DARLUNG KHAW CHANCHIN

Kum 1906 khan Kristian hmasa Khuma leh Khara ten chanchintha hrilhin Darlung (Thakthing a awmlai) khua an lut a. Chuta Kristian in pe hmasa ber chu Saihela a ni a, tahrik ni 15.3.1906 khan a in pe a ni. Kum 1907-ah Tlawng thlang Bialtu Pastor Phawka'n a Baptist a ni. Tichuan, Darlung khua Kristian hmasa ber chu Pu Saihela a ni ta a ni. 

Kum 1912 - ah Tirhkoh Zahlira puih nain Sunday School din a ni a, A, AW... te zirin bul an tan a, Kristiante an pung chak hle a ni. Darlung hi tuna Darlung khaw hmun taka a awm hma hian Darlung ram chhung tho, Thakthingte leh Herhse khaw hmunah te awmin Kohhran din tan leh Chhanchintha hrilh tantirhna pawh Thakthing leh Herhse khaw hmuna awmlai hi a ni a, tuna Darlung khaw kai hun chiah hi kum 1922 kha a ni. Kohhran Upa hmasa ber chu Chhawnthangliana, kum 1922 a an nem ngheh tak kha a ni. 

Zoram buai avangin khaw sawi khawm a ni a. Heng khua te hi sawi khawm an ni - Bawlte, Rallen, Bunghmun - te hi kum 1968 ah hruai khawm an ni a, an vaiin Biak In khatah inkhawm a ni a. Kohhran chu mumal zawka a kal theih nan Committee te din a ni a ; Chairman - Pro. Pastor ZT.Sangkhuma, Secretary - Pastor K.Lalbiakvela te an ni. Kum 1972 ah hruai khawm kir leh an ni a, Bawlte Preaching Station chu Darlung Kohhran in a enkawl a, Bunghmun erawh chu pawl dangah te an inthen darh avangin enkawl zui theih a ni ta lo a ni. 

Kum 1987, Synod Inkhawmpuiin Kanghmun Pastor Bial chu Bial 2- Kanghmun Bial leh Darlung Bial ah a siam a, Darlung Pastor Bial vawng tur hian Pastor B.Vanlalnghaka chu ruat a ni. Pathian awmpuina leh kaihhruaina hnuaiah Darlung Kohhran chu kal chho zelin, tunah hian Kohhran Upa pariat (8) - Upa. H.Thansiama, Upa.K.Laltawna, Upa B.Lalringliana, Upa.B. Kapthuama, Upa. H.Lalhmingliana. Upa.H.Vanlalzama, Upa.R.Ramdinliana, Upa.K.Rohmingliana te leh Tual chhung Upa Pali (4) - T.Upa.R.Lalchhuanmawia, T.Upa.J.Ngurchhuana, T.Upa.Ngurchhawna, T.Upa.Lalliansawma te neiin, Kohhran In : a hlang - 125 leh inawmpawlhna In - 16, a vaiin 141 kan awm mek a ni. Tin, Kohhran mi zawng zawng hi mi 749 niin, Dan zawh kim (Dan chhung a awm mek) - 497 kan ni a, Sunday School ah hian Zirtirtu mi - 60 leh zirlai - 571 kan awm mek a ni. 

