VP MIKE PENCE-A KUTAH U.S. PRESIDENT INTHLANNA TAK TAK
Inthlanna dik Humhimtu a ni hial ang – Pathian tanpuinain.

Dr. PC Biaksiama,
28 Dec 2020, Thawhtanni.
tawngtaisak an ngai

6 JANUARY 2021 Eden bawhchhiat hnua inthlan tawh azawnga buai leh buarchuar ber, dawtthu lêng vak tipunluntu ber, corruption turu ber, khawvel nghawng nasa ber – ringtu ṭawngtai mite Lalpa min auhtir tamtu ber – US President atan Donald Trump-a nge Joe Biden-a? tih chu kumthar January 6 khian America rorel khawlpui bunna Capitol Hill, Washington DC-ah Senate leh House infinkhawm CONGRESS hmaah rel fel tura dah a ni a. Hetah hian America mipui chang ni lo, khawvel pumpui mit a fu ṭhup mai a; eng thil tak lo thleng dawn chu ni maw? tiin keini ram kilkhawra awm Zofate zingah pawh mutmu tuah thei lo kan tam mai! He rorel inkhawm kaihruaitu tur leh thuneitu ber tur chu Vice President Mike Pence-a a ni. Ani kutah hian America president tur tu nge tih a awm tlat zu nia!

Fair Taka Thudik Inchuhna. He thu pawimawh ziak tur hian ka in duhthawh khawp mai. Mahse thil dang ngaihtuah hman lo khawpa inthlan thubuai ringawta thla hnih thum vel lai kan inhman lai mekin, lehlamah thu dik lo hmanga mipuite dawtthu fahtu anga min puhtute hi tute nge an nih ka hre lo; ka tih dik lohna laite chu documentary evidence nen min rawn hrilh thei se ka lawm zawk tur a ni a. Mahni hming dik tilang ngam lova, hmaithinghâwng vuah chunga mi dangte sawi chhiat hi Bidena mizia nen a inhmeh tawk hle a; chutih karah chuan mipuite lo hriat tur thu chhuahtute hian mawhphurhna sang tak kan nei tih inhriain, thu lakna hnar (source) dik taka kan innghah a pawimawh zia tarlan ka duh a. Bidena ṭantute pawhin an pu nihna zawng zawng zahpui lovin, tute emaw chirhtheh kher lovin, ṭha takin lo ṭan ve mai sela. Debate a ngai a nih pawhin thianghlim taka thudik dap chhuah tuma tih theih reng a ni, thiltih chak awm tak pawh a ni e.

Thu ka ziah ve tak fo avangin US Constitution Danpui chanchin pawh mithiamte atangin ka zir phah ve a; tun dinhmuna president thlan dan (12th Amendment of the Constitution) phei chu constitutional expert-te ziah hrang hrang ka chhiar bel hluau mai. USA a awm kan Mizo tam fe zawk khuan kan thuziahte an lo pawmpui ve a kan lawm em em laiin, Bidena lamṭang ṭhenkhatte erawh chuan thudik hre pha lo ni awm takin min rawn dah hniam viau thin a; mahse ka thuhnarte chu America mithiamte ziah, ni tin zan tina ngaihthlak leh chhiar theih tura media hrang hranga an upload thar (1 hr ago, 2 hr ago, 1 day ago etc) te, mahnia computer google, twitter, internet, whatsapps etc. aṭang te, ka hmuh phak loh thlengin USA a awm thian ṭha leh duhsaktuten min rawn thawn chho reng a; chubakah Mizoram chhunga min duhsaktute atangin news channel hrang hrang atanga an thu dawn bengvarthlak tak tak min rawn supply reng bawk a; ka lo khâwr pum sêng lo zawk a ni. Tisual palh thei kan nih avang erawh chuan a dik zawk hriaten evidence nena inhrilhfiah a duhawm ngawt ang. Keini aia thudik zawk hria anga inngaia, min sawiseltute hian an thuhnar behchhante nen, huaisen takin anmahni hming dik tak tarlang ngamin, mipui hmaah hian rawn inpho chhuak ve se a duhawm khawp ang. Chuti a nih loh chuan Bidena pawh lalthutthlengah a cabinet-ho nen an thuttirna a rei tawh mai a; a takah erawh chuan beiseina nei mang lovin January ni 6 khi an nghak ve rên râwn chu a ni lek si a!

MIKE PENCE-A LEH CONGRESS Ted Noela’n “American Thinker” tih chanchinbua a ziah (Dec. 26) danin, Jan. 6 a Congress (parliament) joint session-ah Senate President a nihna angin Vice President Mike Pence-a chuan a kaihruai ang a. Tuma hnial phak loh thuneihna pumhlum a nei ang (His power will be plenary and unappealable), a ti tawp mai. Senate president a nih ang takin ṭha a tih chu a pawm hmiah thei a, ṭha lo a tih chu a hnawl hmiah thei, tuman a thuneihna an challenge thei lo. A mawhphurhna a sân em emna chhan chu: USA Constitution humhalha vawnghim tur leh, dan te chu ṭha taka zawm a ni em? tia a office thutiam (oath of office) hlen chhuah chu a thupui ber a ni. Hei hi hna ropui leh mawhphurhna sang tak a ni. Pence-a hian duh thlan tur pahnih a nei: constitution dan humhalh tlata Trump-a tan Constitution dan anga president a nihna tur kawng hawnsak emaw, state buarchuarten elector result an lo certify tawhte dân lo ang taka pawmsak mai a, Bidena tlintir emaw a ni.

