ENGKIM TAN HUN RUAT A AWM!
-Dr. C. Lalrampana
ENGKIM TAN HUN RUAT A AWM

India rama hripui lo luh tantirh lai atang tawh khan abikin Mizoramah Donald Trump ãtchilh kan awm tan tawh niin a lang. Hripui lêng kãrah November 3, 2020-a US President inthlan lo awm tur chungchang sawi rik a awm tel chho nak nak reng a; a ri a ring tial tial a, Republicans tan lam leh Democrats tan lam an awm tih a hriat theih a. Thenkhat erawh President chelh lai Dobald Trump leh a khingtu tur Joe Biden-te mimal zawnga tan hrim hrim an awm bawk a. Zofate zingah Trump-a tantu erawh kan tam zawk a, thenkhatte phei chuan a hmingpum pawha ko phal lovin TRUMP-PUIA ti hialin kan ko va, Joe Biden erawh Joe-puia emaw Bai-puia ti emawa ko an awm ve lêm lo.

US inthlan a hnai tual tual a, khawvel huap leh Mizoram thlengin Donald Trump tlinleh theih nan Missionary leh thuriltu ropui tak tak, tawngtãi khãwl  chihrang hrang, pastor rual leh kohhran upa rual, rawngbãwltu lãr tak takte an tawngtai chur chur a; kei ngei pawh Trump-a tlinleh theih nan ka tawngtai ve nual hman. Ka tawngtaisak chhan ber pawh Khawvel kristiante zalênna atan leh abik takin Pathian hnamthlan Israel fate thlavang hauh ngamtu Pa huaisen hruaitu awm chhun a nih vãng a ni.     

August 3, 2020 a lo thlenga Pathianin mak tak maiin Nl. Mimi hnenah US Sorkar inthlãk danglam tur thu a rawn hriattir a. Zoram khawvêl leh Zoram pãwn, Zohnahthlak awm tawhna chin chu; chu chanchin mak danglam tak chuan rang takin a dêng chhuak nghal thuai a. Trump-puia tantute chuan kan awi thei lova, kan thin a ur a, ãnchhe tinrengin kan ãng bawrh bawrh ni berin a lang,   Nl. Mimi thlavang hau tawk lah bo lo. Ãwn lam bik nei tan chuan hriat thiam har tak tur rêng a ni. Mahse, Pathian ruahmannaah kan tel pha dêr si lo.

November 3, 2020 a lo thlenga an han inthlang ta a, amah Trump-a pui roh lah chuan result chiangkuang awm hma hmain twitter kaltlangin US president 46-na atana tlingah a inpuang thuai mai a.   Mizorama a cousin ni ãwm taka ngaih theih pa fing fel tak pakhat lah chuan a vote hmuh zãt zawng zawng nen a lo support thuai bawk a (chawngkhūm dãn tlãng huat loh). Nl. Mimii thupuan chu dãwt hulhualah chantir tum ni ãwm takin Trump-puia vua leh vang laina zawng zawngte  chuan - Zãwlnei der Mimii ti hialin kan deusawh zui ni hialin a lang a; Pathian mi tãn lo phei chuan a tuartu tãn dawh theihna neih a harsa viau ta ve ang. Mahse, Nl. Mimi erawh a zãm lem lo, Pathian remruat leh ruahmanna an hriat loh vang maiah a ngai lek fang a, a fakawm takzet a ni.