Tin, Darlung Kohhran atang hian Missionary kalchhuak 6 kan awm ve a. Chung mite chu - Pu Robert Zoramchhana s/o T.Upa J.Ngurchhuana ( Evangelist Teacher, Salem Boarding), Nl.Lily Parmawii d/o T.Upa R.Lalchhuanmawia (Evangelist Teacher,Tuipuibari-II), Nl.Lalduhmawii d/o Upa H. Lalhmingliana ( Evangelist at Barak Area, Bontarakpur), Nl. Kross Tlanmawii d/o Upa B.Lalringliana ( Evangelist Teacher, Arunachal Mission Field), Nl.Lalliantluangi d/o J.Thanliana (L) ( Evangelsit Teacher, Diphu ) Pu Zairemmawia s/o Rosanga ( Masihi Evangelist, Lunglei) te an ni. Heng bakah hian kan Kohhran mi leh sa, remchan zawkna avanga Kohhran dang hminga kalchhuak te mi 4 an awm bawk. Chungte chu : Pu Lalthanpuia h/o Lalramengi Sailo (Masihi Evangelist, Electric veng Aizawl), Pu K.Ronghaka s/o Upa Biakmawia (L) (L.O Mizoram House, Silchar), Pu R.Lalringliana s/o R.Chhunkunga (Evangelist Teacher, Arunachal), Pu Lalthanthuama s/o Thangzuala (L) ( Evangelist Teacher, Assam Field) te an ni. 
DARLUNG KHAW CHANCHIN
Chhimthlang Presbytery InKhawmpui Vawi - 58 na, Puipate :
REV.R.LALHMANGAIHA Kohhran : Reiek Pianni leh kum: 27.3. 19.. Pa Hming : Lalpiangruma Nu Hming : Hlawnkungi Unau zat : 4
UPA H.VANLALHUMA Kohhran: Kanghmun Pianni leh kum : 24.4.1966 Pa Hming : Chalzika (L) Nu Hming : Zamawii (L) Unau zat : 10 Nemngheh kum : 2000
UPA C.CHAWNGTHANGA Kohhran : Reiek Pianni leh kum : 1.3.1958 Pa Hming : Thangseia (L) Nu Hming : Lalthlamuani Unau zat : 7 Nemngheh kum : 2001
UPA P.C LALLUNGMUANA Kohhran : South Sabual Pianni leh kum : 8.3.1949 Pa Hming : Saitluanga (L) Nu Hming : Selthangi (L) Unau zat : 13 Nemngheh kum : 1997
UPA R.RAMDINLIANA Kohhran: Darlung Pianni leh kum : 17.4.1972 Pa Hming : Rosanga Nu Hming : Lalremi 

Darlung khua hi Mizoram khawthlang lama awm niin, State Capital (Aizawl) atanga 56 kms a hla a awm a ni. Mamit District huam chhungah rin luh niin MLA Constituency-ah chuan Dampa Bial ah rin luh a ni a, Mizoram lui lian/sei ber Tlawng lui leh Tut lui inkara awm a ni. Aizawl atanga Darlung kal tur chuan Kulikawn-ah chhuak la, Aibawk khua i pelh chiahin khawthlang lam kawngah peng la, Tlawng lui i kan hnuah chho zawngin i tlan/kal leh vang vang anga, Bawngthah khua i pelh hnuah thui lo te i kal leh ang a, Darlung chu i thleng mai dawn a ni. Reiek lam atanga i kal duh a nih pawhin- Reiek,W.Lungdar,Lungphun-Hreichuk, Kanghmun leh Bawlte i pelh hnuah i thleng mai ang.Tunah hian Darlung-Aizawl Sumo Service pali a awm a.Darlung la hmu ngai lo, hmu duh ve te tan chuan Kulikawn/Ngaizel a an counter-ah ticket ngaihven mai tur a ni.

