LUAH LOH RUN SEP RAWTUI
(Phuahtu - Zirsângzêla Hnamte (Fam)
- Nunmawia Fânai
29/Pâwltlâk thla/2020
Hmanni chu ka puin, "Thu ziak lamah i rilru i pe na deuh ta nge ni, hla leh a rua lamah hian i dilchhût ta rêng rêng lo mai! He lam hi ngaihthah phah reng reng suh," tiin min zilh deuh zauh a. Chumi pah chuan, kan hla siam 'Ṭhian ngaihawm' tih hla, kan ṭhianpa min boralsan ta ngaihna hla kaih pharh chu a rual nuap nuap a. Ka han bih deuh thuak hnu chuan, "He hla hi engtik kuma kan siam kha nge kha?" tiin ka'n zâwt hê hâw a. Ani chuan, "Khai aw! I lo hlamchhiah hlen deuh tak tak tawh a nih hi! Hei hi chu 2003 kuma mi, 'A thlâwn mai maw!' tih hla i phuah nena inrual deuh thawa kan siam kha maw le!" tiin kan siam hun ka theihnghilh daih chu mak ti hmel deuha min melh pah hian min hrilh a. Khami ṭum kha ka pu laka ka zah leh inthlahrun ṭum ber a ni hial âwm e.
Tichuan, 'Ṭhian ngaihawm' tih hla kan han ennawn dûn chu,
"Chhûnni liamin tlaikhua a lo ngui,
In sumtual rûnah kan lo kai a;
Sakhmêl tawn tûr rêng awm lo lung lam vaiin,
Awmhar ṭhuva iang dung kan thûl e,"
tih leh,
"Zârva ianga hlim lai ni kha,
Dâwn kirin ngaih lai a zual chuang e;
Kan sûl i hnu lei hmun khawhar reh hi,
Ngai chung zêlin fang zêl ta'ng e,"
tih lai châng kan bih lai chuan lunglênna chuan min rawn zêm veng veng a. Kan hla bih lai chuan min vêl titih ta reng mai!
Chutih lai tak chuan, kawmthlang lamah hian Fam Zirsângzêla Hnamte, ama zai ngei maiin 'Luah loh rûn' a sak chu an lo play veng veng mai bawk a. Fam ngaih lunglên kârah hla thawnthu ṭha leh ril em em maiin min zem lunglêng kawp chiah mai zawng, khawvel hi lunglênna boruak lêng vêlin a tuam khah mup ni mai âwm hian, mitin a thlir chin apiang mai chu mahni inchanin ka hmu khawhar ngawih ngawih ta vek a. Engkim lang thei mawina chu khawharna mit aṭanga a mawi dân a danglam ngei mai! Chutah, kan hla bih lai chu dah ṭhain, Pu Zirsângzêla lunglênna chu ṭâwmpui ka duh ta hlauh zâwk a. A chhan pawh, fam ngaih lunglên chuan ipikna a ken tel deuh tlat ṭhin avangin, chu lam chu tlânchhiatsan daih rih ka duh vâng a ni pakhat bawk. Tichuan, 'luah loh rûn' hla chu ngaithlain, earphone vuahin ka maimitchhîng ta vang vang a. Ka pu erawhin a hla thar a ziak mawlh mawlh thung.
Chutah le,
"A khi chhak zo bawm romei zing riai,
Zo khaw sâng lêntu châwi vêlah khian;
Ṭhiah loh bûkthlâm iang a ding liai e,
Chhâwlthing hnah nêmte'n bâwm chi chiaiin,"
tih ka ngaihthlâk lai chuan, hmun zo lam bâwmtu chhûm a chhah ṭhin bîkzia te chu ka han mitthla reuh reuh a. Chutiang a nih avang chuan romei pawh zâm chhah deuh bîk tûra mitthlain, romei zâm paw chûkin a zâm hnan chiai mai in ram tawh, ding âwn lii liai chu ka suangtuahna mitthlaah chuan fiah lo riai hian a lo lang a. Thli fimin a chhêm zâwnga dithlifarfêm phe hlep hlepin ri a siam, thâwm nei mang lo kha, hmun reh tak a ni tih lantirtu atana a thâwm a ring riau te chu ka suangtuahna beng chuan a hre phâk vuai vuai a. Luah loh leh enkawl loh in ram tawh na nâ nâ chuan zah hlawh hek lo le, a kiang vêla thing zâr te chuan zâr hnanin, thli thâwt zâwng chuan a chung mawih tawh lam chu an phiat pawr sawk sawk lai pawh ka hmu. Chu mai pawh a la ni lo, hnahbial hrui leh vaihlenhlo te chuan, keuh thlûk tum ni mai âwma a ban an zem phui chual mai lai phei chu ka hmu fiah leh zualin ka hria!
