SERCHHIP BIAL MIPUITE HI KA KHAWNGAIH

SERCHHIP BIAL MIPUITE HI KA KHAWNGAIH

- James Ramdinmawia

Kei tehlul hi Serchhip Bial mipuite khawngaih tur khawpin milian leh miropui, mi neinung ka ni lo. Mahse he Bial Political History ka thlìr hian he Bial mipuite hi ka khawngaih tlat nia.

Serchhip Bial mipuiin lungsi taka an thlan tlin Pu Lalduhoma chu kan State Legislative Assembly Member (Ruling Party MLA) eng emaw zatin an hek a, a thlangtu Bial mipuite râwn miah lovin Speaker-in Dan ţanchhanin a bàn ta a nih kha. Speaker-in a bàn dawn hian a Dàn ţanchhante leh Court Ruling lo awm tawhte kha Dàn hmang vêka challenge theih a ni a, Court pangngai angin Ukil-te inhnial bap bap theih ni hek lo, Speaker dawhkan ațangin Bànna Order a chhuak ta rup a nih kha. Kan Assembly Speaker pawhin hreh takin thutlukna a siam niin a lang a, hei hian a entir chu, ama duhthu ni lovin, MNF Party hotu lu lam ațanga Order khauh tak a dawn vànga ti ta mai niin a lang. 

ZPM MLA dangte nîtin chetvelna han en ila, Pu Lalduhoma chet vel ang thova ZPM Party Activity-a tel vek an ni a, anni hi MNF MLA te hian an hek ve si lo a, Pu Lalduhoma hnawk an tih vang hrim hrim piah lamah a thlang tlingtu Serchhip Bial mipuite an zah lo hle tih chiang takin a lang a ni.

Serchhip hi Mizoram-a District Headquarters zingah Mizoram hmun laili bera awm a ni a. Chuti chung chuan he District chhungah hian hmasawnna a zuang lo hle. Pu Lal Thanhawla’n a Bial mî ni lo chungin ţhangkhat lian zet MLA niin a awp a. Chief Minister ni chunga a awp chhung khan Serchhip khawchhung kawngpui a chhe em em a, District Headquarters dangte aia develop viau tura ngaih kha a chuti teh lua lo bawk. A mak ka ti a, a Bial mipuite ka khawngaih ţhin. Tunhnai mai-a By-Election Campaign-a Pu Lal Thanhawla thusawi pakhatah, “A Bial mi ngei MLA neih a ţha a ni,” a tih kha kan lo hre ve a, kum kha leh chen a Bial mi ni lo, amah ngeiin a awp a, hmasawnna a lo awm vak lo tih amah ngeiin a rawn nemnghetah ka ngai.

MNF Sorkar hmasa-ah khan Er. K. Thangzuala (L), Minister of State kha Serchhip Bial MLA a ni ve leh a. Mahse Minister Bial meuh ni si khan District dang aia duhsakna an dawn nasat bik hriat tur a tam lo hle. Tunah hian MNF Party chuan Serchhip Bial By-Election-ah an Party Candidate atan Pu Vanlalzawma, Ex-MP, Ex-MLA an vawrhchhuak a, an tifuh ang em awww? Pu Zawma hi a tling a nih chuan Cabinet Minister an tìam ni àwma sàwi te pawh a awm. Hei hi thudik lo ni ta se, MNF Ministry hi an buai nak mai thei. Pu Zawma hi Mizo pâ tak mai, pa țha, mi rilru tluang, rilru kheuhbeuh nei lo, Central YMA President ni ngat thei kha a ni. Chutih rualin MP a nih lai khan Parliament-ah thusawi turin a dingchhuak khât lutuk a, “MP ngawi reng,” tiin mipui pawh kan phun hman a nih kha. Parliament-ah Party lian aţang lo chuan thusawina hun chan a harsat thu TV Interview-ah a sawi a, mahse tunah hei, MNF MP tho, Pu K. Vanlalvena chuan MP a nih ațanga rei lote chhungin vawi tam tak thu a sawi tawh si a nih hi. Chuvangin Pu Zawma kha a lo turu vak lo a nih dawn hi tiin ngaihdan ka siam.

Serchhip Bial hian Pu Zawma hi lo thlang tling ta se, a dinna hmasa Aizawl West III Bial pawhin an lo hnawl tawh kha a ni a, Rangvamual ni lovin Aizawl West III Bial hian Serchhip Bial mipuite an nuihzat mai ang tih ka hlau hlèl lo e.

BJP lam hian an Candidate Pu Hriata Chhangte hi an dah fuh viau-in ka hria, a Bial mi ngei a nih piah lamah mi chak tak a ni. Chutih rualin BJP Candidate vote tlin hi Mizo zingah chuan a la harsa viau niin a lang. State hruaitu-ah hian Mizo mipui ngaihzàwn rawn, Public Figure zingah pawh Public Darling awm ta se, mipuiin an zui huk lo ang tih a sàwi theih loh. 

PC Party Candidate Pu Vanlalruata hi PRISM President țhin, RTI Act hmanga nasa taka mipui sum (Sorkar sum) luang ral tawh leh luang ral tur chhuia a țul anga Court lama lo kalpui tawh țhintu kha a ni a. Mahse Mizoram-a Political Party lian kan tih zinga a zuih ral ber MPC te nen inzawmkhawma PC Party anga an han kàl tâkah hian an lèn phah vak dawnin a lang lo a. Beisei neih sànpui a har viau.

Congress Party Candidate Pu P.C. Laltlansanga hi mi chak, a bawh lam lam chu bawh nâ tak a ni a, a Bial mi ngei a ni bawk. Chutih rualin General Election-a Seat pè duh mang si lova sa țah chhuak pêk ang leka an Party dinhmun zûai tawh lama By-Election-a Congress Party-in an han vawrhchhuak hi chu ka lo khawngaih deuh.

Independent Candidate erawh hi chu a chanchin ka lo la hre ngăi lo a, a chungchâng hàn sàwi vak tur ka hre lo.

Neutral ka ni a, eng Party mah hi han duhsak a, han àwn bîk ka nei lem lo. Chutih rualin Serchhip Bial mipuite hian duh taka an lo thlan tlìn tawh, a Bial mipui pawh zahderna nei eih lova Ruling Party-in phakar taka an thuneihna hmanga MLA ațanga an lo bànsak tawh hi anmahni Bial mipui dikna chanvo humhìm nân thlang tling leh ngei se tih hi a Bial mipuite ka duhsakna a ni.