A sei lo thei lo...!
KRISMAS DANGLAM  &  U.S. MIPUI BUAINA

Dr. PC Biaksiama,
26 Dec 20, Inrinni.
TRUMP-A TAN HNEHNA KAWNG 7 A INHAWNG

Kumin Krismas zet chu, China hripui avangin engkim a danglam zo ta. Kristiante kûtpui zinga kan thlakhlelhna chhan ber – sikni eng mawi leh lal pian hun pangpar vul chik chek kara, ei leh in leh 'masi ruai ropui, masi kawr thar, biak in program, lengkhawm leh zaikhawm leh intihhlimna leh interek dan chi hrang hrang karah – lawm tur ber Krista aia mahni lâwmna mai kan zawnna hunpui chu Chung lamin ‘tâwk’ min tihsak ta nge ni, Lalpa a lungawi zo ta lo a ni ang, ‘cancel’ sak vekin kan awm ta mai a. 

Chu mai a la ni lo, hotute thupek ngeiin Dec 25 ni chu ‘curfew’ boruak a leng zawk a, lirthei thâwm reng reng hriat tur awm lovin, khuang rí pawh hriat tur awm lovin a reh ṭhup mai a. Chutih karah chuan krismas thuchah ka dawn thar ve, ‘Thinlung a lamah hawn ila, ro thil dang a ngai tawh lo vang,’ tih chu tawngtai thupui bera hmangin ka bial chhunga in tinah zing karah ka puang zâr ta a; ka hlimpui ta phian a. He kan boruak danglam tak hian krismas thuchah lairil ‘Krista lama thinlung hawn’ chu min pe chiang kher mai!

Vana Lalberin a Lalthutthleng leh a Lallukhum kalsana Bethlehem ran in tlawmah rethei taka a lo pian laiin, USA lamah erawh chuan thlangtu mipui nei tlem daih zawkin vote rûk khâwm hmanga lalna chan tumin ṭan a la ve fan fan thung a; a va inang lo em! Ringtu tam tak chuan Trump-a leh Bidena te indona hi lei leh van indona angin, ringtu leh ring lotu, Krista leh Bumtu anti-christ, Pathian ṭihtute leh Pathian pawisa lote inkar indona a ni tih hi hai rual lohva chiang nia an hmuh laiin, chuti taka sual leh ṭha indona anga hmu thiam lo Kristian zingah an awm thei hi mak an lo ti hle bawk a. He indona hian eng ang ringtu nge ka nih? Pathian duh zawng pawisatu nge ka nih Pathian duh dan lazam mai maitu? tih te hi  Kristian tinte min zawt a ni.

America ram leh hnam khu a tirah Bible thu zawmtu leh Pathian ṭihtuten Krista lalna ram atan, zalen taka Pathian biakna ram thianghlim ni tura an din kha a ni tih hi Evangelical tam berte rin dan a ni tih Stephen E Strang-a, US journalist leh Charisma magazine dintu chuan a lehkhabu ziah thar, God, Trump, and Covid-19 ah a sawi (Front Line, 2020, p. 5). Mahse chu Kristian nun dan (culture leh tradition) chu nuai bo va, Sodom leh Gomorra nun dana thlak danglam veka Pathian tel lo leh mihring duh dana khawvel thar (new world order) din tumin Communism duh dana khawvel thar din tumin namen lovin ṭan an la, tlawm mai an tum bik lo.

Democrat-ho leh Supreme Court Ṭan Tlân Dan Tenawm chu Tun laia America rama dikna tlûk chhiatna (moral break down) nasat tawh zia khu: kan hriat vek tawh angin Joe Biden-a tihtlin tuma inbumna te, vote tihchingpenna leh dan bawhchhiatna tinreng hmanga a tling lo zawk tlinga puangin, vote rûk khawm hmanga laltir an tum Bidena chu amah controltuten hma an la zel a; White House luah tur âwm ang hialin an khêl sang tial tial a.

Lehlamah Danpui bawhchhiaa vote an rûk khawm dan te, vote an tihchingpen dan tinrengte chu man chhuakin Donald Trump-a Republican party te chuan court-ah thubuai siamin, thudik hai chhuah tumin ṭhahnemngai takin hma an la a; mahse an zualkona court zawng zawng chu Bidena lamṭang vek an nih avang leh, ṭan lam nei lo thudik duhtute pawh thamna bawlhhlawh te, invauna leh intihṭhaihna te avangin engmah an ti ngam lo; an tukkhum chhah chhawnin, Bidena ho thiltih dik lo an rawn thlente chu hmuh pawh hmu duh lovin, an lo hnawl zel a; Supreme Court thlengin an hnawng zar zar reng a; thubuai an thehluh tawh 50 zet zinga 49 chuan hnawl a tawk tawh a ni. 

