Pathian thu Hriltu ropui chanchin
    Dr. ZADAWLA, MITDEL
Chhandam nih inhriat chianna ropui

Zadawla Mitdel Chanchin
Rawngbawla Chhuahna:
Kum 1955 a lo thleng a, rawngbawlin zawitein a zin chhuak ṭan ta a. February thla chawlhni vawi khatna hmangin Thaidawrah a zuk kal a, a haw chho leh a, Farkawnah chawlhni hmang tawh chuang lovin Dungtlangah February chawlhni vawi hnihna Hmeichhe Khawmpui hmangin an kal leh ta a. Chumi ṭuma amah hruaitu hmasa ber chu Farkawn khua Lalsuiliana a ni. Dungtlanga Hmeichhe khawmpuia hlim em ema an awm lai chuan amah hruaitu chu hnathawk mi a nih avangin an khaw lam panin a hawnsan a, mahse, hruaitu tur an la awm zel tho va; a Pu Thanhaia teho nen Leithum khuaah an kal leh ta a ni. Leithumah hian an Lal, Pu Lalchhuanga'n a pualin vawk a lo talh a, mak a tiin a lawm hle a ni. Tichuan, Sazepah te an kal a, chungah chuan rawng a bawl ang tih a ring tak tak lo va, khawmpuia kal vel pahin an kal kual vel mai mai nitein a inngai a. 

Sazep an han thlen chuan, "Tu khaw-in min hre lo'ng chu maw," a ti rilru a, mahse, an Upa min ber Pu Hrangrula'n "Dawla i ni lawm ni? Farkawn hlimpui laia zai hruaitu kha i ni lo'm ni," a lo ti a. "Ni e," tiin a chhang a. "Keini Sazep khua Kristian fahrah tak mai nu leh pa tam tak Pathian thu la awih si lo karah i lo kal a, thu leh hla i zirtir dawn a ni," a lo ti a. A hna tur tawkte chu Lalpan a lo pe zel mai a, mahse chung lai chuan Pulpit-a thusawi rawngbawlna neih chu a hlau hlur mai a ni. Miin hun an pek pawhin hnial lo va thu a sawi chuan khur chungin thu a sawi ṭhin a ni. 

Kraws thiltihtheihnain mipui a vel ṭap: Khawbungah Good Friday an hmang a, zanah chuan Bialtu Pastor Langlura'n thu a sawi a, heti hian a sawi a : "Vawiin chu kan nu nen 'Kalvari tlangah leng dun ila' tiin ka lo ruahman a ni a; mahse kan nu chuan a chatuan ram min lo pansan ta a ni. Keimah chauhvin Chhandamtu khawhar chu ka va lenpui ve a, ram a reh hle mai. Vanin an duh si lo va, leiin an duh bawk si lo va, chhantu nei lo Beramno ram ka'n fang chu kan nu a awm tawh bawk si lo, ram a reh a ni. Kawnga ka lo hawnnaah chuan, 'Pathian Kohhranho, Ama thisena lei, Kalvari tlanga lenpui turin ka sawm teh ang,' ka ti a," tiin Pulpit aṭangin Kalvari tlanga leng turin Kohhran mipui min han sawm a, min sawmna hla chu "Ka thla va kal ta la, Jerusalem daiah" tih hla hi a ni. Kan han sa ta a le!! Pathian khawngaihna a lo thleng rup rup mai a, Kros thiltihtheihna chuan Kohhran mipuiho chu a vel ṭap ta chur chur mai a ni. Chumi zan chuan zai leh ṭap hi a inpawlh nul a ni ber e. 

Chhandam nih inhriatchianna: Mite chu eng angin nge an awm tih a hre bik tawh lo. Ani Pu Zadawla erawh chu a thlarau chu Lal tuarna mak sawi sen loh lamah chuan a kal ta daih mai a, chuta a thinlunga lo kal na ber chu, Lal Isua tuarna nâin a na thei ang berin a rawn vaw let phawt a, ama lam a han inhmu a, "Mitdel tan a tuar ang maw, keini ang mi sual leh tenawm tan a tuar duh ang maw, mi ṭha tan tuar ni sela chuan tuar man pawh a awm ang a, mi fel aia thih ni sela chuan thih sak man pawh a awm tur. Misual tan sawti em emin na takin a tuar dawn em ni ang aw' a ti vawng vawng a. Chutia mahni a inhmuh lai chuan Krista tuarna chuan engemaw zawng takin a rawn vaw ta a.  

A thinlung zawng zawng chu Lal tuarna Kros hmaah chuan tihtliahin a awm a, "Lalpa, mi fel aiah chuan i thi a, mi ṭha aiah pawh. Keini ang mitdel, misual tenawm vang hian i thi tel ang maw, i tuar a  maw," a ti vawng vawng a. Lalpa chuan, "Ka fapa, mi sualte lam turin asin ka lo kal, mi fel lote, mi bawrhsawm zawkte tan asin ka lo kal ni. I awm angin mi pan mai rawh," tiin a rawn hrilh a. A awm angin Lal tuarna hmaah chuan a tlulut ta a, chuveleh chuan, a chhandamna ropui tak chu a hmu chhuakin a chang ta a ni. "Krista tih zawhsa rin hi chhandamna mai a lo ni," tih a han hre chiang ta deuh a. Mahse a la hriat dan chu a lo thimtham deuh hret a ni. A hnu lawkah chuan Hudson Taylor-a, China rama Missionary-a a awm laia a pianthar thu a sawi a, Krista tih zawhsa rin mai hi chhandam nih nghalna a ni tih a sawi khan, "A lo ni tak e,  Chhandamtu Krista, min tlantu a ni tih rinnaa kan pawm rual hian chhandam kan lo ni reng mai," tih kha a puang chhuak ta a ni.  

Lalpa rin mai hi Chhandamna: Chung hun lai 1955/1956 vela, "Chhandam ka ni ta" tia inpuan ngam chu mi huaisen  nih a ngai hle. An Kohhran Upate, an Pastor-te leh an mi hlim senior pui pui te, hmeichhia, thlarau lama nu vawna a lo vawn te chuan amah Pu Dawla chu hnial hi an chak ngawih ngawih mai a ni. "Kha leh chen kan lo hlim a, 'Chhandam ka ni ta,' pawh kan ti lo, i nghal lutuk. Kum hnih khat lek i rawn ti ve leu leu a, 'Chhandam ka ni ta,' te i ti a, a zah pawh i zak chai na nge, ngawi reng mai rawh, i ṭawng thei lutuk," an tih khum bawrh bawrh a. "E, keima tihṭhat vanga chhandam ka niin ka sawi a ni lo va, Lalpa tih zawhsa rin mai hi chhandamna a ni tih ka hmu a ni. Hlim rei leh rei loh lam a ni lo, minute hnih khatah a fiah mai a ni he thu hi chu," tiin a han sawifiah a. "Fa ka ni' chu ti la, 'tlan ka ni,' pawh ti la, kan la awih deuh va, chhandamna te zawng van lamah, vanramah lo chuan 'chhandam ka ni' ti thei i ni lo," an tih khum sawk sawk a. Chunglai huna an Pathian thu ngaihdan aṭang chuan a dik ve tlat mai a ni. Tlan nih hi chu an hnial lo va, fa nih pawh an pawm, "chhandam" tih hi an lo ngai u em a ni. Sual zawng zawng leh khawvel zawng zawngin mi a tihbuai phak miah tawh loh, kha mi chhandamna famkim kha "chhandam" tih  hming hian a lo keng fai veka an ngaih tlat vang a ni. Source: /- bchhangte

Post a Comment

Powered by Blogger.