Showing posts with label Success Story. Show all posts
Tweet Share Share Share Share Share

July 18, 2023
MRB CHAIRMAN THAR PI SHERYL L. VANCHHONG

Aizawl the 17th July 2023 : Mizoram Rural Bank Chairman thar Pi Sheryl L. Vanchhong, d/o Pu Remmawia Vanchhong, MCS (Rtd.), chuan vawiin khan a hna a zawm. Pi Sheryl L. Vanchhong hi kum 2001 khan State Bank of  India (Delhi Circle)-ah Probationary Officer-ah bultanin SBI branch hrang hrang - New Delhi, Kota (Rajasthan), Dehradun leh Noida-ah te a thawk tawh a. 

Kum 2006 khan NE Circle lamah transfer niin Mizoram chhungah pawh Branch Manager, SBI New Secretariat Branch bakah Mission Veng Branch & Aizawl Main Branch ah te a thawk tawh a ni. hemi hnuah State Bank Institute of Learning & Development (SBILD) Guwahati-ah Faculty hna zawmin, tuna MRB Chairman hna a zawm hma chiah khan Head of Stressed Assets Recovery Branch (SARB) Guwahati, SBI hna a thawk bawk a. Pi Sheryl L. Vanchhong hian MRB Chairman hna hi deputation-in kum 3 chhung a chelh dawn a ni.

Mizoram Rural Bank hi September, 1983 khan Regional Rural Banks Act 1976 hnuaiah din tan a ni a. MRB shareholder-te chu GOI 50%, Govt of Mizoram 15% leh SBI 35%. Tun dinhmunah Mizoram Rural Bank hian Branch 102 leh hnathawk 475 a nei mek a ni.

MRB CHAIRMAN THAR PI SHERYL L. VANCHHONG

Read more »
Tweet Share Share Share Share Share

June 04, 2022
B. Lalchhanchimi (Chhantei)
Nl. B. Lalchhanchimi (Chhantei) d/o Rev Dr B Lalnunzira (ATC) chuan heng University pathum - Oxford, London SOAS leh Geneva-ah te hian MA zir turin admission a hmu thar a. Oxford University hi thlangin Social Anthropology zir turin a inbuatsaih ta a ni. Fee hi a sang em em a, engtin nge ni ang le tiin  theih ang angin Chhantei hian kawng a dap ve nawk nawk a. Inlaks Shivdasani Foundation - Philanthropist-ho intelkhâwmin Foreign-a Indian students zir turte tana scholarship an siam chu a dil ve râwih mai a. Round-3 interview a paltlang hnuah he scholarship duhawm tak, GBP 46306 (India pawisa chuan Nuaih 45 chuang) zet mai hi an rawn pe ta nawlh mai a ni. Diltu fel leh thiam tak tak, mi sang chuang fê zinga mi 12 chiah an thlanah a tel pha hi a chhuanawm takzet a. Amah anga Master Degree ațanga  Oxford University-a zir thei hi Mizo zingah an la awm lo hial awm e. Ani hma hian Joy Lalkrawspari d/o Rev LB Pachuau khan M.Phil leh PhD hi Oxford University-ah hian a lo zir tawh bawk. 

Nl Chhantei hian USA ah Class X thleng lehkha a zir hnuah India rama sikul țha Woodstock-ah Class XI & XII a zir chhunzawm leh a. Sociology & Anthropology subject la chhunzawmin BA hi Ashoka University-ah 2021 ah khan a zo leh ta a ni. Lehkhathiam tak a nih bakah Pathian rawngbawlna kawngah mi țangkai tak a ni bawk a. India leh ram pawn thlenga Magazine chhiar hlawh, ' Pastoral Times' ah hian Editor zinga mi a ni bawk. Heng bakah hian 'The Zubaan - Sasakawa Peace Foundation Grants for Young Researchers from the Northeast ( 2021 - 2022 ) lawmman a lo dawng tawh bawk. 
Read more »
Tweet Share Share Share Share Share

December 03, 2021
MIZO HMEICHHE ZINGA M.PHARM LEH Ph.D HMASA BER Dr. TC LALHRIATPUII



Pi TC Lalhriatpuii( Mapuii) hi (Mapuii kan ti zel tawh ang) hi Mizo hmeichhe zinga M. Pharm( Master of Pharmacy) leh Ph.D( pharmacy) hmasa ber a ni a. A chanchin tawi kim takin kan tarlang ange.

Dr. TC LALHRIATPUII
Pi Mapuii hi kum 1977 November 18 ah Khawzawl khua ah a lo piang a. A pa chu TC Chhuanvawra( L) a ni a, a nu chu C. Lalhlimpuii a ni. Unau mipa pianpui 3 a nei bawk. Kum 2008 khan R. Lalnghakliana S/O R. Lianzuala, Khatla veng nen inneiin tunah hian ITI veng, Aizawl ah khawsa in a pasal Pu Manghaka hian kum 2009 July 2 khan a boralsan a ni.

