Kumin January ni 9 ațang khan Sailutar kohhranah Pu James Lalramliana leh a team ten rawngbawlna neiin bul an țan a. Lalpa Crusade tiin a hming pawh an vuah nghe nghe a ni. He crusade zoramin kan hriat dan thil pahnih langsâr tak a awm a. Pakhatna chu Isua inlâr chungchang leh vantirhkoh chêtna ni âwm taka sawi te a ni a. Pahnihnaah chuan rawngbawltute lam tih tur a sawi te hi a lar viau bawk. Chu'ng chu social media lamah pawh sawi a hlawhin a video țhenkhatte chu âwih leh awih lo an awm nawk a. Mi țhenkhat phei chuan an bei na ang reng hle a. Amah pawhin hei hi a hria a ni chêk ang, a thusawina apiang deuhthaw ah ni 10.4.2021 zan thleng khan a la chhám tel a ni. Mi tam takin Sailutar kohhran dinhmun kan hre chiang lo a, an dawnsawn dan te hriat kan chak a, pastorte pawhin chhâng deuh tura nawrna a awm zel bawk a. Chuvang chuan kei pawhin he crusade chungchang hi ka mimal ngaihdan sawi ve ka duh avangin heti hian ka rawn tarlang a ni. Amah James-a berin, "Engkim mai hi ka dawngsawng thiam tawh a, keimah ațang chuan ngaihdamna vek a chhuak tawh," tiin a lo sawi tawh bawk a. Social media kaltlanga thuchah sawi țhin a ni tel bawk nen, chutah vêk chuan kan han tarlang ve dawn a ni. Amah ringlo emaw zâwnga he thu hi ziak ka ni hran lo a, thil thlen dan hrang hrang ațanga sawi mai kan ni.
SAILUTAR KHUAA RAWNGBAWLNA KALPUI A NIH DAN TLANGPUI
Pu James Lalramliana hian 2015 kuma Darlawna rawng a bâwl lai khan Sailutar kohhranah hian vawi engemawzat thu a lo sawi tawh a. Thilmak ti zawnga a rawngbawlna khân mi beng a verh deuh nge ni Sailutar kohhran hruaitute lung a lên ta tlat a. Remchâng hmasa zawngin leh amah berin he hmun hi a hriat reng tho avangin (ama sawi angin) January ni 9 ah khan a team te nen an lût ta a ni. Hetih lai vel hian tuna hmun thianghlim te pawh hi an lo siam nghe nghe. Tun țum crusade ah pawh helai hi Isua inlârna video kan hmuhna hmun kha a ni. Vantirhkoh thusawi te, Thlarau Thianghlim, khâm ațanga lo chhuak te pawh he crusade ah hian hriat tur a awm kha.
A luh tirh ațangin Synod fachuam a nihzia a sawi lang nghal a. Thu pawh a sawi țhain ringtu nun châwmna thuchah țha tak tak a sawi țhin. Chumai bakah mi thinlung hneh deuh tu pakhat chu, Sailutar khua ațanga zoram puma harhna lo thlen tur thu hi a ni a. Hei hian kohhran mipui leh hruaitute ah beiseina sâng tak a neih tir avangin țhahnem pawh an ngai hle.
Hun a rei deuh a, amah mai bakah mi țhahnemngai țawiawmtu an awm zel a. Zoram pum dêngchhuak zaithiam pakhat leh Aizawla kohhran upa pakhatin a thusawi an chhawk țhin a. Anni pahnih pawh hi Pathian hman tak an nih avangin thu pawh an sawi țha thei hle. Speaker ai mahin an sawi thiam zawk ti te pawh an awm.
