JAN 6, CONGRESS JOINT SESSION THLIRLAWKNA
PC Lawmkunga 3.1.2021
“Ni ropui tak lo thleng tûr chu…” tih hla ang deuhvin USA President election result ngaihventute tan chuan January 6, 2021 hi nghahhlelh loh theih pawh a ni ta lo a ni âwm e. He mi ni chawhnu dâr khatah hian USA Dan Siamna Hmunpui Congress-a in pahnih House of Representatives leh Senate te chu inhmu khâwmin November 3-a President thlanna result kha an chhiar dawn ta a ni. (Vote thlak tur a ni lo). Kan hriat angin December 14-ah khan Electoral College-in vote an thlâk tawh bawk a nih kha.
Engpawhnise, result chungchângah hian thu a buai hle mai tih chu kan hre theuh va. November ni 3-a vote tla an chhiar leh electoral vote thlâkah pawh Joe Bidena hi chak zawka a lan avangin khawvel hriatah chuan President-elect anga ngaih loh theih a ni ta lo va. News channel ten Joe Bidena hi president elect-ah an puang ni lovin election lama thuneitute atanga thu la chhâwnga an puan a ni tih hi hre bawk ila. Khawvel ram tam takin (India tiamin) lawmpuina thu pawh an lo thawn tawh a ni. Chutih lai chuan Trump-a hian vote chhiar lai khân chak zawka inpuangin tun thlengin a la tlâwm duh bik lo va. Trumpa pâwla dân hre mi Rudy Guiliani kaihhruaite hian vote lem leh dan bawhchhiatna a tam ti-a “Swinging States” an tih States 7-a inthlanna te an khin avang hian kum danga an inthlan ang mai a ni ta lo va, result chungchângah thu inchuh lian tak a awm tâk avangin vawiin thlengin “Tunge chak zawk’ tih hi inhnialna a ni ta a ni. State leh Federal Supreme Court (December 11, 2020) thlenga an vuivaina hi hnawl a nih zel avangin he Joint Congress Session hi Trump-a pâwlte ṭan khawh lehna tur chu niin a lang. Mizote zingah pawh USA President election 2020 hi tuipui kan tam a, hmuh dan leh rin dân pawh a rual vek thei lo va, han inhnial bap bap châng pawh a awm a ni âwm e. Khitianga a buai deuh tak nuai vang khian January 6 khi a nghahhlelhawm ta viau reng a. Chu hun lo thlir lâwkna chu tlêm han thai lang ve ila, a sual lêm lâwng chu maw. A kimchang dawn lo khawp mai a, kan hre sêng lo va, hriat fuh chiah loh pawh a awm mai thei. Mahse a tlângpui chuan kan sawi dik turah inngai phawt ila.
ELECTORAL COUNT ACT 1887: Joint Congress Sessionin January ni 6-a electoral vote an chhiar tur hi Dân awm sa thlap dungzuia kalpui tur a ni a. Mi thenkhatin an sawi anga nikum November 3-a inthlan result a buarchuar em avang chauhva he session hi neih tur anga an sawi hi a fuh chiah lo. An kumkhaw tih dân zawk a ni e. He Dan Section 4 na leh Twelfth Amendment of the USA constitution 1804 dungzuiin, “The President of the Senate shall, in the presence of the Senate and the House of Representatives, open all certificates and the votes shall then be counted” tih a ni. He Dan châng 4naah vêk hian he mi ni-a vote chhiar dan tur chu chipchiar takin a inziak vek a ni.
Congress Joint Session kaihhruai hi Senate President, (USA Vice President) hna a ni a. Kuminah chuan Vice President ding lai Mike Pence-a hian he Joint session hi a kaihruai dawn a ni. Mike Pence-a hi Trump-a Vice President ni lai leh Republican Party mi a nih avangin Trump-a ṭantute chuan he mi ni hian Trump-a chu USA President-a a puan mai an beisei a. “USA President thlanna Mike Pence-a kutah…” tiin thuneihna tâwp nei turah an ngai hmiah mai. Mahse hei hi chu ngaihdân dik ber a ni dawn lo a ni.