Zirna lamah chuan pawl khat atanga pawl li chu Govt. Keifang primary school ah a kal a. Kum 1986 ah pawl 4 niin Scholarship Board Exam ah  Mizoram pumpuiah  13- na niin distinction ah pass in Merit Scholarship a dawng nghe nghe a ni. 

Pawl nga atanga pawl sarih chu Keifang Govt. Keifang middle school ah kalin pawl 7 exam Board Exam ah Distinction ah pass in Mizoram pum ah 23- na ni leh in Merit Scholarship a dawng bawk a ni. 

Kum 1990 ah Govt. Central High School College vengah lutin kum 1992 ah HSLC exam ah distinction ah pass in Sciencs leh mathematics ah letter a hmunleh. Kum 1993- 95 ah PU science zirin PUC ah lutin tha takin PU Science a pass leh.

Higher and Techinical kaltlangin Mizoram state quota in B. Pharm  chu Dibrugarh University ah ziriin kum 2000 khan first class ah chhuak in a rawn passed a ni.

Kum 2000 ah hun rei vaklo  RIPANS- ah Lecturer( contract basis)- in a thawk zawk a, kum 2001 January ni 15 ah Department of Pharmacy, RIPANS, Zemabawk ah lecturer hna nghet( permanent)  a hmu hlauh mai a amah pawh a lawm hle.

Kum 2002 khan GATE- 2002( IISc, Bangalore) a in ziak tling ve hlauh mai bawk a, hemi kaltlang hian a thawhna RIPANS lama an hotute hriatthiamna in kum 2 study leave pek niin tluang takin kum 2004 ah S.G.S.I.T.I, Indore, Madhya Pradesh ah M. Pharm( Medicinal Chemistry) 1st class ah pass in kum 2011 khan Department of Pharmaceuticals Science, Dibrugarh University, Assam atangin Ph.D degree(Pharmacy) a hmu leh bawk a ni.

Tunah hian Assistant professor niin vawin thlengin he hna hi a la thawk mek a ni. A kaihhruaina hnuaiah mi pathum in Ph.D an ti mek a, M. Pharm zirlai 10 a kaihhriaina in tha takin an zo tawh bawk. Chik taka thil chhui hi a tuina lam hi a tui em em a, Department of Biotechnology, Govt. Of India atangin Major Project Rs.75.25 Lakhs a dawng nghe nghe.

Tluang takin he project hi kalpui niin a kaihhruaina hnuaiah zawh fel a ni tawh bawk. Research publication pawh nei ve nualin Book Chapter te ziakin Springer New York Publication ah pawh hnu hma a lo hnutchhiah ve tawh bawk a ni. . National leh International Conference/ Workshop hrang hrangah te scientific paper te present in a theih tawp in Pharmacy Progession tih changtlun nan leh research lama midangte tiphur a tel ve fo thin.

Pi Mapuii hian mi taima leh tum ruh, Pathian tihmi a ngaisang em em a, harsa taja lehkha zir chho a Pathian khawngaihna a vang liau liau va tun dinhmun thleng thei a nih zia hi a hrechiang hle a ni. 

A theihtawpin midangte pawh hlawhtling khawpa a taima tura fuihin an harsarna te hriatthiampui chungin a phak tawk tawkin Pathian chakna ring chung tak meuhin ke a pen chho ve zel a ni. 

MAWHPHURHNA DANGTE

1.Department of Pharmacy, RIPANS ah University Examinstion Coordinator a ni mek.

2. All India Survey on Hihger Education( AISHE), Ministry of Human Resource Development, Govt, of India hnusish RIPANS tan Nodal Officer a ni mek.

3. Drug awarness club( Established under Narcotic Control Bureau, ministry of Home Affairs, Govt of India), RIPANS ah Secreatry hna a chelh mek bawk.

Pi Mapuii thawhna RIPANS hi Dr. C. Silvera M.P a nih lai vel 1994- 95 vela Pu C. Silvera hova central atanga an zu kar chhuah a ni. Cheng 2315.39 vela bul tan a ni. Director hmasa ber chu B. Thangdailova a ni a, khawiah tak tuan ta ang maw?

RIPANS hi a din tirh a a hming hmasa chu Regional Paramedical and Nursing Trainning Institute( RP&NTI) tih a ni thin a, hun engemaw tilai khan RIPANS tiin an thlak ta. ~Tedika Chawngthu 2nd. Dec. 2021

Read more »
Tweet Share Share Share Share Share

November 21, 2020 47
Tunhnaiah Ramthar, Lunglei tlangval J. Lalduhawma (Duduha Jinhlawng)-in online Carrom Disc Pool a khelhna atanga a hlawhchhuaha atangin Scooter (gearless) a lei tih social media lama darh chu LDF Cable Network, Lunglei chuan kan han belchiang a, a tak ngei a lo ni e.

Duduha hi Carrom Disc Pool, coins seller niin coin a hralhna atanga a lakluh hi a lo tlem lo hle. Mizoram chhunga coin lei duh ringawt pawh a supply seng lo zawk. Amah chauh lo pawh Mizo zingah coin seller an awm lo nual.
Mizo online game atanga sum thawhchhuak
World No. 2 a ni pha hial a, coin a hralh bakah mi account atanga khelhsak a, World No 10 huang chhunga a awmtir atangin hlawh a nei nual bawk. Chutianga khelhsak tura ngenna chu a chhang seng lo.

