ROMALSAWMA LEH VANROMAWIA TEN KEIN SIAHA AN THLENG

ROMALSAWMA LEH VANROMAWIA TEN AIZAWL ATANGIN KEIN SIAHA TLUANG TAKIN AN THLENG

16th April, 2021 (MSR) : Aizawl-Siaha Kilometer 301.6 vela thui ke-a kal turin Zotrek member pahnih Romalsawma (Roma) Mission vengthlang leh Vanromawia (Vana) Bawngkawn te hian April ni 6 zing khan Aizawl an chhuahsan a, tluang taka kalin nimin April ni 15, chawhnu dar 2:50 vel khan Siaha khawpui an kal thleng.

Roma leh Vana te hi an kalna kawngtluanin miten an lo hlut hle a, ei tur leh an mamawh hrang hrang an lo tih sakin pawisa thlengin an lo pai hlawm a, an chunga thatna lantirtute zawng zawng chungah lawmthu an sawi a ni.

Romalsawma leh Vanromawia te kal tur hi April ni 6 zing dar 7 khan AMC Councillor David Zohmangaiha’n Vanapa Hall tual atangin a vailiam a, an pahnih hian kawng laka an mahmawh tur hrang hrang kg 20 vel ve vea rit an ak a ni. Siaha-ah hian Siaha district MJA ten lo dawngsawngin, Siaha press club-ah anmahni lo lawmna hun an buatsaih a, zanriah an buatsaihsak bawk.

February ni 3-4 chhung khan km 78-a thui Aizawl-Kolasib chu anni pahnih hian ke-in an lo kal tawh a. Kea zinkawng thui zawk zawh turin nitin km 15 atanga 20 te ke-a kalin an inbuatsaih thin thu an sawi a. 

Kan taksa hriselna hi keimahni ngeiin kan thawhchhuah a tul tih an thalaipuite hriattir chu an tum pakhat a nih rualin, "Thil tum lian tak nei la, chu chuan chhelna leh tumruhna a pe ang che" tih chu an thu ken a ni.

Hun remchang hmasa berah Aizawl to Champhai kea kal leh an tum thu an sawi.

Thu belh : Romalsawma hi Mizo hla phuah thiam lar, Rukunga (fam) tupa a ni a, a pu hniakhnung zuiin Roma hian hla tha tak tak a lo phuah tawh. Pathian fakna hla lar tak *Ka dai zel dawn* tih hla leh hla dang engemaw zat a lo phuah tawh a, musician niin Audio recording studio tha tak a nei a ni. 

Vanromawia hi Mizo thu leh hla lama mi ril, Pu T. Zorampela fapa a ni a, tlangval fel leh tlawmngai em em mai a ni a, mi rintlak a nih zia chu Tuisentlabung rama zan khawthim hnuaia darkar tam tak kan bo ho zan khan ka hrechiang hle a ni. 

~Vanneihthanga

[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]