Kohhran mipuite inpêkna a nasa bawk a, Biak In leh hmun thianghlima țawngțai an awm deuh reng a. A tlangpuiin zân dar 12 thlenga țawngțai leh zing lam dar 4/5 vela țawngțai țhin engemawzat an awm reng a tih theih. Tualchhung mi leh mikhual țhenkhat tlaivara țawngțai an awm deuh reng bawk. Heti khawpa Pathian âu tâ chu Thlarau malsawmna dàwn pawh an phû hle. Heng avang te hian inkhâwm boruak te pawh a țha chho phian a. Chu mai ni loin, kohhran upate an in duty chhawk țhin a. Mikhual lo thleng thar apiang te lo dawngsawng turin țhalai lamin mawh an phur bawk a. Kohhran hall, Prebyterian English Medium School ni bawk hi ze khêlho ten an luah châwt a. Thlarau Thianghlim hnathawh dik tak thlenna tura kohhran hruaitute leh mipui inpêkna hi a ropui takzet zet a ni.
MI TAM TAKIN KAN HRIAT LEM LOH THIL ȚHENKHAT
He rawngbawlna hi kohhran mipuiin an ngaihlu viau a. A chhan chu speaker ber thilmak ti theia an rinna len êm vâng a ni pakhat. Chuvang chuan mi țhahnemngaiten tualchhung mai ni lo, zoram pum hriat atan youtube ah a sermon hi an dah zel a. Chuta țanga kan hriat leh thil țhenkhat han tarlang ila.
Ni 24.2.2021 ah khan nausen a boral hlauh mai a. Chu chu speaker an hrilh hnuin a chhûngte zawng zawng pindan ațanga a chhuahtir hnuah a team member pahnih dang nen kaihthawh an tum ta a. A hrawk a ri deuh hrâwk niin an sawi a, mahse an hlawhchham hlauh mai. A hmingah Lalvantirhkohi a phuah zui ta thung a. He thil thleng hi zan lam sermonah amah vêkin heti hian a sawifiah a. "Thuthlung hluiah khan nausen thî kaihthawh thu hi a lo awm lo reng reng a, ka lo hre lo a ni," a ti.
Thilmak ropui tak la thleng leh tur a sawi zingah mitthi kaihthawh hi a la tel tho a. Mi kawh/hauh hlum theihna khawp thiltihtheihna chungchang sawi a awm bawk. Hei hi ka bulah ngei pawh nikum lockdown hma lawk khan a sawi nghe nghe a ni. Chumai bakah thing(tree) tih kûl te a la tel bawk. Isua ropuina aia thil mak hrim hrim show tumna a nih hmel viau hlawm.
Heng bakah hian ama chanchin ropui tak tak sawi lan a nei nual. A tan sawi chakawm tak te pawh a ni ang. Chûng zingah chuan khâma vawi tam tak a zuanthlak țuma Isuan a khâi chhoh ziah tawh thu leh a âwm (chest) a thirtianga chhùn tláng chunga a kawr chiah a țeh thu te, Phawngpui tlânga setana nen an din dun thu te, chutih laia van zaipawl zai leh Angel rawn thlawh thlak suau suau thu te, amaha rimtui awm reng țhin thu te, a kawr hâk țhin hatu apiang an dam thu te a sawi bawk a. Sawi vek sen a ni lo a, ani pawhin min hrethiam se. Heng thute hian ngaithlatute thinlung chu a hruai hneh hle in a rinawm. Dâwt a nih leh nih loh keini sawi rual a ni lo a. Speaker thusawi vek kha kan la sawi hi a ni.
Ṭum khat chu KȚP in hmun thianghlima ṭawngṭai tlaivar an hman țumin zan laiah a tel pui a. Amaha Isua lût in a taksa kha rawn hmang angin a insawi a, "Tute nge in nih a,?" a rawn ti ta a. Mi țhenkhat thinlungah, Isua ni se engatinge KȚP member te kha a hriat loh tih theih tak a ni a. Țhalaiin an din hual laih a, thuchah tawi te a sawi bawk. He thu hian Isua thusawi dik zia a tarlang chiang hle. Matthaia 24:4-5 ah chuan Tin, "Tuman an tihder loh nan che u fimkhur rawh u. Mi tam takin, ‘Krista chu ka ni,’ tiin keima hming chhalin an lo kal ang a, mi tam tak an tihder dawn si a," tiin.