Duduha te unau hi vanduaithlak takin an nu leh paten an boralsan tawh a, Pathianni liam ta kha a nu boral cham a ni nghe nghe. An Inah hian a nau J. Lalhriatpuia nen an khawsa.

An unau hi footballer tha tak an ni a, Duduha hi Lunglei XI a tel phak a, an unau hian Ramthar veng tan leh Ramthar FC tan an khel phak ve ve bawk. Engmah thawh hreh nei lo, a rem rem thawka inhlawh thin an ni.

Kohhranah mi tangkai tak ni ve vein Hriatpuia hi BCM Ramthar Standing Choir member a ni a, Duduha hi an musician (guitarist) a ni bawk. Guitar a thiam hle. An chanchin tarlan duhlo khawpa mi inngaitlawm an ni.

Carrom Disc Pool (online carom board kan tih mai) a thiamzia hi riah chaw fai keng meuha sawi tham a tling.

A kawmna hi LDF Cable Network-ah tihchhuah a ni tawh a, tihchhuah chhunzawm a ni ang. Youtube lama en duh tan ‘Pholeng’ (youtube channel)-ah en tur a awm a, a khel lai en duh tan ‘Duduha Jinhlong’ tiin Youtube-ah a awm bawk e.

~Lawmkima Hmar
Read more »
Tweet Share Share Share Share Share

November 21, 2020 1
Pu Lawmna Kima S/o Kawlengi Darlawn khua hi Data Scientist niin tunah hian Bangalore ah a nupui leh a fanute pahnih nen an cheng mek a ni.

Tunah hian, French Corporate lar tak ATOS in an hnena thawk turin an sawm a, promotion hmu nghal in, Principal Consultant a ni nghal dawn a ni. 
Mizopa data scientist
Artificial Intelligence leh Cloud lama thiamna nei a nih avangin ATOS hian an Project lian tak OneCloud a Principal Consultant hna thawk turin an sawm a ni.  Tunah hian Larsen & Toubro in Principal Architect hna chelh turin an sawm ve mek bawk. 

ATOS hi Multinational Information Technology & Consulting company a ni a, Bezons, France a based a ni. Tunlai khawvel Technology lar Artificial Intelligence leh Cloud Technology lam a thiamna nei Company a ni. November 18, 2020 khan ATOS hian OneCloud an siamchhuah tur thu an tichhuak a, hetah hian $2 Billion lai an seng dawn a ni.

Covid19 avangin mi tam takin hna an chan a, hna chanlo pawh an hlawh tihtlem a ni nasa hle. Hetih lai kara hna sang zawk Offer a dawng hi ka lawmpuiin kan chhuang hle a ni, Mizote min tihmingṭha zel turin duhsakna kan hlan e.

~Marovi Lalhnam
Read more »
Tweet Share Share Share Share Share

November 14, 2020
Mizo zinga a hmasaber ni turin Lt Col Dr Lalsangzuala Chinzah, Bungkawn chuan All India Institute of Medical Science (AIIMS), Bhubaneswar atangin Master of Chirurgiae (MCh), Neurosurgey a pass.
Lt. Col. Dr Lalsangzuala Chinzah
Lt Col Dr Lalsangzuala Chinzah hi November 27,1980-ah piangin Govt. Bungkawnah primary leh middle school a zo a, St. Pauls-ah High School leh St Anthony's College, Shillong-a a zir hnuah Silchar Medical College-ah MBBS zir lehin kum 2006 khan Indian Army-ah Captain rank-in a lut.

Kum 2010 khan Major rank-ah kaiin kum 2011 khan nupui Lalrintluangi neiin fanu, phir an nei a ni. Kum 2011-ah vek hian PG (Surgery) zir turin a inziak tling zui a, Armed Forces Medical College (AFMC), Pune-ah service kum thum chhung a zir hnuah kum thum service lehin kum 2017 khan Lt. Col rank-ah a kai chho leh a ni.

Kum 2017-ah super specialist MCh (Neurosurgery)zir turin a inziak tling a; AllMS, Bhubaneswar-ah kum 2018-ah khan a zir tan a, tun hnaiah a zo fel ta a ni.

Mizoin Neuro Surgeon kan neih hmasak ber Lt Col Dr Lalsangzuala Chinzah hi sipai doctor a nih angin Guwahati-a Military Hospital-ah an post dawn a ni.
Read more »
Tweet Share Share Share Share Share

July 16, 2020

Nimina HSSLC pawl 12 exam neih zawh takah khan Arts stream-ah Mizoram puma pariatna (8th Postion) dinhmun