Court thuchhuak mak tak takte chu! USA a state lian ber dawttu Texas state-in Supreme Court (SCOTUS) a an thu thlente kha hleih nei takin, hearing pawh neihsak duh lovin, ‘state danga thil thleng chungchang relsak thei dinhmun (standing) ah in ding lo tiin an lo hnawl tawp mai kha a ni tih kan sawi tawh a. Chumi hnuah Trump-a attorney senior, Sidney Powell-i lawsuit pawh an hnawl ṭhensak nual a.

Tun dinhmuna thil awmdan (update) chu: Supreme Court chuan Trump-a legal team-te thubuai chu hnawl chiah si lovin, tihkhawtlai dan zawngin, kumthar January ni 14 ah ngaihtuah an tum ta chauh mai a. An pawmsak dawn nge dawn lo tih pawh a hriat chuang lo. Chu chu thudang, January 14 hi President lakluh ni ( ni 20) nen ni 6 chauh a karah a tla a ni. January ni 6 a Elector-ho vote thlak hma ngeia ngaihtuah ni se, en hma deuh se tia an ngenna pawh barah an khawn duh chuang lo. Washington Examiner chanchinbu, dt. 23.12.20-in thu hnuhnung a tarlan dan phei chuan, Pensylvania state-in election a kalpui dan kha US Constitution dan kalh a ni a, pawm theih a ni lo, tia Trump-a legal teamte thu thehluh, Supreme Court-in lo ngaihtuah an tum ni chu – Joe Biden-a president atana an lakluh hnu, a ni hnih ni, January 22-ah a ni ang, an ti kher a nih chu!

Hei hian Court rilru chiang taka a tarlan chu: heng state buai 6 a court zawng zawng leh Supreme Court-te hian Bidena Democrat party-te nen Donald Trump-a tihtlak tumin an lo intiam rual ṭhup mai hi a ni. Rorelna court te reng reng hi thudik dap chhuak turin rin tlak an awm tawh lo. Communist China sumin a lo tlawn lungawi vek tawh niin Trump-a attorney Lin Wood-a sawi chu NTD-in a puang. Supreme Court Chief Justice John Roberts-a ngei pawhin Trump-a chungchangah, ‘He pa hi an thlan tlin leh ngai tawh lohna turin hma ka la dawn alawm,” tiin liberal justice dang Stephen Brayer-a hnenah phone-in a lo hrilh, tih Lin Wooda vekin Twitter-ah a sawi. Chuti chung chuan Trump-a legal teamte chuan vote tihchingpen a nih dan – mitthi sang tam tak vote an thlaktir dan te, kum tling lo leh state pawna mi a nuai tela an vote tir dan te, ballot paper lem China ram atanga an chhut an rawn phur luh te, a rûka ballot paper an thun luh dan leh Dominion khawl hnathawh dan video thlalakte nen lam an la theh lut hran hram zel tho va. Court-a roreltu judge-te erawh chuan hnawl tur chânin an lo châng rân thung a. 

Engvangin nge heti taka court tin maia judge-ten an hnawl zel mai le? Democrat judge-te chu an ṭan tlân laiin, engati nge Trump-an duhsaka Supreme Court judge atana a dah chawisan mi 3 te leh a dang, Republican mi 3 te khan engtizia nge an lo puih ve loh le? Kan beisei anga Republican judge 6 te hian Trump-a hi lo ṭanin, Trump-a teamte duh danin ro lo rel ta se, Pathian hnathawhna a dal thei dawn a; Lalpa tih ni lovin Trump-a ṭantu justice-ho vang a ni, Supreme Court vang a ni, an ti ang a, Pathianin ropuina a chang dawn lo, a lo ni leh bawk si. Chuvangin Trumpa te tan court zawng zawng hi Lalpan a paihthlaksak vek a ni ang, tih hi ringtu ṭhenkhatte sawi dan a ni. Ringlote erawh chuan ‘chauh-thu-barawh lek a nih chu, an ti ang. Engpawh ni se, tun dinhmunah chuan, court zawng zawng khuan Trumpa paihthlaka Bidena laltir an tum ta vek a ni – mahse, an tum angin an hlawhtling kher ang em le? Ka ring vak lo.