Ka ngaithla zêl a,
"Zankhua a tlaiin lêng zawng te chuan,
Rûn in tap tualah senmei an chhi;
Mahse chu rûn ram thim riaiah chuan,
Naunâwn aw râwl rêng a thang ve lo!"
a rawn tih chhoh lai te chuan, kan pi leh pute huna zân khaw thima mei êng a hlut tûrzia te, in neitute an awm leh awm loh hriatna tûr atana pawimawh ber chu, an kawngka leh bang phui lo lai aṭanga mei êng zung rawn chhuah leh chhuah lohah a innghat tlat a ni tih te chu suangtuah rauh rauhin, chhûng tin mai chuan zân khaw thima an in chhûng dunga an khaw hmuhna ber mei êng chu a mit hlau takin an chhawm nung sauh sauh reng lai te, chu lai kârah naupang hlim nui ri kâra a huaibâk zual ṭap ngâk ngâk nen lam chuan ka suangtuahna mitthlaah chuan a lo lang iar uar a. Mahse, chutiang a nih mêk lai chuan, chu luahtu nei ve lo in ram ding sâwi lai mai aṭang erawhin, mei êng reng reng rawn chhuak ve lo leh, naupang thâwm riva eng mah rawn chhuak ve lo va, en mai pawha khawharna zawng zawng chhûn khâwmna hmun tûr bik atana anchhedawng ni mai âwma mawi, a hlutna ber nia lang pawh zan khaw thim hnuaia thimna tichhah zualtu ni âwm fahrana a ding thim hmuk bîk tlat thung erawh, eng mitthla mahin a melh kân hauh loh tûrin a rawn lang tel lo thei si lo. Chu chuan, khawharna neitu thinlunga khawharna hi ânchhiaah min ngaihtir lek lek thei nia!
Chutianga mitthlain min chiahpiah nuaih a, khawharna leh lunglênnain a vâwrtâwp min thlenpui thei hial dâwna ka ngaih lai chuan,
"Hmanah chuan hlim te'n laichhuata'n maw,
Siali hêl vâla chhâm ang zâl e;
Tual vawk râwl so ri, baw-âr khuang nen,
Chiar nghin nghian rûn kha a chul zo ta!"
a rawn ti chho va, hlui leh hun hmasa lama min han chuan kai chhoh pui ta hlauh chuan ka thaw a tiveng deuh hawk a. Chu ina khawsa ṭhin nula leh tlangvâlte hlim taka an inkâwm lai te, an hlimna pâr âm taka an tlan lai te chuan mitthla hmasa chu rawn hliah khuhin, khawngaihna keng tel khawharna lak aṭang chuan, chumiin a chîm hneh lutuk tawh lohna hmun, hmun sâng lamah ka han chuang kai ta deuh dâwrh a. Chutah, "Tual vawk râwl so ri, baw-âr khuang nen," a rawn tih chhoh lehah chuan, kan mi thiam ṭhenkhatin, "Tual vawk râwl so ri hi vawk chaw chhum so ri sawina a ni e," tia an lo hrilh fiah ve ngawt chuan min tibuai ta! A chhan chu, hetiang khawpa mi ril, Mizo hla ruaah kher chuan ani aia themthiam hi an piang lo ang tih tur khawpa mi thûk leh rem hria hian, vawk chaw chhum so ri mai mai sawina tûr hla rua kher hi chu hrilh fiah chawp ngaia dah lo hian hman tur a hre ṭeuh dâwn tih hi a hla kal hmang aṭang hian ka hre chiang tâwk a. Chumi avang chuan, he laia tual vawk a so riktir duh kher chhan hi chu, vawk chu khaw laiah an tla hûl hûl a, chutiangah chuan a ṭhen an lo innawr ngêk rawng rawngin, thâwm an chhuah âwl lo ve thei tih te ngaihtuahin, chumi a nih avang chuan, 'so sâng' tih ṭawngkam phel leh lam zawka 'so' hi an râwl bengchheng sawina atan a hmang zâwk a ni tih ka hre thiam nghâl a. Tichuan, "Tual vawk râwl so ri, baw-âr khuang nen," a rawn tih tâka chu, vawk innawr ngêk emaw, an chaw ngên emaw avanga an aw râwl an chhuah so sângin ri a siam chhuah lam suangtuahin, chu in leh a vêla vawk ngêk leh ârpa hluisen khuang âl âl te chu ka suangtuahna mitthlaah chuan a lo lang uai uai a, vawk chaw chhum so ri lam chu ka hnâwl chiang ta hle a ni. Mahse, thaw a va han veng rei lo ngai em! Khawharnain kân lam a pan dawn chauh tih laiin, chutianga nula tlangval an thâwm laih laihna ṭhin, vawk chaw ngên leh an tla lai innawr ngêk râwl so ri rawng rawngna hmun te, leh arpa chhiarkhuan a khuan âl âlna hmun ni ṭhin kha, a chul zawh tâk thuin a la rawn tlip leh ta daih si! Chutih lai erawh chuan, khawharna thinlung zângkhai deuh zuai hi, a tlâk hniam leha a mi sawp natzia erawh ka hriat chian phah hlê thung.
