Footballer nih aia Pastor nih thlangtu
S T U A R T E L L I O T T-A
Football khel thiam, football khelh aia Pastor nih thlang ta zawk Stuart Elliott-a chanchin ngaihnawm tak hi i lo tarlang teh ang. Footballer zingah Kristian țha tak Isua zahpui lo leh Isua neitu engemaw zat zingah football chawlhsana Pastor ni ta an tam lo hle, chutiang zinga pakhat Northern Ireland midfielder Stuart Elliot-a hi a ni.
Football khawvelah a intatlut țan: A club ngaihsan ber chu Liverpool a ni a, engtikah emaw chuan Anfield-ah a inkhel chu Liverpool fan ruhkawl, Kop hoten, "We'll Never Walk Alone" tiin an la awi ve ngei ang tih a beisei tlat țhin a ni. Naupangtê a nih ațangin an khua Belfast a St Andrews FC ațangin football khawvelah a intatlut țan a. School a kal lai chuan Belfast khawpuia Shankill Road-ah football a khel țhin a. Mahse a tet deuh avangin an Coach chuan School team-ah a telh duh lo a ni. St. Andrews FC a inkhel zira hun engemaw chen a awm hnuin Northern Ireland, Club langsar lo tak Glentoran-ah a insawn leh a ni.
A inhlawhfa țhin: Kum16 a nihin 1994-ah Glentoran a zawm a, professional club a nih loh avangin chhunah mi tukverh darthlalang tifaiin a inhlawhfa țhin a. Tlai hnathawh loh hunah an Club training naah a tel leh țhin a. A mamawh zualpui chu chhungte pur buai lova mahnia a intum ve theih avangin a lawm hle a ni. Ft 5. 10"-a sang Elloit-a chu Glentoran-ah hian a chet țhat em avangin Scottyish Premier Club Motherwell chuan contract a sign pui a. A naupan lai ațanga a tum ber football eizawnna atan hmang turin a luhchilh ta a ni.
Ram tana khel tura kohna: Motherwell midfield tlabal tak chu engemaw chenah a thawmphui a, kar lovah hriat a hlawh nghal hle. Motherwell-a Professional Player-a a luh ațanga thla hnih lekah ram tana khel turin koh a ni a. Billy Davies-an ram tana khel tura a rawn sawm chu a lawm hle a, mak a ti tak zet a ni.
Club leh League danga insawn kualin: Motherwell chuan sum lamah harsatna an tawh avangin loh theih lohvin an player țha engemaw zat hralh a ngai a. Elliot-a chu chhuak tur pawlah tel vein 2002 - 2003-ah Hull City-ah a khel a. Midfield ni chungin chumi season-ah chuan goal 12 lai a tilut a, an Club scorer a ni. 2003 - 2004-ah goal 24 thunin 2004- 2005-ah phei chuan goal 27 a thun a. Scottish League-a goal thun tam ber niin Golden Boot a dawng a ni. Kum 2008-ah Doncaster Rovers a zawm a, 2010 kum tirah Hamilton Academical-ah a insawn leh a, August 2010-ah hun puma Pathian rawngbawl a duh avangin ui tak chungin football a chawlhsan ta a ni.
Ram aiawha a khelhnate: Kum 2002 ațangin ram aiawh tura koh a ni a, ram tana a khelh hmasakna ber chu Septembet 2002-ah Malta nen Windsor Park-a frienfly an khelhin a ni. Ram tana a goal hmasa ber chu 2002 May thlaa Bulgaria nena an khelh țumin a thun a ni. Northern Ireland tan game 36 a khel a, chungah chuan goal 4 a thun. 2005-a World Cup qualifying-ah Northern Ireland-in England team David Beckham, Wayne Rooney te ho goal 1 - 0 faia an hneh țum pawhin player pawimawh leh langsar ber pawl a ni.
A piangthar, Isua hnenah: Elliott-a hian a pianthar hma hauh ațangin Pathian țihna leh zahna a nei a, a nun hrim hrim pawh a sual lo hle a. September 3. 1995-ah Belfast khawpui-a Whitewell Metropolitan Tabernacle-ah Pastor James McConnell-a rawngbawlna ațangin piantharna a chang a, chutih lai chuan kum 17-a upa a ni. Chumi zana a nuna thil thleng chu "Whitewell Church-a kan inkhawmnaah Pathian chuan a chhiahhlawh naupang tê tê kaltlangin ka hnenah thu a sawi a, mi sual boral mai tur ka ni tih hriain Isua chu ka thinlunga rorel turin Lalber atan ka sawm a. Chumi zan ațang chuan mi thar, Pathian fa ka lo ni ta a ni," tiin a pianthar dan a sawi a. A duhtawk mai lo, a sawi zawm zel a, "Piangthar i nih avangin harsatna i pumpelh dawn lo va, harsatnain a chim fo ang che. Mahse Lalpa hian englai mahin ringtute chu a kalsan ngai lo va, harsatna kan tawh lai pawhin kan țhian Isua hian min thlahthlam ngai lo va, kan mangannaah min țanpui țhin a. Chu chu Isua neitu nih hlutna a ni. Kei pawh harsatna leh buaina karah pawh ringtu ka nih ațangin thlamuanna leh lawmna ropui tak ka chhar țhin a ni. Motherwell-a ka awm hlim phei chuan Setana chuan nasa takin min bei țhin a, mahse Lalpa chuan a thiltihtheihnain min hliahkhuh țhin a ni."
"Naupan tet ațangin footbal hi ka rilru leh ngaihtuahna luah tam bertu a ni a, mahse, Isua hian ka nunah hmun pawimawh ber chang sela tih hi ka duh ber a ni fo țhin a ni. Isua neitu ka ni hi khawi hmunah mah ka zahpui ngai lo va, chhuang takin ka puang zel țhin a ni," tiin nun thar a neih dan leh thil dang aia Isua a dah pawimawh zawk țhin thu a sawi a ni.
Pathian ruatah a ngai: Football chawlhsana rawngbawlna kawng a zawh tak dan chu ama ka ngei ațangin lo ngaithla ila : Ka pianthar ațangin Lalpa rawngbawl hi ka tih tur a ni tih chiang takin ka hria a, mahse englaiah hian nge ka thawh hlawk ber ang tih erawh chu ka hre mai lo a ni. Ka phak tawkah Pathian ring vein ka inhria a, ka hma lam hun pawh Pathian hnenah ka kawltir țhin a. Professional footballer ka nih ang takin naupangtê ka nih ațanga ka team chuam Liverpool-ah engtik hunah emaw khelh ka lo beisei țhin a. Mahse, Lalpa chuan ka beisei loh lam kawng zawh turin min hruai ta zawk a. Lalpa hi min siamtu leh hruaitu a ni a, ka tana țha tur a hria a, chuvangin a mi hruaina kawng chu lawm taka zawh turin huphurh ru tak chungin ke ka pen ta a ni," tiin a sawi.
January 2011 ațangin Hull City-a Living Hope Christian Church -ah awmin kum 2012 January ațangin Kohhran enkawl turin Pastor hna a thawk țan a. Inkhelh thiam avanga mi hriat hlawh tak a nih bakah thusawi thiam tak a nih avangin a rawngbawlna pawh a nung hle a. A bik takin țhalai lamin an bawh zual hle a ni. /- bchhangte klsb vthr
Source : Makedonia, Lunglei
[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]
Post a Comment