TRUMP-A TAN HNEHNA KAWNG 7 A INHAWNG

Kan chhiar tawh atang khan Trump-a tan hnehna kawng a pin hmel hle awm e. Mahse a tlinna tur kawng khat a inkhar tihna chauh a ni a; kawng hrang hrang 7 la  inhawng hi i lo thlir ve teh ang aw. The Finance Hub news channel-in tawitea a sawi dt. 24.12.20 ami kha, chiang deuhin kan sawi zau dawn a ni:

1.  MARTIAL LAW hi duh se Trump-a hian a puang thei reng. 1863 kuma Americaa Civil War a awm lai aia buaithlakin ram chhung buaina hi a nasa lutuk tawh a ni. Democrat-ho leh Republican-ho hi an intualvuak lo chauh a ni tawh mai; thisen chhuahna awm fovin, an intibuai deuh reng tawh a.  Hmannia Texas State Attorney General-in he inthlan buai hi dan bawhchhiatna a ni tia danpui humhalh tura a ngenna, tham lo taka Supreme Court-in an lo hnâwl dan kha a state puma mipuiten an pâi dam thei lo. Constitution humhalhtu tura din Supreme Court pawhin Constitution a palzût ang maw? tiin, USA atanga inlakhran a, independent rama  awm hran duhna boruak a inmung ta. United States of America ram leh hnam vawnghim turin President kuta thuneihna chungchuang, a hun taka hman tura Constitution-in a pek hi buaina chingfel a, sipaite enkawlna hnuaia inthlan ṭhatna fel leh fai tih duhin America mipuite khu an za ruai tawh a; an president khuan martial law puang turin a nawrin an nawr tawh bawk a; chung zingah chuan sipai general kai chin pawh an awm fur mai. Sipai enkawlna hnuaiah Free and fair election nei ta se, Biden-a vote duh tur hi uihûm lek an ni lo vang tih sawi theih loh khawpin America mipuiten Trump-a hi an lainat tawh a ni. Martial law hi tun hma lamin vawi 64 (thenkhat sawi danin vawi 68) lai puan a lo ni tawh a ni.

2.  EXECUTIVE ORDER OF 2018 US inthlana foreign sorkarte inrawlhna a awm a, ni 45 ral hmaa report a nih chuan, President hian a ṭul anga hma la turin thuneihna sang bik Executive Order, 2018 chhuah a ni a. National Intelligence Director John Radcliffe-a khan Nov. 3 a president election-ah foreign ram pathum – Iran, Russia leh China te an inrawlh thuk zia report a pe thlap tawh a. He thuneihna hi hmangin Trump-a chuan heng hnâwltu court order zawng zawng lehthal hian hnehna a channa ngei turin hma a la thei. He executive order hi hmang ta se, amah dâwta sawichhe reng mai tu mainstream news (fake news) te leh foreign puihna a rûka lo dawngtu Bidena hote hi ram phatsantu (traitor) anga manin lung inah a khung phiar thei a; engati nge tun thlenga a la tih loh? tih hi zawhna lian tak a ni zawk.

3.  INSURRECTION ACT OF 1807 Ram chhunga buaina siam te, sorkar phalna lova ro hran rela sorkar do zawnga kal te, ram tana hnawksaka awm te reng reng chu he dan anga action lak theih a ni. Kumin chhunga BLM te, Antifa te leh Far left ho chet dan – mi dawr an rawk, sorkar building leh mi dawr leh office te an hal, tual an that, khaw tam tak chu buainain an tikhat mup mup thin a, khâng buaina chhuahna state democrat state governorte lah khan an president elsênin, buaina siamtute an lo support zawk a nih kha. Tun thlengin khâng buaina siamtute khan mi tihṭhaihin an la vâk vêl reng. Court-a thawk judge tam tak chuan thudik ṭan an duh ve tho, mahse vaubehin an awm vangin engmah an sawi ngam lo. Engti zia nge kan pu Trump-a hian heti taka heng mite hi a dawh reng mai le; mipuite nunna a him loh hi, miin thudik pawh an ṭan ngam dawn loh hi? Tumah kan him tawh loh hi,' tiin thuneihna chelek tura nawrna a nasa tial tial mai. 

