USA-AH “FIAHNA NI ROPUI – 6 JANUARY 2021”
Mike Pence-a’n a pu Trumpuia a phatsan an ti elo?

Dr. PC Biaksiama,
3 Jan 21, Sunday.
Fiahna ropui

THUHMA Tun tuma US President inthlanna (3 Nov 20) thil fel lo zet chuan khawvel huapin nghawng a nei thui dawn ngei mai. 2020 kum bul lam atangin China hripuiin khawvel pum min han ṭingmit ṭhup mai phawt a; kum tawpa America inthlanna pui berah Diabola hovin namen lovin hma an rawn lâkpuina avangin, inthlan tawha zawnga inbumna turu ber, vote tihchingpen nasa ber, inman chhuahna rura ber, court-a inbeih nasat ber ṭum a niin, an inthlan hnu thla hnihnaah pawh chak zawk nih inchuhna thubuai chu a la kal vung dawn chauh ni maiin a lang. Party lian pahnih Democrat leh Republican te khu an intêr tawk thial mai si a; an danglamna erawh chu: Republican lam, Grand Old Party (GOP) an tih khu a Kristian lam an ni a; Democrat lam khu kristianna duh tawh lo, khawvel taka engkim thlahzal huau ‘liberal’ an tih, Leftist an tih bawk te khu Communism leh Globalism zawnga kal, kan Bible-in a sawi lawk, hun tawp dawna Sakawlh lalram lo indinna tur zâwnga hmalatu party a ni thung a. Khu politik indona khuan ram tin a nghawng vek dawn avang leh khawvel hun hnuhnung a nih tawh bawk si avangin keini ram kilkhawr bera mite pawh a pui apang, a tara zûrin kan ngaihven lo thei lova; khawdang hawi thei lo lêkin khulam khu kan thlir ṭhup mai a nih hi.

FIAHNA NI ROPUI – JANUARY NI 6 Kar leh Nilai zan mai khian America rorel khawl lian Congress hotu lawk mi 638 (538+100) rual chuan fiahna vawi thumna, nikum Nov. 3 leh Dec. 14 a an chin fel theih loh chin fel tumin an ṭhu khawm leh rup mai dawn a, thil a kal sual palh ang tih a hlauhawm hle. He parliament joint session kaihruaitu tur Vice President Mike Pence-a pawh a buana hmaa kherh, tih ang maiin a nâwi nghal nak nak mai. Engemaw chen phei chu a hawi tur lam pawh sawi mai harsa khawpin a awm ni tur a ni; a thawhpuite thla a timuang lo tlat mai a. Tun hnaiah Republican party chhungah  inphatsanna rûnpui a thleng si a. Ringtuten a tana kan lo ṭawngtai sakna te hi engti zawngin nge a kal dawn tiin ngaihtuahna pawh a chavai hman hial a ni. Ama party mi leh sa Republican-te chuan Danpuiin thuneihna a pek angin Biden-a hnawla, Trump-a chu President a puang turin, a thawhpui Senator Louie Gohmert-a leh senator dangten court thuneihna nena thuam chakna vitamin pek an tum lah chu, court-in an lo hnawl bakah amah pawhin hman ngai a ti lo nge ni, lehlam mitmei a ven vang nge ni zawk, a lo hnar ve bawk si a. Chuvangin, he January ni 6 fiahna ni hi khawvel mi tam berin kan Lalpa Isua lo kal leh tur aia kan thlir thup mai a nih hi.