Sailutar kohhran hruaitute hi khawpui kohhran tam takin tluk lohna an neih chu biak ina mobile lek chhuah an phal lo hi a ni. Chuti chung chuan speaker hian, a duh chuan mobile hmanga thlalak a theih thu te a sawi a. Țawngțai lai te pawhin a duh chu mèn a, thla lak tir te pawh an awm a ni. "Isua a lokal dawn a, mit lâwngin in hmu thei dawn si lo, a thlâ lo la rawh u," han tih chang te pawh a nei. Heng hi amaha thlarau thawh dan zir zel a ni. Keini sawi phâk rual loh te pawh a ni mai thei. Amaherawhchu, Pathian biak inchhung zah lo zawnga chêt lakna pawi tak a ni.
Kumin kum bul lam khan Sailutar branch ațanga bial KȚP Conference-a kal an accident hlauh mai a. Chuta a comment chu a danglam ang reng, "Vanneihthlak takin an accident hlauh a," tiin. A sawi chhan ber ni a lang chu KȚP zingah khan a rawngbawlna pawm vak lo an awm a nih hmel a. A thusawi âwih lo chu a na bera an țan zel tur thu te pawh a tel. Infuihna țha nge mawni dawn ni. A rapthlak lek lek zawk e.
Thil hriatthiam mai theih loh pakhat chu, he crusade chhima kal mikhual, haw tum tawh te hi a sawi ṭhaih ṭhin a, an châm belh phah fo mai tih hi a ni. Chu bakah khawih thlûk kan tih ang leh mi a chhêmthlûk vel hian a tlu thei lo ho chungah a thinrim emaw tih mai tur a ni tlat bawk. Speaker rilru kan hre pha lo a, hetiang zawnga mi vau hi kristiante tih atan thil țhalo tak a ni.
Dawrpui vengthara rawngbawlna a neih lai khan inkhâwmnaah pastor pathum hâu hlùm turin thu a dawng a ni âwm a. A khawngaih si a, a thei ngang lo a ni tiin Sailutarah hian a sawi bawk. Thiltihtheihna mak danglam tak neih hi ropuinaah kan ngai te pawh a ni mahna le. Eng rau tak ni ang maw, mi hauh hlum ngawt mai chu. Pathian hmangaihna nen chuan a inpersan hle mai.
Khawzâwla kohhran upa pakhat vanram kal lo tur, Thlarau Thianghlim chhuahsan tawh a hming nen lam a sawi bawk a. Heng kârah hian vanram kai leh kai lo tur hi a sawi fo mai. Vanram kai leh kai loh thu hi keini rêl pui phâk a ni lo phawt. Vanram thleng thlenga thuneihna han neih tâk mai chu a Pathian rawngbawltu dik tak sawi tur a ni ngai lo ang.
Zoramah covid hi lo lut miah lo tur leh mi pakhat rawngbawltu lâr ve tak vanga lo lût angin a sawi mauh bawk. Heng te pawh ngaithlatute dinhmun inang lo thei tak tur a ni ngei ang. Thil reng reng keimahni thlir dan hi a awm ve zel a. A hre țhelh vek vek hi chuan thil nihna dik tak pawh an sawi bo vek thei tho a nih dawn hi.
Sawi tur tam tak a awm thei ang a. Hengah hian speaker hi țhahnemngaihna pawh a fakawm e. A chhan chu pûang tura a rilrua awm kha a sawi ve mai a nih hmel. Chu bakah kan han sawi tak te pawh ama thusawi ang veka dah a ni a. Chhiartuten ngaihdan erawh kan nei thiam awm e.
CRUSADE NEIHNA KOHHRAN HI TLÊM TÂRLANG LEH ILA
Thingtlang kohhran lian tak ni lem lo mahse Sailutar kohhran hi 1912-a din a ni tawh a. Centenary pawh an lâwm hial tawh a ni. An awmna hmasa chu Tengtawng khua ti a hriat a ni a. 1890 ah khan khaw pangngai tak niin a lo ding tawh. Mizorama khaw hlun leh kohhran din hmasakna ber pawl a ni hial ang. A tawi zawngin 1988 ah khan Tengtawng ațangin Sailutarah hian a khaw pumin an insawn ta a ni.