Hun pangngaiah chuan Vice President te hi an pawimawh vak lo. Tun 2020 inthlan dinhmunah erawh chuan Vice president chu mi pawimawh ber leh thunei ber a ni tlat mai. Ivan Raiklin-a, danhremi (constitutional lawyer) chuan, ‘Mike Pence-a hi chiang taka inbumna hmanga inthlanna paihthla thei turin Constitution-in thuneihna a pe a ni,” a ti a ni. (‘Constitution grants Mike Pence the power to overturn a manifestly fraudulent election,’ in “Mike Pence is being held out as potential savior of a fair election, by Andrea Wilburg,” American Thinker, Dec. 24, 2020, https://www.americanthinker.com/blog/2020/12/mike_pence_is_being_held_out_as_the_potential_savior_of_a_fair_election.html)

PARALLEL LIST Tunah hian State buai 6 (Arizona, Georgia, Michigan, Nevada, Pensylvania leh Wisconsin) ten elector list chi hnih (duelling slates an tih), Bidena list leh Trump-a list an tih chu Congress-ah hian envelop-ah châr thlapin an theh lut ve ve tawh a. Bidena lam chuan vote 306 hmua tling tawhin an inngai hmak a. Trump-a pawlten vote 305 hmuin state legislature thuneihna nen ngei an lo thehlut ve bawk a; hnial buai ngai lova an vote hmuh chu Trumpan 232 leh Bidenan 227 te kha a ni. Tling tura vote hmuh ngai zat 270 chu geng state buai 6 te tel lo chuan an tlin lo ve ve a, an inchuh buai ta a ni. Pence-a chuan engtin nge heng parallel list-te hi a lo tih dawn?

Biden-a lam chuan heng state 6 te hian an state-a thuneitu sang ber state legislature te thuneihna leh election dan bawhchhiain, vote tichingpenin an inthlang a, chuvangin inthlang anga ngaih theih a ni lo, election a ni lo (any process that does not follow is not an election), tih a ni tawp mai. Chuvangin Mike Pence-a chuan Vice President a nihna te, Senate president a nihna te, heng inthlana Presiding Officer leh thuneihna tawpkhawk (final authority) neitu a nihna angin, tuma lo hnial thlak rual loh thuneihna chu hmangin, heng states-te hian president an lo thlang tawp lo a ni,’ tiin he US President inthlanna hi dan (Article II, Section 1) tlawhchhanin heng state parukte hian dan angin president thlanna an lo nei reng reng lo, chuvangin Donald Trump-a leh Joe Biden-a te hian vote an hmu thei lo ve ve, tiin thutlukna a siam tawp mai dawn a ni. Chu veleh Senate leh House memberte chu thinrimin an au nuaih nuaih ang a, anchhia an lawh bawrh bawrh ang a; Ted Noela ṭawngkam takin, “Ṭah leh hathialna a thleng ang a; mahse tuman a thuneihna an khing thla thei dawn lo a ni,” a ti.

Heng state 6 ten dan bawhchhe chunga inthlang an tih ve, an buai em emna kha, Dan atang chuan inthlang pawh an lo tling hauh lo va, dik zawka ngaih Trump-a tan pawh vote hmuh theih a ni chuang lo; chuvangin, inthlang anga danin a pawm loh avangin state 6 aṭangin vote 0 an hmu ve ve tihna a ni. Tichuan, heng state 6 tel lova Trump-a vote hmuh zat kha 232 a ni a; Biden-a khan 227 a hmu a. Tichuan, “…vote te chu an chhiar ang a…President atana vote hmu tam zawk chu, President tur a ni,” (“The votes shall then be counted…The person having the greatest number of votes for President, shall be the president”) tiin US Constitution, 12th Amendment chuan tun hun atana hman turin kum 200 kal tawh aṭang khan a lo dah khiau mai!

