constitution pawhin sawi chian loh avangin inhnialna a thlen ta hle mai.

Electoral Count Act of 1887 danin heng result-te hi Congress memberten pawm lovin, objection an lo siam thei. Chutianga objection siamtu turte pawh GOP lam chuan a ṭul zat aia tam an inruat tawh hlawm bawk a; Democrat lam chuan Bidena a tling reng tawh alawm, tiin an ṭang tlat ang a, a tawpah chuan Congress-a member ngah zawk Democrat-in vote hmangin Bidena chak zawkah an nemnghet dawn a ni. (Hei hi min hnialtu Daibuaia inti ṭanhmun a ni a). Mahse he dan hi dan dik lo (unconstitutional) a ni, an ti tlat mai; Congress in elector duh zawk leh duh loh zawk thlan theihna a nei lo; state governor-te hnenah thuneihna pek theihna power a nei lo, constitution a kalh, tiin hman mai chu a remchang ber lo a ni awm e. Chuvangin, tun dinhmuna Mike Pence-a hmalak dan tur chiang sa zawka lang (1887 hma zawng, kum za dawn lai an lo hman tawh zawk) hi i lo thlir nawn leh teh ang.

12th Amendment of the Constitution, 1804 Senate leh House hmaah Vice President Mike Pence-a, Presiding Officer chuan elector-ho certificate leh vote te chu a chhiar vek ang. Mahse state inthlanna buai leh nasa taka vote tihchingpenna state 6 atanga Bidena tana electoral vote lo lutte chu, dik lo tih hre reng chungin a pawm theih a rinawm loh va; lehlamah Trump-a vote hmuh dik tak, engzat chiahin nge Bidena aia vote a hmuh san zawk, tih hi a ka hriat loh, Democrat-hovin a vote hmuh sa an lo thupte chu ni tinin chhuituten an hmuh belh zel a, a zat hriat theih a la ni lo. Chuvangin a result awm ang ang hian pawm theih loh ve ve a la ni a, dik taka vote hmu tam zawk sawi theih a la ni lo. Democrat lamin an duhthusama Bidens vote 306 hmu anga an dah ve ngawt hi dik anga nemngheh tawh ni se, boruak a inthlak danglam vek tawh ang chu. Trumpa pawlte chuan, "He inthlanna dik lo hi zawh a la ni lo, kan la fight zel dawn," tiin America ram dung leh vangah khuan protest movement an la kalpui mep mep reng a, "THUDIK hailan a nih hma chuan a tawp thlengin kan kal zel dawn," an la ti dup dup mai a ni. Chuvangin, tlâwm mai an la tum awzawng lova, indona a la kal reng a. Vote rûk khawm hmanga tlinga inngai Bidena lam hian lemchan lem lem bak hmasawn thei lovin, an sûkna ngaiah an la su ve mai mai a ni.

Congtingent Election. President Candidate-te hian tlin ngai zat vote 270 hmu tling lo ve ve ta se, 12th Amendment sawi angin Congress-in president chu an thlang dawn a ni. Helai thu hi kan chhinchhiah theih nan, US Constitution, 12th Amendment sawi dan i lo bih chiang teh ang: “… and if no person have such majority…the House of Representatives shall choose immediately, by ballot, the President. But in choosing the President, the votes shall be taken by states, the representation from each state having one vote…” A awmzia chu: a tu amah chak zawk bik awm ta lo se…House of Representative-ten ballot hmangin President chu an thlang ang. Amaherawhchu, President thlang tur hian, state lam atangin vote hi lak tur a ni a, state tin aiawhin vote khat ṭheuh thlak tur a ni. (See Twelfth Amendment to the United States Constitution, Wikipedia, the free encyclopedia).

Tun dinhmunah Trump-a leh Bidena te hian state 6 te atanga vote hmu lo chuan vote 270 an tlin lo ve ve a. House in president tur an thlang dawn ta a; state pakhatah vote khat zel. Heti a nih chuan state control hnem zawk zawk chuan president atana an candidate chu an thlang tling dawn a ni. Democrat-in state 20 chauh an control mek laiin, Republican lamin state 30 lai an control a; Donald Trump-a an thlang dawn tihna a ni. Vice President erawh chu Senate thlan tur a ni ang a, tunah hian Republican lam majority an nih avangin Mike Pence-a an thlang dawn tihna a kawk bawk.

Vote hmu tam zawk zawk Constitution hrilhfiah dan dang lehah chuan, President leh Vice President turten vote 270 phak lo ve ve mahse, state buai 6 tel lovin Republican lamin 232 an hmuh avangin Democrat hmuh 227 aiin an hmu sang zawk a. Chuvangin awlsam takin Trump-a leh Mike-a te hi an tling nghal thei mai bawk.