VOTE RÛK KHÂWM: BUAINA THLENTU Ni danga thianghlim taka an roreltute thlang ṭhin, khawvel sorkar dangten democracy ram ṭhatzia an entawnna ber ni ṭhin kha, tun ṭuma an inthlang chu a buai ta nuaih mai. Democrat-ho chuan President Donald Trump-a chu engti zawng pawha paihthlak tumin, mawi leh mawi lo, dan leh dan lo hmanga vote tihchingpen dan chi kima inthlan leh vote chhiar naah hma an la a, kan sawi fo tawh angin mitthi tawhte chenin a sîng têlin vote an thlaktir a ni. Tichuan an candidate Joe Biden-a chu vote rûk khawm hmangin, tling zawk angin an vawrh chhuak ta a; mahse Trump-a lam chuan an pawm thei ta lo va. An thiltih dik lo zawng zawng chu man chhuakin court hrang hrangah an zualko a; mahse court lam te nena an lo inthurual vek avangin an thu theh luhte chu hnawl turin an lo inthurual leh vek si a. Hetianga hleih nei lutuka rorelna dik a awm dawn lo a nih chuan, a fawng chelhtu zawk President Trump-a pawlte hian engtin nge an thuneihna hi an hman ve dawn, an dawh reng ringawt dawn em ni, tiin, President kuta thuneihna namen lo awm chu buaina chin fel nana  hmang ve tura nawrna a na ta hle a. Mahse mi rin aia Trump-a hi a lo dawhtheih êm avang leh dan a ngaih pawimawh avangin, harsa mahse dan ang taka thil la kalpui zel a la tum rih a; chuvangin January 6 a rorel khawl pahnih, Senate leh House te joint session hian eng nge a thlen dawn tih a nghak ve phawt niin a lang.

JANUARY 6 JOINT SESSION HMALAK DAN TUR Eptu party Democrat-ho chuan an president candidate Joe Biden-a hian vote 306 hmuin a tling tawh a; Congress khawmpui hian a nemnghet mai dawn a ni, an ti sam êt a; an ṭanchhan chu Electoral Count Act of 1887 a ni. Chu danah chuan, Senate leh House inkhawm hmaah chairman-in state tin atanga electoral vote lo lutte chu pakhat khatin a hawng ang a; mipui hmaah amah puitute nen an chhiar ang a. Tichuan Biden-a tlinna hi dan angin an nemnghet mai dawn a ni, tih chu an sawi dan tlangpui a ni. Mahse, chuti maia awlai chu a nih loh hmêl. A chhan chu state 6-ah inthlan buai a awm avangim leh, heng state aṭanga inthlan result te hi dan lo deuhva, an state legislature te pawmpuina tel lova an governorte leh an secretary of state ten anmauni thu thua an certify mai a nih vangin.

Trump-a Pawlte Chet Tum Dan Trump-a pawl Republican Senator leh House member engemaw zatin heng state buai 6 atanga Bidena tana vote chhiar hi an pawm lo va; kan la hria ang a, inthlan nia vote tla tawh zawng zawng an chhiar khan hneh takin Trump-a kha a tling vek a; mahse vote chhiartu officialten dan bawhchhiaa inbumna hmanga a rûka ballot siamchawp pawn lqm aṭanga an lo hnawh luh leh chiam avanga Biden-a hi vote lem leh vote rûk khawma tling anga an puan tak mai a nih kha. Chuvangin ni January 6-ah pawh hian Biden-a vote hmuhte hi Trump-a lama ṭangten a dik lo tiin an hnawl  dawn khawp mai. Chutianga hnawl a nih tawh chuan, an thûm huk ang a, dan anga sawi fel tumin darkar hnih sawihona an nei ang. Mahse heng sawihona te hian President atana Bidena vawrh tling turin thuneihna a nei dawn tlat lo. Ṭawngkam thiama râwlrin ringawtin awmzia a nei lo. Vote an la dawn, te an han ti a; constitution-in vote laka Bidena thlan tlin theih a ni tiin a sawi lo,  kawng dangin a sawi tlat. Kan la thlir zel ang. Congress-ah em chuan Constitution kalh chuan an ti lo turah ngai ila.
Trump-a pawlte chuan hetia discussion an neih chhung hian inthlanna leh vote tihchingpen a nih dan chu a fiah thei ang berin, video thlalak nen, mit ngeia hmutute thusawite leh finfiahna hnial rual loh nen – Congress hmaah tarlan vek an tum. Chu chu TV channel tam takin America mipui lo hmuh theih turin a ‘live’ in an lo entir bawk ang a. Dik taka inthlanna (election integrity) hi America democracy innghahna lungphum a ni a. Hetah hian US Rorel Khawl lû ber Senate leh House of Representative mi 638 te leh TV kaltlangin America mipuiten inthlan dan dik lo leh vote tihchingpen dan tinreng chu an lo thlir ṭhup dawn a ni a. Hei hi roreltute leh mipuite hnenah election dan bawhchhiatna a awm zia entirna hun remchang a ni ang.