SENATE PRESIDENT (U.S. VICE PRESIDENT) MAWHPHURHNA: Electoral vote lâk khâwm sâ kha USA Archivist (Sawrkar lehkha pawimawh vawng thatu) in December 23 hmain Senate President hnenah a thawn vek tur a ni. Tichuan Joint Session neih hunah thingrem uk (mahogany thinga siam) in electoral vote kha an rawn la lut ang a. Senate president chuan a hawng ang a, a chhiar tûra ruat mi palite chu State tin result kha a inchhiar chhâwk tir ang. A chhiartu tur Teller an hi te hi House leh Senate atangin Republican 2 leh Democrat 2 ve ve ruat an ni ang a. Presidentin alphabetical order in State tinte electoral vote kha hawngin teller pakhat hnenah a pe ang a, heti hian a lo chhiar chhuak ang. Entir nan kum 2000-a electoral vote certificate hi lo hmang ila. “Mr. President, hei hi Alabama State electoral vote certificate a ni a. A felfaiin a dik niin a lang…. Presidential candidate Mr. George W. Bush hian vote 9 a hmu a, Vice Presidential candidate Mr. Dick Cheney hian vote 9 a hmu“ tiin. Teller-in a chhiar chhuah hnuin hnialtu an awm chuan kha State-a inthlan dan dik lo ni-a a hriatte chu a rawn sawi ang a. Chutah Presidentin, ”I lehkhaah khan Senate member pakhat leh HR member pakhat ve vein an hming an ziak em?” tiin a zawt leh ang. An ziak loh chuan Presidentin a pawm lo tih entir nan a thing tuboh (wooden gavel) khan dawhkân chhu riin a object tu kha sawi zui a phal tawh lo vang. Congress member pahnihten hming an lo ziak a, Senate Presidentin a lo pawm erawh chuan House pahnih ten a hranga inhmu khawmin darkar hnih chhûng an sawiho ang a, chu chu joint sessionah ngaihtuah leh a ni ang. State pakhat buaina chinfel hma chuan a dawt leha mi chhiar a ni rih lo vang. He joint session chhûng hian inhnialna (debate) a awm thei lo bawk.
Mi tam tak rin angin Senate President hian ama duh dân dâna he session hi kal pui theihna a nei lo. Electoral Count Act 1887 hian Senate president thuneihna hi a hrêk nasa hle mai. A chhan chu Senate President ngei pawh kha President chuhtu emaw Vice President chuhtu emaw a lo ni thei a. Chuvangin result buaina tam ber hi State Governor te leh Congress chinfel atana dah hrâm a ni. Chutiang a nih avang chuan Senate President kaihhruaina hnuaia Joint Sessionah hian amah Senate President awmna Party ngei candidate pawh a chak lo zawka a puan loh theih loh chang a awm fo. Nixon, Joe Biden, Al Gore leh Dan Quayle ten Senate President an nih laia an Joint Sessionah khan an party candidate lo zawk tlinga an puan a ngai tlat a nih kha. Tin, State result pawm leh pawm loh chungchangah Congress hian Senate President thu kha an hnial tlat thei bawk a. Chutiang hunah chuan Senate President thu ni lovin State Governorin a lo certify tawh result kha pawm ngei a ngai thin.
Hetianga objection pek hi a tlang khât viau a ni awm e. Kum 1969 leh 2005 erawh kha chuan an pawm sak a, ngaihtuah a nih hnu erawh chuan an hnawl leh tho. (North Caroline leh Ohio State inthlan chungchangah). Tunah hian Republican lam hian objection siam tur Senator leh Representatives te 12 emaw lai chu an rawn chhawp chhuak dawn niin a lang a, eng chen nge an thlen dawn kan lo thlir phawt dawn a ni.