MIKE PENCE-A KUTAH MAWHPHURHNA SANG Hetianga US Constitution meuh pawh inhnial theiha a chian raih bik loh avang leh, ngaihdan chi hrang awm thei leh thu inchuha inhnial vak theih a nih avang hian January 6-ah pawh thil awm dan tur a chian mai loh avang te, sawi hova sawi fel rual a nih bawk si loh avangin he Joint Congress Session kaihruaitu ber, Senate President ni bawk, Mike Pence-a hian tuma chuh buai loh thuneihna constitution-in a pek chu a lekkawh mai a ngai dawn ta a ni. Tun hma, 1800 vel khan Jefferson-a pawhin chutiang thuneihna hmang chuan president-ah a lo in vote tling tawh a nih kha.

Mike-a kuta thuneihna leh mawhphurhna sanzia chu sawiin a siak lo zawk ang. Sum vang emaw, eptu lamin an vauzâm vang emaw-in Biden-a tlinna turin thutlukna a siam vaih chuan, America ram chanchina an party leh mipui te, kristianna te, ama ram leh hnam phatsantu turû burû ber (greatest traitor) a ni nghal ang a; politik field-a mahni intihlum (suicide) ang lek niin, miten enga tan mah ti tawh lovin, a hmingchhe hlen tawh ang.

Amaherawhchu, Mike Pence-a hi Republican hruaitu corrupt pui pui, entirnan, Mitch McConnell-a, a nupui Chinese a nih avanga Communist China nena a rûka inthlunzawm reng a, mahni pawl phatsana, mi corrupt ber Joe Bidena te ang lo tlawn lungawi tumtu a ni ve lo. A mizia leh a tunhma nun (track record) aṭang pawhin mi dik, mi piangthar, Pathian ring tlat mi, a pu Trumpuia thlâwp tlattu leh an inkâr boruak ṭha em em a ni. Trump-a tan chauh a ni lo, anah pawh Vice President a nih zek theihna tur leh, 2024 inthlan lehah phei chuan US Presidential candidate atan a in fit zak mai dawn a ni. Chuvangin eng anga vauna leh thlêmna lian tham ber pawh do tlang ngam a, he inthlanna dik lo taka a tling zawk tling lo, a tling lo zawk tling anga tihluihnaa an pawngsualna hi dodal a, ram Danpuiin mawhphurhna leh thuneihna sang ber a pek ang taka, a sawhkhâwk leh a hnu leh tur zawng zawng pawh Pathian kuta nghat ngama, thudik chu din chanpui tlata, Donald Trump-a hi President atana dik taka tling zawk a nihna anga a puan ngam erawh chuan, an ram leh hnam leh mipuite hmangaihtu, Kristianna leh America Democracy humhimtu, khawvel puma sakhaw zalenna te, Communist laka mahni ram humhimtu, Pathian fa dik tak a ni ang a; lei chungah hian ani tluka chawimawi tlak an awm chuang lo vang.

Tun hi Tawngtai Hun Chu a Ni Rinna nei lo mite an beidawna, an zâm chhiata, setana buma an tlûk dêr lai hian, kan tan khua a la tlai lo ve Chu kawng dik tak chu Mike Pence-a hian a zawh tlang theihna tur te, thlêmna te do zo tura chakna te, eptuho laka sawichhiatna tinreng te phur zo tura huaisenna te, finna leh hriatthiamna te a lo neih theih nan – kohhran te, mimal tinten ṭhahnemngai takin Mike Pence-a hi duhsaknain malsawm ṭheuh ila, i ṭawngṭaipui ang u aw.

Thubelh: Beidawng tura thuchah He thu hi ka ziak zo hlawt a, ka post chhuah hmain USA atanga pastor pakhat, Trump-a thlawptu leh conservative tak anga insawi, mahse Trump-a tan beiseina awm tawh lo, a hmalakna tur zawng zawng pawh sawi tâwp veka, a hnuk la chat lo chauh anga sawi a, mi rilru tichi-ai tur zawng leh, Joe Bidena tling ngei tur tih chiang sa anga thu rawn chhuahtu thu chhiar chu ka lo ngaithla a. Chhan lêt kher chu a ṭul lem lovah ka ngai a, a hming tihlan pawh a ṭul lova. Amaherawhchu, he thlarau indonaah hian mi beidawng aw leh sualin a vauzâm âw te kan hre fo dawn. An beidawnna ngawi renga Pathian hnena thlen mai duhtawk lova, mi dangte pawh beidawnna ruama hnûk lut tura ṭhahnem lo ngai em em te kan awm a; mi beidawngte tan Lalpaah beiseina nei leh tura kan beih lai leh, January ni 6 a kan ringtu-pui Mike-a tana ṭawngṭai tura kan insawm mek laiin, mi rilru tihnuala, an ṭawngṭaina nun tichhe zawnga lo inhmanhlelte kan awm a. Hetiang aw danglam hi kan la hre zeuh zeuh dawn. Inralrinna dâr a ni zawk ngai e. Hmelhriat lohte report hrang hrang aiin, Lalpaah chauh rinna i nghat ang u.