A la duh tâwk lo cheu! He lai châng bik hian a lung a tilêng zual nge, kim lo awm a hriat rûk kha kim lo chunga tlânsan a hreh ni dâwn teh rêng ni,
"Sâwn ni awm thei lo rûn in khârtung,
Senmei dawhtling pawh rial ang dai e."
tiin, châng dang zawnga tlar li veka a kalsan kha, he lai chângah erawh tlar hnihin a belh ta daih thung. A belhna thu lah hi invelhna atana ṭawngkam hausa em em mai, an lo rik laih laihna in ni ṭhin kawngkhâr a inhawn ngai tawh miah loh piah lamah, a hausakzia tihlan chian leh zualna atan, tapa mei a mih sawina atana tu mahina an ngaihtuah chhuah thiam ve mai mai loh tûrin, 'senmei dawhtling' a'n daihtir riai vei nen. Lunglên tum miah loh pawhin, he lai tlar hnih lek chauh pawh hi lunglenna ko chhuak atan a tâwk viau a ni.
Ka ngaihthlâk tirh lam kha chuan keima nihna chauhin ka lung a lêng kha a ni a. Mahse, tunah chuan, kan Pu-a hian a duh lam lamah min han kuai her teh se tiin ka nihna ni lovin a phuahtu nihnaah ka chêng daih tawh! Tichuan le,
"Eng vang kher hian maw rûn ram i chan?
Awmlai lian hrângin hêl che'm ni le?
Nge, ṭuan ṭul vanga tlâng dang belh nan,
Chhungkim dâr ang lên i kham zâwk le?"
a rawn ti chho zêl a. Hetah phei chuan, he in ram laka a zawhna, chhan harsa hmêl tak hi a rûka lo chhângin, khawharna vawm khawmna tûr rêng duan a lo nih reng zâwk vânga khuanu rêl a chunga thleng a ni ngei ang, tiin ka lo chhânsak ve ringawt pek a. Dik tak maw?
Chutah,
"Khuai ang rauhsan rûn âw nang ang hian,
Luah loh rûn min chan ka rual duhte'n;
Hlim te'n len laiin kâr lam hlaa'n,
Ṭuan zai an rêl ta, min dâwn lo te'n,"
tih ka han ngaithla thleng chho chiah chu, a ṭhiante nen hlim taka an awm ho lai a, khawharna zawng zawng vawm khawmna hmun ni mai âwma mawi bik, kha luah loh in ram khawhar hmel taka ding lai mai anga khawharnain a chên chilh ni tur a, a ṭhiante hovin an lo liamsan diak mai thu a han chham chhuak chiah mai zawng, kan rual phak leh ban phâka awm ni hlawm sela chuan, a ṭhiante hi ka velhsak duh hial mai awm e!
Aw le, he hla, tehkhinna hla hausa leh hlu em em mai, a aia khawharna thinlung sawi fiahna atana tlâk awm bik lo tûr khawpa hla ropui phuahtu, Pu Zirsângzêla hi zawngin, lunglênna leh khawharna hi ṭhianah min siamsak kumkhua dâwn a nih hi! Mizo piang tawh zinga ka ban phâk leh hmuh phâk hla rua chheh hausakna ka hmuh tawhah chuan, ani aia ropui leh chungnung hi an la piang lo va, an piang leh tawh ngaiin ka ring lo.
I sakruang pialleiah vai thâm tawh mah se,
A ral tawh lo'ng e, i sûlhnu thinlaiah!
A ṭha hle mai.
ReplyDelete