MARTIAL LAW
Martial Law by PC Lawmkunga Retired IAS - FACT CHECK
USA President inthlan kan ngaihven azârah martial law hi kan lam zing ta malh malh hle mai a. A chhan hnâivai té pawh November 3, 2020 inthlana  che chhe zawk Donald Trump-a chan á¹­hat lehna tûr ni-a  ngaitute thunawn ber a nih vâng a ni. Kha inthlanna kha  ram dang Sawrkar inrawlhna hmanga tihchingpen a nih avangin martial law hi Trumpa hian puang thei niin an ngai a. Martial law puan  a nih chuan abul atangin an inthlang á¹­ha leh ang a, Trump-a hi a tling leh dawn a ni, tiin duhthuléng an sâm nasa hle. Chuvangin martial law chu eng nge a nih a, puan a lo nih chuan eng thil te nge a nghawng ang tih hi tawi tein i lo ngaihtuah ho teh ang u. Kan ziak kim séng dawn lo va, kan hre kim séng bawk lo ang a. Mahse chhiartuten ngaihdan mumal kan neih phah theihna khawp tur chu sawi thei tûrah i inngai phawt teh ang.

MARTIAL LAW CHU ENG NGE NI? Mizo á¹­awnga sipai rorélna kan tih mai hi a tawi zawng chuan mipui aiawh te rorelna (civil administration) dah bova sipai rorelna hmanna leh dân pângngai (civil law) hman theih lohna hi a ni.  Chutiang rorelna chu sawrkar paih thlâkna coup de’tat (kû deta) avangin a lo thleng thei. (Pakistan 1958, Thailand 2006, Egypt 2013). Ram pum emaw ram bial khawii lai bikah emaw dan leh hrai hman that theih loh khawpa buaina a lo awmin a hman theih a. Ram pum or khawii lai bial bik emaw chhiat rupna (natural disaster) avangin a hman theih bawk. Kum 1941 December 7-a Japanese air force te’n Hawaii State-a Pearl Harbour an beih vak khan martial law puangin Hawaii State inawpna chu sipaiin an la hmiah a, civil administration leh court a awm thei tawh lo va, kum thum chhûng chu military Governor kutah engkim a awm ta zawk a nih kha. Chutiang chuan martial law hi USA ah hian vawi 68 hman ni tawhin ram puma hman ai mahin ram bial khata hman a tam zawk daih nghe nghe a ni. American civil war (1861-1865) lai khan an hmang zing viau bawk. Sawi tak ang khian martial law hman a nih chhung chuan civil court zawng zawng khâr vek a ni a, Military Tribunal chauhvin thubuai hla buai a ngaihtuah dawn a ni. Martial law an hman hnuhnûn ber chu kum 1963 Maryland State-ah a ni a.  Cambridge khawpuia mihâng leh mingo inepna vang a ni.

Mak ang reng takin USA Constitution tawite Article 7 chauh neiah hian “Martial law’ hi a hrana sawina a awm hauh lo va, President thuneihna Article II-ah pawh a lang lo. Hei vang hian martial law hrilhfiahna leh a hman dân turah hian dan hre mi (jurist leh constitutional expert) te thu a rual thei vak lo. USA Constitution Article II-a USA President chu Army leh Navy Commander –in-Chief a ni ang, tih pawh hian civil rorelna a khawih pha lo, tiin Justice Jacksona chuan a sawi a. (Joseph Nunn 20.8.2020 USA Today ). Chief Justice of SCOTUS hlui Salmon Chase-a chuan kum 1866 daih tawh khan martial law hi President-in a duh hun hunah a puang thei lo va, Congress remtihna a la ngei tur a ni, a ti bawk. (ibid).

ENGVANGIN NGE TRUMP-A HIAN MARTIAL LAW A PUAN LOH? Thahnemngai taka tawngtaisak hialtu Mizote duh ang hian engati nge Trump-a hian inthlannaa a lehthal (overturn) theih  nan martial law hi a puan lawk loh? A chhânna chu a chungah khian kan hmu nghâl mai âwm e. USA President hian ama mimal hamá¹­hat nan martial law a puang thei miah lo. Mi thiamte chuan Congress remtihna (authorization) a nei tur a ni, an ti. Congress remtihna lohvin lo puang lui se, a hnu-a court-a khin a nih chuan amah a buai zui dawn a ni. Congress phalna (authorization) pawh neiin Court-in lo remtihpui (uphold) pawh ni raw sek sek, President thiltih apiang hi Constitutionin a khuahkhirh tlat bawk a ni. Kan sawi tawh ang bawk khian Constitutiona commander-in-chief tih khian a duh duhin sipai te ama mimal hamthatna turin a hmang thei tihna a ni lo bawk. Engkim hi dân hnuaiah mumal takin a inzep thlip thlep a ni tih kan hriat a tha ang. Tûn lai hian USA lamah chuan martial law hi an sawi ve lo a niang, mainstream media ten an chhuah lo êm mai. Aizawl veng khawi lai atang emaw-a rawn irh chhuak mai a nih hmêl e. Trump-a hian amah tantute rin angin ‘trump card’ pawh a lo hûm lem lo a ni ber âwm e. Chutih lai chuan mi thenkhatin Trumpan Insurrection Act 1807 a puang a, hei hi martial law hmahruaitu a ni, tiin thu belhchian dâwl  lo an lo sawi leh mêk a.