DARLUNG KHAW CHANCHINDarlung khua hi hmanlai Mizo Lal hmingthang leh ropui ber ni a an sawi thin Lallula Sailo lalna khua a ni a. Rolura thlah Sailo Lal te zing mi Lalburha thlahte lalna hmun niin Darlung Lal hnuhnung ber chu Rozinga a ni. Mizoram khua te zingah khawhmun upa pawl tak nimahse, mei mit lova luah ngar ngar a ni lova. Ral hlau emaw, insuan chhuah duh vang hrim hrima a khaw awptu Lal ten an chhuahsan leh thin a ni a. Mei mit lova tun (2009 AD) thlenga a awmna hi chu 1922 AD kha a ni. Kum 1780 vel bawr a khaw hmingthang tak thin khan Centenary hmang tur chuan meimit lova a awm hun chhiar a ngaih si avangin kum 2022 AD khian Centenary a hmang thei chauh dawn a ni. Kum 1780-1807 AD vel bawr chho khan, Lallula Sailo awpna hnuaia a awm laiin Zofate chenna zawng zawng tih theih deuh thaw deng chhuak Chai Hla hmingthang 'DARLUNG ZAI' an tih chu a lo chhuak a. He Chai Hla hi a hun lai chuan Duhlian tawng hmang ho chuan an sa thei vek ang tih theih khawpin a lar a ni. Tin, hetih hun lai atang tawh hian 'Darlung Thinglian' an tih chu mi te hriat lar a ni a, tunah he thing hi thi tawh mahse mita hmutute leh khualzin/sawrkar mi pawimawhte sawi danin he thing hi Asia rama thing lian ber an so fo ai hian a lian zawk! Tunah a thing bulin a thut chin hi hmuh theihin a la awm. He thing hi a len em avangin hla te pawh an phuah chhan nasa thin hle a ni.

Darlung khua hi a khaw hmun diktak/hmun hlui lam chua tlang thawveng nuam tak, zotlangsang boruak dik tak hip theihna hmun a ni a. Tunah, hemi hmunah hian a khaw mi engemawzat la awm tho mahse kawngpui dung in chhungkaw engemawzat chu veng tlafual lamah an insawn thla tawh.

Darlung khua hi Lal ban kum atanga Zoram buai hun(1966) vel thleng kha chuan a khaw chhehvel te lakah pawh lian lo pawl tak a ni thin a. Zoram buai vanga khaw khawm a lo nih khan Dengsur,Bawngthah,Bawlte,Rallen,Bunghmun te chu Darlungah hian sawikhawm an ni a. A bul maia awm S.Sabual erawh inzawm deuhthaw renga awm an nih avangin leh remchan zawkna avangin khawm tel an ni ta lo. Buai zualpui a lo reh khan khawkhawm avanga Darlunga khawsa chhungkaw engemawzat chu kir leh mahse Darlung chu a khaw chhehvel te zingah khaw lian ber nih chan changtu a ni ta reng a. Administration Officer (A.O) thuthmuna siam a nih tak avangin khaw pawimawh tak a lo ni chho ta bawk a. Ram buai reh hnu, AO tihbo a nih hnuah pawh a pawimawhna a hloh thei tak tak tawh lova. Kohhran (Presbyterian) lamah Pastor thuthmun a lo ni ta zel bawk nen, khaw pangngai tak angin a thang chho ve ta zel a. Zirna lamah High School thleng awmin, Mizoram khua te zinga High School pawh a nei hmasa pawl niin kum 1972 khan an din daih tawh nghe nghe a ni.

Tunah hian Darlung khua hi In 200 vel bawr niin, Buarpui-Rawpuichhip kawng laih mekin a tan tlang a, Aibawk-Darlung hi Aizawl kalna atana an hman ber erawh a la ni rih. Mizoram khawthlang lam khuate hi a len loh hlawm em avangin Darlung khua hi a awmna khaw chheh velah chuan khaw lian nih chan chang ve a ni a. Serthlum thar chhuah lamah a hmingthangin Aizawl bazar a Serthlum hralh kal ber chu Darlung Serthlum a ni. Tin, Co-operative Society hi rei tak ding tawhin khaw mipuite mamawh engkim mai an zuar a, India President hnen atanga lawmman dawng khawp hialin Darlung Service Co-operative Society hian a thawk tha a, Mizoram ah 'a ber' nihna a hauh fo tawh a ni. Co-operative tha taka a ding reng thei hian Darlung khawtlang mite inlungrual thiam zia a tilang chiang hle awm e.

Post a comment

Powered by Blogger.