Hun danga inthlan ang lo takin Result chiangkuang awm hlei thei lovin a buai nuai nuai niin a lang a, rorel lai leh eptu lamin chak zawk nih inchuhin law court-ah thubuai thahnem tak theh luh a ni a, rolrel laiin Trump-a tlingah ngaiin lehlamin Bidena ti rêng rêngin result mumal awm thei lovin Dec 8 &:Jan 6-ah tihte kan chhuanlam tawn sek reng a, Mizoram lama Trump-a cousin leh a chhungkhat lainate phei chuan Dec. 8, 2020-ah Trump-a tling ngei turin kan ngai a, kan ngaih ang a nih loh hnuah Jan 6, 2021-ah chiang taka Trump-a nemngheh a nih beiseiin kan sawileh hluai a, Capitol buildiing luhchhuahin buaina a chhuah hnuah pawh Biden-a nemngheh a ni zuileh ta daih a; heti chung hian tun thleng pawhin Martial law hmachhuanin kan la tang tang a, Trump-a lah inhnuhhniam  tum nahek suh, Biden-a lakluhna tur inkhawmah tel ve a tum loh thu a la sawi tak deuh deuh a; thil mak tak chu niin a lang. December 8, 2020 khan Trump-a hian a chak lohna lungdam takin pawm ve tawh mai se'ng chuan tun ang êm êm hian a amah leh amah a in degrade lo tur

Engkim tan hian hun ruat a awm a, van hnuaia thiltih zawng zawng tan hun remchâng a awm: (Thuhriltu 3:1) a bãk chhiar zel phei chuan a chiang tulh tulh a, tu sawisêl leh dodãl rual a ni lo.  Ramhruaitute pawh Pathianin  an hun tur ang zela a ruatte an ni. Nl. Mimi thupuan pawh hi Pathianin a ruat lãwk anga thleng tur a hriatlãwktir a ni mai. Trump-a tling turin kan tawngtai ngawrh hle a, mahse Lalpa'n a negative zawngin    kan dilna a chhang a ni mai a, tun thleng thlenga engmaw ti tia la laltirleh talh tum hi zawng bansan hlauh tawh chi a ni. Zaithiam Joseph Zaihmingthanga hlaah- Pathian hnena tawngtaina chu, duhthusãm mai mai a ni lo; Dil leh sawi nawn fo pawh a ni lo, Thlarauva Amah pãwlna a ni e" tih tawngtaina hla a  sak hi ngun takin i ngaihtuah teh ang u. Pathian hnenah kan duhthusãm ber Trump-a tlingleh turin kan dil a, a hlawhtling lo a nih chuan kan dil dik lo pawh a ni mahna, Bidena a tling ta hlauh a , lungdam taka pawm thiam ve mai tur kan ni. Naupang chumchiap anga thil awm lo ngên rual lah kan ni tawh hek lo. Trump-a duhtu ni tho mah ila, kan tihdan lutuk hi zawng a ninawm zozai ta e.

US hian President 46 a thlang tawh chung zingah chuan President Trump tiam lovin mi 7 laiin term khat theuh an lo chelh tawh a, tuna taka hriatthiam loh viau ringawt hi thil tih chi pawh a ni lova Pathian dodalna a ni tawh hial mai thei. Chung term khat chauh chelhtute chu Trump-a tiamin heng mte hi an ni:

1. Rutherford B. Hayes 19th • March 4, 1877 – March 4, 1881  
2. Benjamin Harrison 1,461 23rd • March 4, 1889 – March 4, 1893 
3. William Howard Taft 1,461 27th • March 4, 1909 – March 4, 1913  
4. Herbert Hoover 1,461 31st • March 4, 1929 – March 4, 1933  
5. Jimmy Carter 1,461 39th • January 20, 1977 – January 20, 1981 
6. George H. W. Bush 1,461 41st • January 20, 1989 – January 20, 1993 
7. John Adams 2nd • March 4, 1797 – March 4, 1801 
8. Donald Trump 1,452[l] 45th • January 20, 2017 –Jan 20, 2021
  
Khawi ramah pawh hruaitu an inthhlãkthleng fo, tun tuma USA hruaitu inthlãkthleng pawh hi Nl. Mimi puan lãwk vang ni lovin Pathianin engkim tana hun A ruat lãwk tawh chu a takin a lo thleng a ni mai. Donald Trump-a hun a awm a, Joe Biden-a hun a lo awm veleh ta a ni mai. Hma lam huna USA leh khawvvêl awm zel dan tur chu Pathianin a rawn rêl fel zêl mai ang. Pathian remruatna leh rorelnaah kan tel ve lo a ni tih hi i pawm thiam ang u.

Post a Comment

Powered by Blogger.