Tlem han belh lawk ila. Hman laiin Thanghulha khua Nisapui pasalțhate chu Engpâuva hoin Maurâwpah an ram chhûak a. Suanglâwn tlângdungah hâw in Sai patuai an kâp a. A lû chu tuna Sailutar khaw hmunah hian an târ ta a, chu chu a khaw hming put chhan a ni ta a ni.
Sailutârah hian kohhran hrang hrang, Presbyterian, UPC, Seventhday, EFCI leh Salvation te an awm a. Khaw inlungrual leh kohhranah pawh Pathian thu tuipui tak khua an ni a. Revival speaker țha tak takin rawngbawlna hlawhtling tak tak an lo nei tawh țhin. Chûngah chuan a khaw púm ang pawhin an inpumkhatzia a lang fo a. Kohhran hlùn leh nghet tak an nih vang te pawh a ni ang, zirtirna dik lo lakah pawh an upate an fimkhur thiam hle țhin. Tun țum crusade ah pawh kohhranin Pathian thu tak a beiseina a sang hle a. Thlarau Thianghlim harhna dik tak, midangte tan pawh pûr châwkna tham nih hi an rilru put hmang a ni tlat a. Kohhran upate leh mipuite inpêkna a chhuanawm takzet a ni. An țawngțai nasatna ringawt pawh hian rah țha a chhuah thui hle ang.
SPEAKER HNENA THURÂWN TLÊM
He crusade speaker Pu James-a hi mihring mihrinnaah pawh pa țha, rilru tluang deuh, pa inngaitlawm a nih thu hi sawi hmaih theih a ni lo a. Amah nen pawh kan inkáwm ve fo tawh țhin avangin pa fel tak a ni. Hetia rawngbawla a chhuah hnu hian atan pawh vawi engemawzat ka țawngțai ve fo a. Rawng hi bawl zel sela, Lalpan hmang zel se tih pawh ka duhsakpui. Chuvang chuan amahin mipuite thurâwn min pek ang thoin ani pawh hetah hian thurâwn han pek ve a țha in ka hria.
1. Pathian mi hman țhenkhatte pawh hian kan hmuh hmaih fo țhin chu Lalpa aia thildang langsâr zawk țhin hi a ni. Țawngkam chauha Pathian ropui ber tura chhám hi a ni lo a. Kan thil tih leh buaipui ațang hian kan rilru put hmang a lang țhin. Pu James-a rawngbawlna reng rengah hian Thlaraua harh tharna ai mahin thil mak hi a langsâr fo mai. Ama chanchin a sawi nasa hle țhin bawk a, "James Lalramliana hi tunge a ni tih Lalpa lo zawt ngat ngat ang che u," tih ang chi te kan ngaithla a. "Lalpan ka hreh chung chung min thlang miau si a," tih te, "Ka thilsawi hi in awih loh chuan a hmunah lokal rawh u," ti te in midang challenge zawngin a sawi nasa hle țhin. A hmuna han kal ten Isua inlâr leh thilmak te pawh an hmu leh țhin si lo. Chumi thawi dam nan chuan, "Hmu loa ringtu chu an eng a thawl e," a tih sak leh daih lawi a. Isua hming lam ve deuh tho si a, mahni chanchin langsâr taka pholan tumna hi a thusawi ngaithla tawh chuan an hai lo ang. Isua erawh chuan heti hian a ti thung a, Matthaia 9:30 "Tichuan, an mit chu a lo var ta a. Tin, Isuan an hnenah, "Tuma hriat loh turin fimkhur rawh u," a ti tlat a. Chu bakah Isua thiltih makah chuan miin Pathian ropuizia an hmu ngei ngei a, chu chu a langsâr ber țhin bawk. Luka 8:39 ah Isuan, "I inah haw la, Pathianin i tan thil a tihsak che hi a ropuizia va hrilh rawh," tiin a kaltir ta a.