Vanlalvenhimi (17) hi Durtlang North-a cheng a ni a. A nu hi Lalsangzuali a ni a, a pa hi Lalfakliana a ni.Durtlang Higher Secondary School zirlai a ni a. Nimina HSSLC pawl 12 exam neih zawh takah khan Arts stream-ah Mizoram puma pariatna(8th Postion)dinhmun a hauh a. Subject zawng zawngah letter mark hmuin mark 500 ah 437 hmuin distinction-ah a pass a ni.Amah hi chhungkaw khawsak harsa ve tak atanga lo inzirchhuak a ni a, sikul hi Govt. Durtlang Primary School II, Govt. Durtlang North Middle School, Govt. Tinzagina High School leh Durtlang Higher Secondary School-ah a kal a. Chhungkaw harsatna avangin private school tha pawh lut thei loin sawrkar enkawl school-ah vek a kal chhuak a ni.
Vanlalvenhimi, Mizoram puma pariatna

A nu leh pa hi nitina inhlawhfa chawp an ni a. Amah hi an unau zinga upa ber anih avangin inchhungkhurah tihtur hrang hrang- eirawngbawl leh thildang ti pah chungin theihtawpin lehkha a zir thin a. Nikhatah darkar riat chhung lehkha a zir tlangpui niin a sawi. Heibakah hian School chawlh laiin a nu leh pa te inhlawhna lamah theih ang angin a pui ve thin bawk a ni. An chhungkua hi vawiin thlengin dap in (a chung rangva)ah an la cheng a ni.

An inchhungah lehkha zirna pindan hran pawh nei lemloin inchhung rem lai laiah a zir ve mai thin a. Sum leh paia an harsat em avangin a hranpain tuition lak pawh a ti thei lo a, pawl 12 exam turte tana an school-in study camp an buatsaihah pawh sum thawh ngai anih avangin a lut ve thei lo a. In lamah a theih tawpin a lo inzir ve a ni.

Tunah hian B.A zir chhunzawm tumin a inbuatsaih a. Amaherawh chu College kal man leh sum sen tur hi a tam tham an tih avangin engtin nge a zir chhunzawm dawn tih erawh a la sawichiang thei lo a. Amahin a tum dan chuan B.A zir zawhah academic line lama kal chhoh zel a tum a. Political Science hi a subhect tuina ber a nih thu sawiin nakinah University professor nih a chak thu a sawi bawk.

Vanlalvenhimi hian a chhungte leh an zirtirtute puihnaah leh Pathian chungah lawm takzet tih a sawi. #AIRNews
Read more »
Tweet Share Share Share Share Share

June 14, 2020 1
Pa hausa MizopaA hunlaia Mizo Pa hausa ber tia hriat lar, Aizawl pa vengva hmasa leh Sumdawnna lama bul tantu hmasa Pachhunga hi Mizoram khawchhak lam Lawihmun ah alo piang a. Bawrhsap HWG Cole-a kaihhruaina a Mizo Lal ten Shillong an kal khan tel ve in, kum 1911-12 Abbor runnaah khan a kal ve leh bawk a, chuta tanga a sum hmuh chuan sumdawnna bul atan chho ta a.

Aizawlah dawr siam in a taimakna leh rinawmna avangin Sorkar rin a hlawh a, contract leh supply hna tam tak Sorkar chuan pe in reilote chhungin Mizorama pa hausa alo ni chho va. Pachhunga leh a nupui Chawngi-te hi Kristian tha, Pathian leh Ram tana luangchhuak nasa tak mai niin; kum 1923 ah Dawrpui kohhran upa atan thlan a ni a, An Biakin sak nan Rs 100 lai an thawh bawk (chutih lai chuan tam tak a ni).

Politician hmasa niin Mizorama Political Party hmasa ber Mizo Union chu kum - 1946, April ni 6-a din anih khan R.Vanlawma leh P.S. Dahrawka-te chu General Secretary leh Convener atan ruat an ni a. Kum - 1946, May ni - 25 chuan an party inthlan an neih hmasak berin Pachhunga chu President atan an thlang a. Kum - 1952 leh kum - 1957 khan Mizo District Council member-ah a tel ve ve bawk a ni.

Kum - 1957 thla chawhnu lam khan
Pachhunga In Dawrpui Vengah mi thahnemngai thenkhat kal khawmin, Ram pawn hmun hla tak taka sum leh pai tam tak senga Mizo thalai College an kal thin chu insenso a lo zia zawk nan, Zoram-ah ngei College pakhat tal awm ve thei se tiin thu khawmte chuan thu an rel a.

Tichuan a kum leh 1958, August ni - 15 Independence Day chuan Mizorama College hmasa ber Aijal College chu Bawrhsap Lawrence Singh Ingty hoin an din ta rawih mai a. Principal hmasa ber atan St. Paul’s School dintu leh Headmaster, Bro Godfrey Danis c.s.c. chu ruat a ni. He College lo din theih nana sum thawh dan hi sawi a in anglo a, chung zingah chuan Pachhunga hi thawhhlawk ber pawl a ni ngei tih erawh thil chiang a ni. Mi thenkhat sawi danin Rs 50,000.00 zet mai chu he Zirna in tan hian a thawh (A hunlai chuan tam tak a ni ang...)