INSURRECTION ACT 1807 CHU ENGNGE NI? He dan hi tualchhûng helna (insurrection) emaw, buaina dang rêng rêng emaw tudai tura sipai hmang tura President thuneihna dân a ni. Sipai kan ti zêl mai a, mahse he Dân hian raldo mi tak tak sipai te a sawi lo. National Guard te koh chhuah theihna dan chu Insurrection Act hi a ni. Kum 1992-a Los Angeles buainaa an hman kha a hnuhnûng ber a la ni awm e. Mi tam takin martial law nen an ngaih pawlh fo mai. Hmanni-a Capitol-a an buai vakna angah te khan he Dan hi hman theih tur a ni. National Guard kum 1636-a din te hi lei lam sipai leh air foce inpawlh mi nuai li leh singnga zeta tam an ni a. Sipai raldo mi pangngai ni lovin sipai khêk, (Reserve Force Militia) a tûl huna koh chhuah theih chi an ni. An zinga a chanve vel chuan buaina chinfel tur  a awm loh lai  chuan civil hna te an thawk kual mai mai bawk.  Vawiina khuti taka an buai chung pawh khuan he Dan hi hman a la ni lo. Tuna National Guard 15000 vel zet Washington DC-a inkulh mek te khu January 20-a Joe Bidena inauguration huna buaina a awm lohna tura vêngtu tura dah luh an ni. January ni 6-a Capitol beih a nih avang khan Sawrkar a inrâlring hle a ni tih kan hre vek awm e. Mizo te zinga ziaktu lâr tak  pakhat chuan Trump-an Insurrection Act a sign ta ni-a sawiin a dawt leh chu martial law puan zui ni turin a ngai hmiah mai. (Date 14.1.2021 article “Trump-an Insurrection Act a sign ta” tih kha en lêt leh la). Vawiin thlengin he Dan hmanna thupek chhuah hi kan la hmu si lo chu a nih hi!
Tuna Washington DC leh a chhehvela emergency an puan khu Stafford Act 1988 dungzuia inrâlrinna puanna  a ni mai. An inralrin chhan pawh kan sawi tawh bawk khi. Martial law a ni lul lo ve.

Social media pakhat Parler hian @TeamTrumpNews account (lem?) hmangin Trump-a thusawi ni âwm tak, “Democrat leh Republican thenkhat te, FBI, DOJ, CIA leh CCP te hian USA leh a Constitution rahbeh an tum  avangin Insurrection Act 1807 hi ka puang e. Tualchhûng misualte man vek an nih hma chuan President ka ni reng dâwn” tih an tarlang a. Mahse hei hi Reuters-in 12.1.2021 a fact-checking a tihnaah chuan thudik hauh lo a ni tih an hmu chhuak leh si a ni. Trumpa hian he Dan  hmanna tur hi a puang hauh lo, tih hi Reuters News Agency chuan a sawi chiang hle. Chuti chung pawhin Trump-a tantute hian kawng an la dap zel a. Trump-an martial law a puan theihzia sawi nana  an dan chelek pakhat dang chu Executive Order 2018 an tih chu a ni.

EXECUTIVE ORDER 2018 AN TIH CHU ENGNGE NI?   USA-a inthlanna reng renga ram dang inhnamhnawihna a awm chuan he executive order 2018 hmang hian martial law Presidentin a puang thei, tiin an sawi darh leh chiam a. Hei hi enzui hlek a tha âwm e.