4.  INTHLAN BUAINA CHINGFEL TURA THUNEIHNA HMAN US inthlan tawha zawnga vote tihchingpen nasa ber, corrupt ber leh inbumna tam ber a ni tih hmu chiangtu  President  Trumpuia hian engti ziaa a kutah thuneihna nasa tak, ram danin a pek reng hmang duh lova, a harsa zawng zawnga amah lo dotute leh  lo hnawltu tur tih hre sa renga court hrang hrangah a kal kual vel le? Dan ang thlapa thiltih a duh tih chu hai rual a ni lo; mahse amah eptute hi dân zawng zawng bawhchhetute an ni bawk si a. Tunah hian ama ukilte hmang kher lo pawhin FBI te, Intelligence Forces, police forces, secret agent etc te hi han chhui chhuahtir dawn se, FBI te chu rinhlelhawm mai an ni si. Bidena fapa Hunter Biden-a eirukna document tam tak chuanna lap top lo kawltupa, computer repair dawr neitu te kha FBI agent-te chuan engmah sawi chhuak lova thup tlat turin an lo khap zawk a; inthlan hmaa state pawn atanga Georgia state chhunga vote 288000 zet phur luttu Jessi Morgan-a, postal driver te khan a thil tih dan a sawi chhuah hnu khan amah puitu tura a ngaih FBI agent-te khan a chhungte kha an  chhaih buai (harassed) ta zawk hlauh niin a sawi a. Hetiang sorkar hnathawkte ngei pawhin an pu ber chhiatna tur dapa an chet lai hian President hi engati nge a ngawih reng le? tih hi rilruah a lang. Zawhna a tam a, chhanna lam a awm si lo a ni.

5.  VOTE CHHIARNA KHAWL ENDIK Vote chhiartu sorkar officerte, secretary of state te, governor te leh Democrat lam reng rengin vote tihchingpenna engmah a awm lo, tia an ṭan tlat laiin, vote chhiarna khawl Dominion endik (forensic audit) erawh chu an phal reng reng si lo va; vote lem a awm lo tiin thih thâ meuha an ṭan kuh tlat laiin vote lem leh tak thliar hran an hlau em em thung si. Eng nge an hlauha, eng nge thup an tum? Dik takin President hian heng vote chhiarna khawl te, vote lem leh tak endik te, signature inmil lo endik te, mitthi tawh vote an thlaktir endik turin President hian a thuneihna Executive Powers hmang duh se, heng state buai 6/7 atanga vote dik tak a hmuh zat te, a lem awmzat te, ballot lem hmanga Biden-a an tihtlin dan te chu harsa lo tein a hmuh chhuahtir mai dawn a ni.

6. STATE LEGISLATURE TE TANPUINA Heng state buai zinga 5 te hi Trump-a party GOP sorkarna vek an ni a. An thu lovin state court te, an secretary te leh an governor-ten covid hrileng chhuanlama state dan leh Constitution dan kalha Bidena tihtlin tuma vote an lo tihchingpen veka, ballot dik pangngaiah Trump-a tling daih si, ballot lem siamchawp hmanga Bidena an lo tihtlin dan an han hriat chian hian, an thuneihna an hmang ta a. Bidena tlinga an lo puan (certify) tawh pawh "daân lo a ni," tiin an sûttir (decertify) leh ta mek a. Heti a nih chuan tumah tlinga puan theih loh, electoral vote 270 hmu lo ve ve an ni tihna a ni ang. Democrat lamin Bidenan vote 306 hmu ang leh Trumpan 232 chauh hmu anga an sawi fo hi chu a nih lohzia a lang chiang dawn khawpin a lang. Engtin maw? 

January 6 ah Washington DC-a parliament joint session – Senate leh House of Representatives ten an neihna turah Vice President Mike Pence-a chuan full powers kengkawhin meeting a kaihruai dawn a. Heng state 6 atanga electoral vote zat an chhiarnaah, dik lo taka inthlannaa Bidena tling zawk anga an report chuan, chairman Mike Pence-a hian a lo pawm dawn loh thu huaisen takin a sawi chhuak piap piap tawh mai. Dik lo taka titute chunga zawldawh reng mai kha chak loh vanga ngaiin an zuam phah dawn tlat si a. Chubakah GOP Senator leh Congressmen mi engemaw zatin Bidena vote hmuh hi pawm lo tura ban phar tur leh lo puibawm turin an lo intiam sauh sauh bawk a. Hengte hi dan bawhchhiatna ni lovin, Constitution kalphung (procedure) zawmna a ni zawk bawk. 