Pachhunga Memorial College tih thin a ni a, kum - 1965 khan North Eastern Hills University (NEHU) chuan a rawn la leh ta a, Pachunga University College tih a lo ni leh ta a ni. A hmingchawia College din Pachhunga University College chu tun thlenga Mizoram College lian alo ni ta a ni. Hetiang taka Zoram tana malsawmna, mahni neih ui lova mihring tana rawngbawltu sap hovin 'Philanthropist' an tih mai thin Upa Pachhunga Hmar hi mihring rawngbawltu mai ani lova, Pathian rawngbawltu leh a Ram ti zautu Mihring lamah leh Thlarau lam Mi Hausa a ni.

Thubelh: Keini huna mi hausa fe fe Nuai - 100 nei 'Crorepati' kan kat nuk tawh lai hian; Covid-19 test na tur khawl RT-PCR kan tih mai indaihloh ala nasa hle a. Mithiamte sawi danin pakhat Nuai-17 vel man he khawl hi kan Sorkar rethei tak lei tura túr tur lo hian kan Crorepati-te hian nachang hriain che chhuak ve se, mihring dangte tan rawngbawlin an sum leh pai Pu Pachhunga angin thawh nachang te hria sela a duhawmin a lawmawm hle ang. He Khawl PCR hi Sorkar oder aiin private a leiin a awlsam a, a rawn thleng rang zawk an tih nghe nghe bawk kha maw! @ Mizo Art Gallery
Read more »
Tweet Share Share Share Share Share

March 28, 2020
COVID-19 DO TURIN NULA LALDUHTHLANI

HERO THAR

Duh se a ngawi thei,
Duh se a thawklo thei,
Duh se a tawm mai mai thei.
Mahse Duhi hian a duh lo.

Nl. Lalduhthlani hi  B. Sc Nursing, Champhai Kahrawt venga cheng, Upa R. Lalzamliana fanu a ni. GM Higher Secondary School a Health care subject zirtirtu a ni a. Kolkota a a thawh chhungin ICU experience a nei tha hle. 

Champhai District Hospital a Covid 19 avanga ICU a dah ngai  an awm chuan, enkawl turin a rawn in volunteer e. 

Duhi, Pathianin ti huaisen zel che sela, chakna i neih theih nan kan tawngtai e.
Read more »
Tweet Share Share Share Share Share

March 07, 2020

Aizawl Tlangnuam tlangval Lieutenant Onesimus Vanlalruata (s/o Rev. B Zobiaktluanga and Malsawmdawngliani) chu Officers Training Academy Chennai atangin vawiin 07 March 2020 khan Army Service Corps ah commissioned thar a ni.
Kum khat leh a chanve chhung Garhwal Scouts hnuaiah attachment a ti dawn a ni. A pa hi tunah Silchar Presbyterian Bengali bialtu Pastor a ni.

Mizo Army Officer Thar Lt. Onesimus Vanlalruata
Mizo Army Officer

Read more »
Tweet Share Share Share Share Share

February 15, 2020 2


MIZO ZINGA IAS INZIAK TLING HMASABER JAMCHONGA NAMPUI
By ~ Eleazer (Tetea Hmar)

Mizo IAS HmasaberMizo zinga IAS inziak tling hmasa ber Jamchonga Nampui hi Pu Somlalkhupa leh Rochongbuangi te inkarah kum 1926 June thla khan Biate khua, Thuruk, Meghalaya ah a lo piang a. An unau hi mipa 7 bakah hmeichhia pahnih (an vaiin unau pakua) zinga upa ber a ni a. Kum 2 chauha upa a nih laiin Mualdam, N.Cachar Hills lamah an pem a, hetah hian a naupanlai hun zawng chu a hmang a. An pemna khua Mualdam ah zirna in a awm loh avangin kum 1935 khan Halflong Welsh Mission L.P School ah zirna bultan turin a chhungten an dah a. Amah Jamchonga hi lehkhathiam thei tak niin 1942 khan pawl 6 a pass a. Hetih hunlai hian Halflong a zirna a hnufual deuh avangin zirna chhunzawm turin Shillong lam a pan ta zawk a. Shillong ah hian Mawkhar hmuna Govt High School ah a lut thin a. Hetih hunlai hi India ramin zalenna a sual lai anih avangin, zalenna sual kawngah a inhmang nasa a. British rorelna duhlo pawlah tangin a dodal nasa thin hle a, chumi avang chuan a zirna pawn a tawrh phah nghe nghe a ni.



Kum 1946 matric exam ah a failed avangin Halflong lamah lét leh in. Hna hrang hrang a thawk kual thin a, kum 1950 thleng chu Halflong lamah hun a hmang chho ta a. Mahni inchawm thei dinhmunah ding tawh mahsela, zirna chhunzawm a châkna chu a reh har deuh a ni mahna. English High School ah matric exam turin ngaihtuahna thar nen a inbuatsaih chho leh a. Hemi t(r)um hian first ah a pass nghe nghe a ni.

Chumi hnu chuan Shillong lamah bawk zirna chhunzawm turin thutlukna a siam leh a. St.Anthony College ah lûtin, lehkhazir pahin chhun lamah Governor Secreteriat ah Clerk hna a thawk thin a. Harsatna tinreng karah kum 1954 khan St.Anthony College atangin BA chu distinction ah a pass chhuak ve hram a, hemi t(r)um hian Guwahati University hnuaiah 8-na hial a hauh pha a ni.