Zawhna awm ta chu: Congress memberten sawihona an neih zawhah eng nge an tih ang? tih a ni. An sawihonaah khan an inrem dawn lo, inrem tlanna awm lovin an zo ringawt ang. Democrat lam ngaihdanah chuan, sawihona neih zawhah vote an la ang a, House-ah democrat an tam zawk si a, Bidena tlinna chu nemngheh a ni ang, tih chu an sawi dan a ni deuh ṭhup mai. Mahse hei hi constitution  dan kalh a ni tlat mai, a ‘constitutional’ lo an ti a ni. Hei vang hian heta thunei ber Bidena hian he 1887 dan hi a chelek loh hmel a ni. Congress hnena Constitution-in President thlan dan tur a sawi dan chu 12th Amendment dan lam atanga tih tur a ni thung. Chuvangin Electoral Voter Count Act of 1887 hmangin Biden-a nemngheh theih a ni tlat lo.

Congress thuneihna hmanga Biden-a vote tling tur chuan 12th Amendment-in engtin nge a sawi tih kan thlir ang. Sawi fo tawh mah ila, a taka hman hun a hnai tial tial a, sawi thar leh ṭhin a ngai a ni ang e. President candidate ten vote 270 an hmuh tlin loh ve ve dawn avangin he dan hi hman tur a ni. He danin a sawi danin, state 6 atanga vite te kha hnawl an nih dawn avangin, tling turin vote an hmuh ngai 270 tlin lo ve ve-ah a sang zawk kha President tur chu a ni mai. Heng state buai 6 tel lo hian Bidena’n 227, Trumpa’n 232 a hmu a. Heti a nih chuan Biden-a a tling lo zawkah a tang dawn tlat mai. Ṭhenkhat sawi danin Trump-a chu thi mai tur, hnuk la chat lo ang chauha chhuah chau hle tute kha kan awm a ni lawm ni? Khawi nge, Bidena chan thatna tur kawng a la awm emaw i lo en leh teh ang:

Vote 270 an hmuh tlin loh ve ve chuan, Congress-in President tur chu Constitution, 12th Amendment-in chiang taka a sawi angin, Mike Pence-a chuan Congress kutah a hlan ang. Chutah chuan, House of Representative in President an thlang ang a, Vice president chu Senate-in an thlang tur a ni. House-ah hian Democrat-in member an ngah zawk a; Bidena chu an thlang tling mai dawn lawm ni? Ni lo deuh. House member zawng zawngin an thlang dawn lo; constitution sawi angin state tin atanga aiawh pakhat zelin President an thlang thei ang. Chuti a nih chuan Democrat party in sorkarna state an neih tam zawk chuan Bidena thlangtu an tam zawk dawn a ni; mahse Democrat lamin state 20 an nei a; Republic lamin state 30 an nei tlat si a; Biden-a  tan tlinna tur kawng a kaw leh lo tlat mai!  Biden-a lamṭang tan Thu a tawp e lumâm, tih a ni mai dawn a va ang ve! Mahse lungngai suh, Mike Pence-a hian a pu Trump-a a phatsan dawn a, chuta ṭang chuan Biden-a tan beiseina chhete tal a la awm lo maw?