Thil pakhat han sawi lang hram ila, hmun thianghlimah hian electric bulb chhit ên a nih vangin video ami pawh kha hei ngei hi a nih hmel. A dang Isua hmel leh thusawite chu kan hre thei lo kha a ni a. Hmu lote engthawlnaah kan ngai leh phawt mai a ni ang chu. A thu hrimah speaker hian tun hma ațangin a thiltawn mak pui pui, midangin an hriatpui ngei ngei tur chi, miin an hriatpui si loh a tawng hnem hle a. Hei hian rinhlelh a tizual tlat bawk.
2. Thlarau mit vâr bik leh chang sâng bik ni a inhriatna hi thlarau chapona mai a ni fo. He ram hi tlem ka lo dai ve tawh avangin kohhran chhungah fimkhur a ngai takzet a ni.
Paula kha van thumna meuha hruai a ni a. Pathian Thlarauin a hruai dan leh a thlaraumi dan chu rîl tak a ni. A zinna pakhatah hemi chanchin hi hriat chakin an lo zawt a. Chuta a chhânna chu a ropui teh a sin, II Korinth 12:6, "Chhuang duh mah ila mi â ka ni lovang, thu taktak ka sawi dawn si a; nimahsela ka insûm ang, chutilochuan tupawhin mi hmuh ang leh ka laka thu an hriat ang aiin mi ngai ropui zawk dah ang e," tiin. Isua aia amah kha miin an ngaih ropui a hlau a, mi hriat châk zawng ringawt avangin a thil tawn ropui lutuk kha a sawi duh lo a ni. Hei hi ringtute entawn atan a țha hle. Isua hming chauh hi lam loin aw.. Hindu leh Muslim te pawhin Isua hming lam hi chu an thei ve reng a nia. Anni aiin keini chu kan danglam tur a nih kha.
3. Insawițhaih zawnga mite thinlung hneh tum hi a pawi takzet bawk. "Mizoramah Lalpa Crusade in la hre ngai lo ang. In lo dodal a nih chuan nangmahni emaw in chhungkuain emaw in tuar ang," tih te, "Heng ka thusawite hi in ring loa midang bula min rêl vaih a nih chuan accident emaw in táwng ang," tih te kei pawhin speaker sawi ngei ka hria a. Chumi avang chuan Sailutar kohhran mi țhenkhat chu vau beh ang deuhthaw in an awm hial thei ang. Isua khan a thusawi pawm turin tumah a ti lui ngai lo. Rinna kawnga la chak tawk lo te a thlamuan zawk a. Hlau lo turin a hrilh châmchî bawk a. Amah lo pan dêk dêk tawhtute chu lâwm takin a lo dawng sawng mai. "In rin loh chuan in tuar ang," tih ang chi hi chu kan Lalpa hian a hmang ve ngai tlat lo. Matthaia 9:2 ah chuan; Tin, Isuan an rinzia a hmuhin, zeng hnenah chuan, "Ka fa, thlamuang takin awm rawh; I sualte ngaihdam a ni tawh," a ti mai. Rin dan pawh la thiam lo, amah pan ve tawp ho a lo kuangkuah dan te kha a ropui teh a sin. Isua hi lo entawn zel teh u. A hming chauh lam loin aw. Paula pawhin, II Timothea 1:7 ah, "Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a," a lo ti thlap mai.
4. Midang, a bîkin rawngbawltu sawichhiat paha Pathian ram thlentir tum hi Bible ațanga thlirin a inhmeh lo hle bawk. Kan páwi an sawi pawh ni lo, mi awm dâna lo lungawi loh ve ngawt mai hi a fuh lo hle, chhangchhiatthlak lamah a kal lek lek zawk. A bikin mahni insawi rinawm tùm avanga Revival Speaker leh Pastor te chanchin a chhuan chhe zawnga sawi phêt tum hi Remna Pathian ațanga thuchhuak a nih hmel loh. Heng hi sim daih chi a ni e. Pu James-a hian pastor rawngbawl dan kalphung a hriat loh zia a thusawi hian a tichiang hle bawk a. Paulan Rom 12:18 ah, "A theih phawt chuan nangmahni lam tal, mi zawng zawng nen inremin awm rawh u," min ti a. Midangin min lo rem thei lo a nih pawhin Pathian mi dik tak te chuan rawngbawlpuite mai ni lo, an mihringpui te rém hi an tum tlat zawk a ni ngai a. Hei hi Pu James-a rawngbawlna kal zel nan pawh a pawimawh takzet. Hemi bakah pastorte hi kohhran leh mipui chhiahhlawh aiin Lalpa chhiahhlawh an nihna hi kan hriat reng a ţul.