Donald Trump hian kum 2018 chhûng khan executive order (E.O.) 37 laia tam hming a ziak hnan a. Chung zinga pakhat chu E.O. No 13848 dated 9.12.2018 hi a ni. He orderin a tum ber chu, “USA rama inthlanna reng rênga ram dang  inrawlhte chunga hrêkna (sanctions) hman dan tûr” tih a ni. He thupeka  a sawi tlângpui chu hei hi a ni. Inthlan hnu ni 45 aia tlai lovah Director of National Intelligence in USA inthlannaah ram dang mi (foreign agent te) an inrawlh leh rawlh loh a thlithlai fel vek ang a. A report chu Secretary of Treasury-ah pein ani chuan Secretary of State, Attorney General leh Homeland Security Secretary te a sawipui ang, tih a ni. Chutianga finfiahna a awm chuan chutiang agent ruaitu ram chu an sumdawnna te leh an export license te tihtawp sak bakah an sum chêt velna (loan and credit) leh an pawisa thawh chhuah (foreign exchange) pawh tihtawp sak tur a ni, tiin President hnenah rawtna (recommendation) an pe lut ang, tih mai a ni. Martial law lam nen inkaihhnawihna rêng rêng he E.O hian a nei lo. Inbum kan tum rei ngat ngat hle mai!

THUTAK ATANGA HRUAIBOVA AWM TE:   USA Sawrkarin Joe Bidena chak zâwka a puan hnu leh khawvel sawrkar tam takin an pawmpui vek tawh hnu-a helai ram kilkhâwra Mizo tlemtein, “A chak dan a dik lo, kan pawm lo, Trump-a tân chak zawk a la nih theih” ti-a pûk lehlâng thu lo vawrh sek te hi thutak atanga inhruai bona a ni. Mizote hian tun hmain Joe Bidena an hre lo, chuvangin tuma’n an á¹­an ngawt lem lo. Chutih laiin Trump-a á¹­antute thahnemngaihna azarah Joe Bidena hi a leh a lingin  a lo lâr ve ta deuh mai a ni. Ringtu dik tak kâ atanga chhuaka mawi lo khawpa a chhe tinrêng bela mawgkawhur, eirû, mi tham ching ti-a Bidena sawi bawrhbânga, Trump-a hi pathian hriak thiha  chhuah ngawt mai hi tam takin (k)an pawm miah lo tih hi hriat a tha. Khulama mite hriatthiam tur á¹­awng hmang ni phei se salam chawina lek lek tur hi an sawi tam hle a ni. SCOTUS-a judge 9 zinga 6 chu Trump-a lam tang an ni a, a lawsuit a tlang ngei ang tih rikngawt te phei kha chu court hmusitna contempt of court awrhna tham a ni ang. Trump-a hi Mizo tuma’n an haw lo, a dik chiah chuan a President kum li chhunga a hnathawh á¹­hatte kan ngaisang vek. Atawp lamah a che foul ta deuh mai pawh a ni.   Trump-a tantute zingah hian mi pangngai tak tak, a chak lohna pawm mai thei leh heti taka a sapatâl hi duh bik lo an tam tho mai. Chutih lai erawh chuan mi tlêm te, chhiar zau leh chinchang hria lehkha pawh thiam tak tak, “Trump-a vawih chu ka vawih” ti an awm a. Sâp leh Mizo zawlnei thupuan nena an á¹­an kawh viau pawh hian eng  an ang thei chuang si lo chu a nih hi. Martial law an puang tawh, Insurrection Act ah hming a ziak tawh, Executive order hmangin martial law a puang thei tih vel dik lohzia hi hria kan awm teuh laiin an bum theih  an la tam em em mai hi a manganthlâk takzet a ni. “Dâwtthulêng lakah i fimkhur ang u” tia thuziak (14.1.2021) thehdarhtute hi dawtthulêng lakah an fimkhur lo hle zawk niin a lang. January ni 20 ah pawh Joe Bidena hi jaila lût zawk turin an la sawi peih fo a nih hi.
Engpawh nise, hunin a rawn hril zêl tûrah ngai phawt ila.
Kar tawp hman nuam ule.

P.C.Lawmkunga  Jan 15, 20121

Post a Comment

  1. Nice post. Thank you for posting!
    Mcdonalds Coupons

    ReplyDelete
  2. On the net rap sheets Athens-Clark County arrests, checks are really liked, nonetheless packed with issues along with threat. Whether you are trying to find someone's previous court looks, driving offenses, as well as even if they have a history of household physical violence, you need to have the capacity to perform an authorized, personal & official search to uncover one of the most efficient information practical pertaining to someone.

    ReplyDelete
  3. If you need a Family Law Solicitor then why not see if Lees Solicitors can help you? With many years of experience and a confidential and professional service, divorce solicitors free consultation

    ReplyDelete
  4. A patient advocate is an intercessor who speaks on the behalf of the patient, and at times the patient's family. A patient advocate can be a professional or he or she can be a family member or friend of the patient. legal consultant dubai

    ReplyDelete
  5. This comment has been removed by the author.

    ReplyDelete
  6. Presently with the distinctions and segments of criminal law, there are a few classifications in criminal lawyers.
    stephenjackcriminallawyer

    ReplyDelete

Powered by Blogger.