SENATE PRESIDENTIN PRESIDENT LEH VICE PRESIDENT-A TLINGTE HMING A PUANG DAWN EM? : State zawng zawnga vote tla te belhkhawmna lehkha chu Teller pakhat khan Senate President a pe ang a. Senate President chuan President candidate leh Vice President candidate vote hmu tam berte hming leh an electoral vote hmuh zat State hrang hranga mi belhkhawm (state of votes) chauh a rawn puang chhuak ang a, session a tawp ang. Tunge President tura tling, tunge Vice President tura tling ti kherin a puang (declare) lo vang. (Mahse a tling zawkte hming chu a hriat theih sa reng tawh ang). Vanduaithlak takin January ni 20th hmain President tur hi tifel hman ta lo se, House Speaker (tunah chuan Nancy Pelosi) hi Acting Presidentin a awm ang.
MIKE PENCE HIAN TRUMPA A TAN BUR DAWN EM? Trumpa tana mi thahnemngai tam tak hian Trump-a kaihza veng Vice President ngeiin inkhawmna a kaihruai dawn avangin an thla an timuang viau niin a lang a. Mahse, a hmaa kan sawi tawh ang khian Senate president hian ECA 1887 bak pelin engmah a ti thei lo. Chu chu hre rengin Texas atanga Republican pachal Louis Gohmert (HR member) chuan Mike Pence hi State inthlana result buaite hnawl burh (overturn) theihna tur thuneihna sang tak pe turin Texas State-a District Circuit Court of Appeal-ah a dil a. Chutih lai chuan Mike Pence-a ber chuan chutianga Courta lawsuit file chu thil dik lo tiin, Congress hmaah dil zawk tur a ni tiin a ukil ten thu (counter affidavit?) an thehlut ve leh bawk a. Engemaw ti zawnga ngaihtuah chuan Gohmert-a leh a tanpui tum Mike Pence-a hi an inkhing zaw mah emaw tih tur a ni. Zirtawpni kal ta January ni khat ni khan Judge Jeremy Kernodle chuan Gohmert-a thu thehluh hi a hnawl leh ta nge nge a ni. Hetia an innghahna ber Mike Pence-a a leh ṭan ta tlat nia sawi a nih avang hian Trump-a pawl GOP te chu an thin pawh a rim viau ang le.
TLANGKAWMNA : Kum 2016 inthlanna electoral result January 6, 2017-a Joint Session-a an chhiar lai kha kan hmu hlawm ang a. An presiding officer kha khatih laia Vice President tuna President Elect Joe Bidena hi a nih kha. Ani Democrat pachal khan a party candidate te kha vote hmu tam zawk leh tlinga a puan theih ngawt lohzia chu kan hre awm e. Democrat candidate Hillary Clinton ni lovin Repulican candidate Donald Trump-a khân President ni turin vote a hmu tam zawk a nih kha. Objection rawn siamtu mi 5 vel kha Joe Bidena khan a hnâwl vek mai bawk a. Khâng objection siamtute kha Democrat lam vek an ni a, mifel awm pui pui si khân an lehkha kha an tifel lo khawp mai a, Congress member pakhat zawk emaw hming ziah hnan loh lehkha te an rawn lek chhuak a. Kha vang khan Senate President tan khan, a pawlpuite ni mahse hnawl mai kha a tul ta a ni. Session kha Joe Biden khan a hruai thain a vawng fel khawp mai. An session zo chu chibai bûktu leh thlalâk puitu a ngah hle a. An objection a lo hnâwlsak te ngei pawhin thlalakpuiin an haw zui lem lo tih pawh a hriat theih. (Kan sawi chin zawng hi dan pangngaia thil a kal theih chuan tih ang deuh a ni ber. Khing bâka harsatna dang a awm chuan an buai zui hrep mai thei bawk. State pakhat atangin elector list pahnih, two slates of electors lokal ta se a chinfel dan tur te pawh a awm a. Tun tumah hian chutiang chu awm ngei tura ngaih a ni bawk. Tin, State thenkhat electors list kha lo hnawlin quota 270 kha tlin theih ni ta bawk si lo se, a chinfel dan tur pawh a la awm leh zel. Mahse kan sawi hman rih lovah ngai ila.)
Tichuan tun Nilaini lo thleng tur chu sâng tam tak tan lawmna ropui, chhiarsên loh tân ṭahna a ni dawn te pawhin a lang e.
Kum thar Pathianni hmasa ber hman nuam vek ule.
Post a Comment