5. Keimahni chauh ni loin midang, Pathian mite thurâwn pawh hi ngaihchân ve țhin tur a ni. Mahni chauh dik intihna, midangin kan hmuh ang hmu ve lo tlata ngaihna leh thlaraumi ni a inhriat bîkna te hi mihring ațanga chhuak a ni. Miin Pathian fa dik tak nih inhriatna leh Thlarau Thianghlim pawlna dik a chan tawh chuan Isua nuna ropui tak, tlâwmna hi a nunah hmuh tur a awm ngei ngei a. Anmahni ațangin thlarau lam pûr châwk tur a awm ngei bawk țhin. Chu chu midang bula sawi emaw a ngai hran tawh lo. Chuvangin kan lawmna leh harsatna chungchangah pawh rit phurh inchhâwk tawna intichak tawn reng tur kan ni. Paula vêkin Galatia 6:2 ah, "In ritphurhte chu inchhawk tawn rawh u, chutichuan Krista dân thu chu in zawm a ni ang," a lo ti dîm dîam tawh. Pathianin min hmang a nih pawhin midang pawh a hmang ve tho tih hi kan chângvawn ni leh phawt teh se.
6. Vanram kai leh kai lo tur chungchangah mihringte hian thu kan nei thui lo hle. Heng sual ngaihdam theihna te, chhandam tur te pawh a bul tumtu ber chu Pathian a ni mai. Mihringte ngaiha sual tak te chatuan hmun pawh keini hriat phak rual loh a ni a. Huai tak taka thutlukna lo siam hi kan tih tur a ni ngai lo. Thlarau Thianghlim chhuahsan tih te pawh mihring ațanga tehna a ni deuh zel. Isua khan Kraws lerah pawh misual inchhîrna țawngkam khat avanga ngaihdam a nihzia te kha hriat reng tlak a ni zawk. Vanram kai leh kai loh chungchang hi chu Lalpa thu a ni e.
7. Speaker hian vantirhkoh nen an inbiak țhin thu a sawi fo a. Paula vêk hian Kolassa 2:18 ah heti hian a lo sawi leh tlat mai, "Inlârna danglam bik hmua insawi a, khawvel rilru tak pu si a, engmah ni si lova intiveiho, taksa hi ngaihnep tur, vantirhkohte pawh biak tur tite chuan thiam loh chantir che u suh se. Chung hote chuan Lû, Krista chu an vuan tawh lo a ni," tiin. He thu hian ngaihtuahna a ti thuiin Bible ah hian kan nihna dik tak hi a lo inziak zel mai a nih hi.
A tawp berah chuan Pu James-a țhahnemngaihna hi a lawmawm a. Kohhranho pawhin an hlutin boruak pawh a pangngai viau a ni awm e. Hetah hian Sailutar kohhran mipui inpêkna thûkzia hi sawi nawn leh ka duh. Mahni hna țul tam tak kalsana zankhua khuaa țawngțai țhin te leh tihtakzeta Lalpa âu tute țawngțaina hi a thlawn lo ang. Pu James-a țhahnemngaihna pawh kan hriatthiampui. Kohhran a humhalh tlat thu te han hriat phei chuan kohhran chhungkuaah pawh inpumkhatna chî a tuh ngeiin a rinawm. A hnena thurâwn pek hi a inthlahrunawm lo bawk a, heti hian kan han sawi ve a ni. Kan rawngbawltu kaihzâ kan lo vênpui a ni ber mai. Thurâwn pawma a lo insiamrem thei a nih ngat chuan atan leh kohhran tan a hlawk lehzual dawn em mai. Sailutarah hian harhna dik tak lo thleng mawlh teh se.
~Rev. RC Lalchhuanthanga
Post a Comment