CIVIL SERVICE EXAM ZINKAWNG

BA a pass veleh Civil Service exam turin a inbuatsaih nghal a, vanneihthlak takin vawikhat exam a hmachhawnna ah a tling a, merit list ah 64-na niin kum 1954 khan IAS dinhmun pêk a ni.

A posting hmasa ber chu Naga Hills ah Asst Commissioner hna niin. A hnuah Lakhimpur leh Sivasagar lamah te Asst Commissioner hna a chelh zui bakah Mizoramah ngei pawh DC in a rawn awm tawh nghe nghe a ni. Kum 32 zet a thawh chhung hian Transport Commissioner, Excise Commisioner, Joint Secretary Revenue & Forest in Assam lamah te awmin. Meghalaya M.S.E.B Chairman bakah Govt of India hnuaiah Information & Broadcasting ah Secretary hna a chelh zui a. Kum 1980-83 chhung khan Meghalaya Chief Secretary hna thawkin, hemi hnu July 1985 atanga Aug 1985 thleng kha Meghalaya Chief Secretary hna thawk turin ruat nawn leh a ni a. Tichuan a hun tawp lam February 1986 atanga November 1986 thleng khan Assam Chief Secretary hna a thawk a. Hemi kum vêk hian a hna chu a chawlhsan ta a ni.

A pension hnu pawhin hna pawimawh tak tak chelh chhunzawmin State Hills Area Planning Board Vice Chairman turin Assam sawrkar chuan a ruat a. Hetih hunlai chuan Minister of State dinhmun tlukpui a ni.



A pension atanga kum hnihna 1988 khan a chenna 'Ivory Cottage', Mankhar, Shillong ah a boral a, All Saint Church Thlanmualah an vuiliam ta a ni.

A thih hnu thleng pawhin mite thinlungah a la chamreng a. Zirna lama thangchhuah hmasa pawl a nihna chu mite ngaihsan chhan pawh a ni. Tichuan amah hriatreng nan kum 1962 kuma din Fiangpui, Assam a L.P School chu J.C Nampui Memorial L.P School tiin 1990 khan thlak a ni.

Note : Jamchonga Nampui hian 1954 khan nupui atan Minne Nampui a nei a, fapa pahnih leh fanu pathum an nei a. A fanu pakhat Merrylin Nellie Nampui phei chu IAS Officer a ni nghe nghe a.

References

* A.K. Biswas (March 2001). Case of an IAS topper.
* UPSC Pamphlet of IAS, etc. Examination [Part I] 1954-55.
* History of Services. Ministry of Home Affairs. 1957. p. 116.
* Assam Civil List. Government of Assam. 1966. pp. 28–29.
* Record Book of the Assam Secretariat's Department of Personnel(A) 1986.
* Assam Tribune. 4 November 1986.
Read more »
Tweet Share Share Share Share Share

February 06, 2020
(Asst. Professor-ah tling)
4th February 2020 (Thawhlehni)
Sihphir Vênghlun Times :

Nl. Vânlallâwmkimi, MA (Edn), M.Phil, NET/JRF d/o R. Vânlalfeli, Sihphir Vênghlun (Vênglai) chu Durtlâng-a ICFAI University, Education Department-ah Asst. Professor (Permanent)-ah a tling. 

A hmain Education Department-ah hian Visiting Faculty (Guest Lecturer)-in a thawk a ni. Tûnah hian Ph.D a bei mêk.

He ICFAI hi Private University a ni a, an headquarters hi Hyderabad a ni. A hmaa buaina neuh neuh an lo neih tawh chuan ziaawm lam a pan ve zêl a, insawhngheh lehzual an tum chho mêk a ni.

Nl. Kîmî-i hi nula fel tak a ni a, Kohhran leh khawtlânga inhmang tak a ni. Tûnah hian Sihphir Vêngthar Presbyterian Kohhran-ah Senior Department Zirtirtu leh Branch KṬP Committee niin, Sub-Committee-ah chanvo chelh a nei nual a. Sihphir Vêngthar Pastor Bial Zaipâwl Member leh Kohhran Zaipâwl Member a ni mêk bawk. Branch YMA Executive Committee niin, Sub-Committee-ah nihna a nei nual bawk a ni.

Nl. Kîmî-i kan lawmpui tak zet e. A thiamnate leh finnate Kohhran, Ram leh Khawtlâng tân lo ni se.

~ Mâwia
Read more »
Tweet Share Share Share Share Share

January 18, 2020
MIZO NULA TE AN DUAI BIKLO

MARINE BIOLOGIST TLING THAR ( 17.01.2020) 

Catherine Remsangzuali Vuangtu D/O IPS (2001-2003 batch) Lawmsangzuala Vuangtu & Lalrinmawii Renza hi Lawngtlai khua an ni a. Dehradun a khawsa mek an ni, Unau 5 niin, a pang ber dawttu ani nghe nghe.Nula simple tak ani.2019 29 December khan London khawpuia Scientists rual in elna paper tha tak tak presentation Level 3 (Scientist C) an tih mai ah top 7na a hauh pha ve hial.