MIKE PENCE-AN TRUMPUIA A PHATSAN AN TI MAW?
Titî a tam ta mur mur hle mai. Mi tam tak an ralkhêl nasa. Kum hlui thlah ni Dec. 31 khan ka hre tawh na a, hetiang mi tithinthawng tur chi sawi chhuaktu hmasaa ṭan hi ka duh loh ṭhin a ni a; tunah erawh chuan a lo darh sarh ta. Kar hmasaa ka thuchhuahah Joint Congress neih huna Mike Pence-a dinhmun pawimawh turzia hi hriain amah sawiselna leh puh chhiatna tam tak a pung phut ang a, Trump-a nena an inkar ṭha lo ang tein an sawi ang, tih vel kha ka sawi lawk a. Rin ang ngeia thil a lo kal takah khan keimah a sawitu ngei pawhin ka ring dawn ta mai a; ka inkhâp thlu ve lek lek mai a ni. Tunah erawh chuan a tuinu lai a lo inthlifim leh tawh e. Nawrtu mipui avang hian an tih tumte hi an ṭhulh phah ve fo va; politic thil ngang a ni a, game an khelin tactic te pawh an han hmang a ni thei awm e.

Attorney Lin Wood-a meuh pawhin na rêt râwta a puhna leh midangte puhna a awm a; Louie Gohmert-a’n President thlang thei hial tura court thuneihna a dil, amah Pence-a zawkin a lo hnawlna chuan a pu tân ṭhahnem a ngai dawn lo em ni tia hlauhthawnna a tizual a. Mike Pence-a mizia leh Kristian ṭha, nasa taka kan lo ṭawngtaisak mek a nih avangin, chuti maiin a pu a phatsan dawn em ni? Nge, sum bawkin lehlam ho hian an lo tham lungawi ve ta mai? tiin rilru a insual viau a. January ni 6 thlen hma chuan thu dik tak kan hre kher lo vang; mahse heti zawng hian ngaihtuah theih a ni ta zawk e:

Trump-a leh Biden-a te dinhmun chiang lo tak karah joint congress meeting kaihruaitu a nihna chu remchanga la-in tling zawk tur a puang duh mai ang a, tiin, Republican lam chuan ‘thuneihna tawp’ a nei a ni, tiin 12th Amendment an chang chawi a. Chumi hlauthawng chuan Democrat lam chuan, Pencea’n inkhawm kaihhruai bak chutiang thuneihna a nei lo, tiin Electoral Voter Count Act of 1887 an ṭanchhan bawk a. Pence-a lamṭang lo lama indah dawn chuan, hlauthawnna avangin thin a tiphu ve det det thei a ni. Nuih a za vak lo. Tunah an sawi anga a pu phatsan zawngin awm leh ta ni se, Dem-ho hlauhthawnna ang khan GOP lamin an hlauthawng ve thei leh bawk a.

Mahse Constitution hian chuti fakin Vice President hnenah thuneihna a pe hran lo. Duh zawk lo thlang ta se, a mawhphurhna nasa lutuk tur chu a phur zo lovang. Republican Senator Louie Gohmerta’n chutiang ti thei tura court thuneihna a dilsak pawh kha a lo hnawl a nih kha. Chuvangin Vice President hian ama politic kalzel tur tana pawi thei tur emaw, a ṭan lohna lam party tana huatthlala lutuk tur a ti duh lo ve ve in a rinawm. Amah politican hlun a ni a, hetiang buaina kara thuneitu Congress hnenah fing takin mawhphurhna a hlan maiin a rinawm zawk: tichuan, election a presiding officer a nihna anga thulai sât takin, duhsak bik nei lo anga awm theiin, US Constitution, 12th Amendment-in President thlan dan tur a lo sawi tawh goal-ah a khung zaih mai ang a. Tichuan, a chunga kan sawi tawh angin, state tina aiawh pakhat zel inthlang chhuakin president chu an thlang tawh mai dawn a ni. Hei bak chu chhut zui dan kan thiam tawh mai ang chu. 