Tichuan, inthlan dan mumala inthlanna chinah vote tam zawk a hmuh tlat avangin Donald Trump-a chu thlan tlin leh a ni dawn ta a ni. Chuvangin, a hmaa issue vawi 4 vela ka lo sawi nawn tawh thin anga state tina aiawh pakhat inthlang chhuaka president thlang tura “Congtingent Election” kha chu thlen pawh a ngai lo niin he mithiam Noel’a hi chuan a sawi (contingent election pawh thlen ngai ni se state hrang hrang control hnem zawktu Trumpa bawk tling tur a ni tho va). Tichuan, Congress tel ve ngai hiala House of Representative te inrawlh buai ngai lovin a chin fel theih dawn ta bawk a ni (Ted Noel, "It’s for Mike Pence to Judge whether a Presidential Election was Held at All," American Thinker, Dec. 26, 2020, https://www.americanthinker.com/articles/ 2020/12/its_for_mike_pence_to_judge_whether_a_presidential_election_was_held_at_all.html

TRUMP-A LEH PENCE-A TE TAN CHONA HAUTAK 1960 kum khan Richard Nixon-a khan tun ang dinhmun hi a lo hmachhawn tawh a; mahse ani kha chuan khati zawnga hnehna chan kha chuan duh ang thâlin ro rêl thei dawnin a inngai lo va, a râl bânsan ta kha a ni a. Chuti zawnga ngaihtuah chuan, tun ang America ram buai enkawl hi a hautak fe zawk ang a, Democrat-ho chet duh dan leh an rilru chhiat dan han thlir phei chuan, Nixon-a ang maia mawhphurhna tlansan mai a thlanawm thei awm e.

Mahse Trump-a leh Mike Pence-a te ang mi tumruh leh huaisen, America ram hmangaihtu leh eng pawh huama an ram tluchhe tur tung dinga, kristianna leh mimal tin tana zalenna vawng him tura an inpekna a thûk êm avangin, heng harsatna leh an hmelmate tihṭhaihna hmanga vauzám mai mai rual an ni lo. Trump-a ai mahin Pence-a hi rinna kawngah a nghet zawk ang e, tih hial tlak a ni. Creationist a ni lehnghal! Ani tluka President thlâwptu ṭha hi an awm thei chuang lo vang. Chuvangin, he America ram chhung buaina leh challenge turu buru tak mai hi an tlan chhiatsan lo tawp ang a; term hmasa aiin an term hnuhnungah hian hna ropui zawk, MAKE AMERICA GREAT AGAIN tia mipuite hnena an thutiam hlen chhuak turin thih thâin an bei sauh sauh zawk dawn a ni.

MIKE PENCE-A TANA TAWNGTAISAKNA Mi tam tak chuan America-ho chungah rinna neih har kan ti tawh awm e. Pence-a ngei pawh hi sum lian thamin an lo tham lungawi ve mai lo’ng maw? tiin thla a muang raih lo mai thei. An hriatthiam pui awm khawp mai. Tuk ina Laipui Tlang chhuah lama awm Upa senior nena kan inbiak pawhin, “Laipui Tlang tia zet mai US dollar-in an lo tham mai lo’ng maw?” te ka tifiam a. Mahse Mike Pence-a te lehzel suma lei theih an nih ngai chuan America ram pum khu an chhe pherh zo vek tihna a ni ang a, Trump-a tan pawh tihngaihna a awm chuang lovang. Mahse chhan tlâk awm lo khawpa chhia an la ni lo. Democrat leh Republican mi ṭha lo ho chanchin kan hriat tam vang mai a ni. An kohhran hruaite leh an pastor tam takte khu an la ṭang nasa, an la ṭawngtai reng. Pathian tan chuan tlai lua a awm lo. Lei mihring zawng zawng an chhiat zawh vek lai pawh khan Pathianin ama tan Nova mi fel a dah a nih kha. Elija mangangin amah chauh chu zawlnei awmchhun, tihhlum an tum mek lehnghal anga a insawi khan Pathian chuan, “Baal hmaa ṭhingṭhi ngai lo mi 7000 ama tan a zuah thu”-in a chhang a nih kha (Rom 11:4). Chuvangin, Mike Pence-a hian America ram leh kristianna tichhe vek tura Baal milem pathian betute sum hmanga tihtlûk a nih ve loh nan te, ama nunna misual laka humhim a nih theih nan te, thahnemngai takin tun atang hian i ṭawngtaipui ang u, tihtak zetin aw.

Pence-a Tan Sawichhiatna a Inhawng Heti taka Mike Pence-a dinhmun a pawimawh tak em avang hian amah tihchhiat tuma beihna hi a hluar leh chiam mai dawnin a rin theih. Sum tam taka an thlêm lungawi theih chuan Trumpa bawkin sawichhiatna lukhum a khum leh bawk ang a. An tham lungawi theih loh erawh chuan tun thlenga kan la hriat loh, Trumpa leh Pence-a inkar chhe ta viau ang te, dan bawhchhe tur ang te, a kristian thurin avang te, an chhungkaw thil leh party thil velah Democrat mi suaksualte chuan an channel ber, CNN te, BBC, Alzajeera, NYTimes etc leh an thunun theih ram danga TV channel hrang hrangah a lo lang leh chuai chuai mai ang. Tak tak emaw ti lo turin, chutiang Dawtpa bumna laka lo inveng turin kan inchah lawk a, kan hnen aṭanga chanchin lo ngaihventute phei chu media hmanga inbumna laka lo inveng fimkhur turin kan inchah lawk a ni.

Post a Comment

Powered by Blogger.