Marine Biologist te hian marine organisms tuia cheng ate ber atanga alian ber thlengin an khawsak zia, an chenna,an inzawm dan te. Chemical,physical leh Oceanography ( Chip chiar taka tuipui chungchang zirna) lamah specialist an ni. Hnampui zawk emaw Mizo Nu tih atan chuan a theuneu lo hle.

Pic : Amah C. Remsangzuali
ZIRNA: UNIVERSITY OF NEW HAMPSHIRE ( Khawvel a Marine Bio zirna top 7 ani nghe nghe)
Mi Ngaihsan: Eugenie Clark

THUBELH: Lai, Paite, Mara, Thado, Lushai te hian kan in en hrang chuan he kan ZORAM ui hum tiat lekah hian atu chu nge insuihkhawm zai rel chuang ang.

Source: Barrett Rinsangpuia‎
Read more »
Tweet Share Share Share Share Share

January 16, 2020
MPSC ChairmanShri Lalramthanga Tochhawng, a 1986 batch IA&AS officer, recently retired from the post of Additional Deputy Comptroller and Auditor General was sworn in as the new Chairman, Mizoram Public Service Commission(MPSC) at the Durbar Hall, Raj Bhavan, today.

The Oath Of Office, and Oath of allegiance were administered by Governor P.S. Sreedharan Pillai with the official proceeding executed by Shri Lalnunmawia Chuaungo, Chief Secretary. Mizoram Chief Minister Zoramthanga, his cabinet colleagues, Legislators, Senior Officials and Special Invitees attended the Swearing-in Ceremony.
Read more »
Tweet Share Share Share Share Share

January 15, 2020 3
LallianzualaJanuary 11, 2020 (Missionary Day) hian BCM Zohnuai, Lunglei chuan an kohhran member Lallianzuala Chhangte hnen ațangin an Biak In sak na'n Rs.10,00,000/- (Nuai Sawm) teh meuh an dawng a, titi a luah rang hle.

Norway club Viking FK pan tur anga India media ten an tarlan kan lo rin ve ngawt avanga thu diklo kan lo thehdarh tawh avangin amah ngei ka zu zawt a, inngaitlawm takin thudik a nih thu min lo hrilh.

Kum 22 mi hian vantlang hriat atana puanzar a duh lem lova, Matthaia 6:4 a thilpek chungchanga kan Lalpa Isua Krista min zirtir angin, a kut vei lamin a tih chu a kut ding lamin a hriat ve kher țul a ti lo.



Mahse, tlang chunga khaw awm ang maiin a thil tihțhat hi a langsar a, amah ni lovin midangin an puanzar sak a, miin he thil avang hian Pathian an chawimawi a, amah an chawimawi tel lo thei lo. A phu.

LZ-a chanchin sawi chuan a inkhelh thiam thu ai mahin a taimak leh thawhrimzia hian rilru a luah lian zawk fo.

Kan player tam zawkte chawlh an neih laia an chawlh dêr țhin laiin ani hi chuan season off laiin training a bei ngawrh zual sauh va. A dam țhat loh pawha awmhmun tala che chhunzawm țhin a ni.

Zan rei lam tawhah Lunglei rawn thleng pawh nise a tuk zingah SYS Football Academy training a zawm nghal a, academy naupang kum 17 hnuai lamte ang thovin tih ngai zawng zawng a ti vek. India international ni mah se a inla 'ropui' ve ngai lo.

SYS naupangte training zawh hnuah amahin a chhunzawm a, a chang phei chuan kawng engkima a rawn ber Pu R. Lalmuankima (SYS Coach) nen a hranpa ngatin training an chhunzawm leh țhin.

'Lianzuala a chawl ve ngai lo.'

A kum dik tak hmanga academy-ah pawh inziak hi aia upa zawk leh hruaitute zah kawngah a chhuanawm hle a, hei vang hian a player puite leh football hruaitute pawhin amah an zah let.

June 8, 1997 a Pu CVL Hriatpuia leh T.Lalroliani ten an hrin khan hetiang fapa ropui hi Zofate min hrinsak ang tih an inring bik lovang. Feet 5 leh inches 5 1⁄2 leka sang, veikhawr lehnghal hi tun dinhmunah chuan Mizo zingah India ram football a palian ber a ni rih.

Lallianzuala ChhangteA thawhrimna leh a tum ruhna piahah Pathian a țihna hi a hlawhtlinna bul a ni.

Pathian a hre renga Pathian pawhin a hre reng.

Inkhelin an zin chhuak tam a, zan riaka an chhuah dawn apiangin Bible a keng tel zel a, Thufingte 3:5-6 leh Sam 37:5 chu a inngahna a ni.

Kum 2016 khan DSK Shivajians-a a training pui Jerry Mawihmingthanga (Odhisa FC) nen Liverpool First team zingah Melwood, Liverpool-ah an lo training tawh nghe nghe.