MIKE PENCE-A THUCHAHIN THLA A TIMUANG He thu ka ziah laia thuthar ber, nizan maia chhuah, The Epoch Times, Jan. 2-ah Vice President Mike Pence-a chuan, ama party Senator 12 leh Congressmen 140 laiin January ni 6 joint congress-a Biden-a electoral vote hmuh an pawm dawn lova, an object bur mai dawn tih chu Mike-a chuan a lo ‘welcome’ tih ama Chief of Staff, Marc Short-a hnen atanga dawn a ni. Heng Republican Senator-ten inthlannaah namen lova vote tihchingpen a nihzia finfiahnate nen Joint Congress hmaa pho chhuah an tum thu pawh Mike-a hian a lo ‘welcome’ bawk bakah, America mipui maktaduai tam takin inthlan dan khawlo leh  tihchingpen nasat a nih avanga an rilru hrehawmna pawh a ṭawmpui thu a sawi bawk. Chuvangin Mike Pence-a hian mahni hotu leh mahni party phatsan dawn anga report hrang hrangte hi thu belhchian dawl lo a nih tak zet theih nan, i tawngtaipui sauh sauh ang u – mahni lo maha tun laia Republic party chhungkuaah inphatsanna a nasat avangin Pence-a te lehzelin rin leh duap an kai zel loh nan, Lalpa hnenah i dil tlat ang u.

Republic Senator 12 Rual, Ted Cruz-a hovin Congress Hmaa an Thu Thehluh Tur hi a nêp vak lo. He election a inbumna leh inthlan result tikhawlo zo vek khawpa Democratic party-ho chetna hi ngawih bopui chi ziazang a nih loh zia sawiin, heng vote tihchingpenna report te hi candidate pahnih khat thu mai a ni lo; a darh zau lutuk. Chanchinbu lâr tham Reuters/Ipsos Polling-a a lan danin America mipui 39% in kha election kha tihkhawloh vek (RIGGED) a ni tih an ring a. Republican mipui 67% pawhin chu polling chu dikin an ring a, Democrat mipui 17% zet leh Independents mipui 31% in a dik an ti bawk,” tiin an sawi. Inthlan dik lo a ni titu an tam hle a nih chu. Heti hian an lehkhaah chuan an sawi zel a:

“1877 khan, Congress chuan chutianga inthlan tihchingpen a awm tia puhna chu a ngaihthah miah lova, media lamin dawtthu ang lekin an puhsak hek lo. Chutih a hnemêkin Congress chuan Senator 5, House member 5, Supreme Court Justice 5 te ruatin, thubuai chingfel turin Electoral Commission an din ta hial a ni. Chutiang bawkin tunah hian Congress hian Electoral Commission din ve nghal sela, ni 10 chhungin vote tihchingpenna state te chu endik vek sela, Commission thil hmuh chhuah te chu a bika koh special legislative session hmaah a ṭul angin rawn report rawh se.

“Chu emergency ni 10 audit chu zawh a nih hma chuan, keini chuan January 6 hian state buai atanga electoral vote te hi dan anga tih pawh ni lo, danin a phut anga certify loh lehnghal a nih avangin kan hnawl  dawn a ni. He election a dan bawhchhiatna nasat zia hi kan hriat phak chinah a la rura ber a ni. US democracy hi a innghahna lungphum chawp hian rin tlak lovah a awm tawh a; chuvangin mipuite lungawina tawka tuam dam hi kan phût a ni,” an ti a ni. Kar leh Nilaini zan, January ni 6 a US Congress a drama ropui chhuak tur hi engtin tak ni dawn maw? Keini chuan lei leh van Lalber hian thiltihtheihna leh miracle ropui tak nen rawn chhuk thla tawh mai se kan va ti em! Chu chu kan tawngtaina ber pawh a ni ta e.

Post a comment

Powered by Blogger.