SERCHHIP BIAL BY ELECTION VOTE THLAK HUN DARKAR KHATIN PAWT SEI
16th April, 2021 (MSR) : Naktuka Serchhip bial MLA by election neih tura vote thlak hun chhung atana ruahmanna awm sa chu darkar khatin pawhsei a ni.
Election Commission of India (ECI) chuan nimin khan thuchhuah siamin, Serchhip bial MLA by election neih tura vote thlak hun chhung zing dar 7 atanga tlai dar 6 thleng tura ruahmanna awm sa chu darkar khata pawtseiin, vote thak hun hi zing dar 7 atanga zan dar 7 thleng a ni dawn ta a. An thuchhuah siam ah chuan vote thlak hun chhung an pawhsei chhan chu Chief Electoral Officer, Mizoramin inthlan hun pawtsei tura ziaka a thlen bawhzuina a nih thu tarlan a ni.
Vote thlak ni hi inrinni a ni a, hemi ni hi kohhran thenkhat Seventh Day Adventist, Church of God, Assembly of God te ni serh a ni a, sabbath serh ten vote an thlak theih nan hian ZPM party pawhin zan dar 7 thleng vote thlak hun hawng a, vote thlak tura ruahmanna awm sa chu darkar khata pawtsei turin Election Commission of India an lo ngen tawh bawk a ni.
Serchhip bial bye-election neih tur atana inthlanna buaipuitu turte chuan vawiin hian an duty na hmun tur an pan dawn a. uahman lawk ang chuan Serchhip bial assembly bye-election neih tura duty turte hi vawiin chawhma lamah randomisation neiin an kalna tur polling station tifelin, inthlanna a hman tur lehkha pawimawh leh vote thlakna khawl te chu pekchhuah nghal an ni ang a, hemi hnu hian polling party te hian an duty-na tur an pan zui nghal dawn a, polling party chhuak hmasa ber turte hian chhun dar 12-ah Serchhip DC pisa atangin an chhuak dawn a ni.
Puan tawh thin angin, Serchhip bial MLA by election chu naktukah neih ani dawn a, vote tla te hi May ni 2 ah chhiar a ni dawn a, he inthlanna kaihhnawih thil hrang hrang chu May ni 4 ah zawh fel hman vek tur a ni. Inthlanna neih turah hian Vote nei mipa 9191 leh Hmeichhhia sing 1,0329, an vaiin mi sing 1 sang 9 leh 520 anni a, mipui te vote thlakna turin polling station 29 buatsaih a ni.
~Vanneihthanga Vanchhawng
Post a Comment