Democrat mipuiin an rawn nawr buai dawn em? Black Lives Matter Movement (BLM) leh Antifa groupa mi, intihbuai châk tak takte an lo thawk chhuak ang em? Thawk chhuak ngei ang le, inrikrâpna leh intihṭhaihna tinrenga inhrosa turin beisei theih an ni. Anih leh anmahni ep turin GOP mipui an lo thawk chhuak ve ang em? Dem-ho aia a lêta tam mah an lo thawk chhuak ve bawk tura rin theih a ni. GOP tana a tawp thleng raka beih inhuam PROUD BOYS an tih, mi huaisen pui pui, an hruaitu tam tak chu sipaia ṭang tawh, ralthuam tinreng hmang thiam leh râl rel thiam an ni. Civil mi ni tawh mahse râlthuam silai ṭha pui puite nen sipai ang maiin a tawn tawnin an in ṭam ut ve ve tura ngaih theih an ni bawk, USA-ah chuan chhungkaw tin deuhthawin licence neiin silai tha tak tak an nei deuh vek si a. Tunah pawh hian an inkap zeuh zeuh tawh a. Heng veng tur hian police duty pawh a sang têl mai ni lovin, a sing telin an ven tlat a ngai ang. Chu lam ai maha kan thlur tur chu Congress in president tur an thlang tur chu a ni.

State buarchuar 6 atanga electoral vote an hmuhte chu an inpawmsak dawn lo ve ve ang a, chhiar theih loh ve ve a nih dawn avangin vote 270 an hmu tling lo ve ve ang a, president zawk tur hriat theih a ni lovang. 

Tun dinhmun ang buaina lo thleng tur laka chinfelna kawng hi kum zahnih kal tawh khan USA Constitution chuan remhre takin a lo dah lawk diam a. Chumi, Constitution 12th Amendment angin Congress-in president tur chu an thlang mai dawn a ni. Kan sawi tawh thin angin, state 50 atangin, state tinin aiawh pakhat zel an theh chhuak ang a. Inbeihna a nasat tawh avangin an theh chhuah memberte chu an party a mi ruh deuh leh mi rinawm, mahni party phatsan mai mai lo tur an thlang chhuak ve ve ang. Tunah hian Trump-a lamin state 30 an control avangin member 30 an nei ang a, Bidena lamin state 20 an control atangin aiawh mi 20 an theh chhuak ve ang. Vote an han la ang a, a tling tur zawk chu sawi ngai lova chiang sa a ni ang. Vice President chu Senate-in an thlang dawn a; tunah hian GOP in member tam zawk neiin Senate an control mek avangin an thlan chhuah tur pawh a hriat sa theih awm e. Chuvangin, buaina leh harsatna karah, Bidena'n vote rûk khawm hmanga president nih tuma America mi hausate leh China hausakna nena ṭan a lak hnuah pawh, a tawpah chuan Donald Trump-a tan hnehna kawng a inhawng leh tho tho  a ni.

7.  CHUNG LAM TANPUINA Trump-a tana hnehna kawng inhawng pasarihna chu Chung lam atanga Pathian thiltihtheihna lo lang tur hi a ni. Keini ram kilkhawra awmte chena ṭhahnem kan lo ngaih vena bul inṭanna leh a tawpna (alpha leh omega) chu America ram tlu chhe mek Pathian thua tung ding leh tur leh, khawvel puma kristiante thlavang hauh turin, Trumpuia tawngtaisak turin Lalpan mawhphurhna min pe tlat a, hai rual a ni lo. Keima duh thua ti pawh ka ni bik lo. Lalpan thinlung lamah ṭhahnemngaihna chi tuh lo se, heti tak hian kan ṭawngṭaipui hauh lo vang. Dil tura min titu hian thil min pe dawn. Min dîl thlawntir lovang, tih hi ka ring nghet hmiah mai. Chan ṭha lo zawk anga chanchinbu lian zawng zawngin an chhuah pawhin ka rinna hi a sawinghîng pha lo. Engtin lek nge Lalpan a rawn chhan chhuah dawn tih kan sawi thei lo; hei chiah hi ka hria – Lalpan min tithlawn lo vang, tih hi. Nang pawh chu chu i dinnghehna tur leh i ṭawngṭai chhan a nih kha. Thâ thlah lovin aw niang. Lalpan malsawm che rawh se.

Post a Comment

Powered by Blogger.