Tuna a thilpek tam tham tak hi a neih chuang liam ațanga a pek a ni lo. Nikum 2019 khan mi hlawhtlingte huanga tel thei turin Chennaiyin FC ah a lut a, a hlawh pawh a tam tham. Mizo footballer zinga hlawh tam ber dawttu niin season khata Rs.120 lakhs hlawhtu Jeje Lalpekhlua chiah a phak lo.

LZ-a Bank Account-ah hian sum tam tak a awm rih lovang! A chhan chu Chennaiyin a zawm hma khan a hlawh tam lo. Delhi Dynamos (Odhisa FC ni ta) ah khan che țha viau mahse season khatah Rs.15-18 lakhs bak a hlawh lo.

Hei vang hian a rawn ber Pu Muankima chaw ei tura a sawm ve țum pawhin Sir Muana hian, "I hlawhtlin hma chu ka rawn ei dawn lo," a ti. Tunah chuan an insawm kal tawh ngei ang.


Tun season ațangin a dinhmun a țha chho ve ta a, season khatah Rs.90 lakhs vel hlawh mekin season khat chhunga a hlawh pumpui ațanga Sawma Pakhat a pek tur aiin tuna Biak In sak na'na a thehchhuah hi ala tam zawk cheu!

Season tharah a hlawh hi Nuai 10 in a pung dawn a, chhiah chawi hmain season khatah Rs.100,00,000/- a hlawh tawh ang.

Mi țhenkhat chuan vantlang laka an hmai phih na'n te, hmingțhat leh fak hlawh duh avang tein kut tling lova an lakluh sum tam tak kohhranah an chhung lut a, hnuchham pualin thilpek an pe a, pawl hrang hrang leh țanpui ngai țanpui na'n an hlan châwk.

Tuna LZ-a thilpek erawh hi chu a thawhrim rah, thlantui leh mittui tam tak senga a beih hram hram avanga Pathian hnen ațanga malsawmna a dawn, Malsawmtu hnena ui hauh lova a pêk lêt a ni a, a hlu bik hliah hliah.

A dawngtu tan paw'n khawi ațanga a neih nge, engtianga a lakluh nge ni ang, tih ngaihtuah buai a ngai ve tawh lo. Malsawmna tam zawk vur tura Chungnungbera hnena dilsak a awl ngei ang.

Kan footballer te hi mi dangte țanpui, thilpek pek leh Pathian țih kawngah an fakawm hle. Christian Hospital Serkawn Cabin pakhat chuan East Bengal fa chuam Didika Ralte hming a chawi. Lunglei Eletric Veng pa tuaitir hian a sakna tur a thehchhuah vang a ni.

Lallianzuala ChhangteJeje-a'n Hospital Poor Fund atana a chhunluh te, khuarel chhiatna tawkte puala a neih a thehchhuah bakah vehbur a khawnsak te sawi hmaih a har.

Bengaluru FC forward Lunglei Bazarveng tlangval Edmund Lalrindika'n senior contract a ziah hnu lawka Missionary a chawmzui te hi an chhungkuain zêp sa teh mahse midangte entawn atan sawichhuah loh a har.

Kan footballer hlawhtlinna chang mekte inpekna leh an zar kan zawh mekna, mi hriata an sawi chhuah duh lohte hi riah chaw fai nena thawkchhuak meuha sawi tham a awm.

Anni hian kan aiawhin, hnam dang, sakhaw dang betute zingah Savun Hampuar hmangin Chanchin Țha an hril. Chuvangin kan țawngțainaah i hre reng țhin ang u.

Ka fapa hmingah pawh 'Lallianzuala Chhangte' tih sak mai ka nâp e.

-Lawmkima Hmar
Read more »
Tweet Share Share Share Share Share

December 10, 2019
2019 MCS TOPPER LALDINSANGI A BANG - ASSTT. PROFESSOR HNA A ZAWM

Kum 2019 MCS Topper Laldinsangi chuan Mizoram Civil Service hna a zawm zet hnuah Assistant Professor hna a zawm thar.

MCS 2019 topper Laldinsangi hi thiamna lamah Doctorate degree (Ph.D) nei a ni a. A thesis tihna hi Animal Biology lam a ni. Hun rei tak atanga subject hrang hrang atana  MZU leh PUC a thawk tur Assistant Professor leh Associate Professor interview result chu MZU Executive Council chuan ni 30, October 2019 khan pawmin interview-a tlingte chu Offer of Appointment a pe a. Laldinsangi hian Department of Life Science, Pachhunga University College atan Ni 29 November, 2019 khan joining report a pe ta a ni. 



Mi nawlpuiin kan hriatthiam dan tur chuan College leh University-a zirtirtu hna, a ngheta thawk tura an thawh țanna Assistant Professor hi sawrkar lamah chuan Deputy Director level vel a ni a. An kaisanna Associate Professor leh Joint Secretary a intluk vel a ni. 

Hetiang taka mi thiam Mizo nula Laldinsangi kan nei hi kan chhuang hle a ni.

Pu C. Laldina, IPS, Aizawl Mission Vengthlang a cheng hian fa 4 neiin a fate 4 zinga 3 hian Mizoram Civil Services ah an inziak tling tawh a, tun kum 2019 ah hian an Upa ber Dr. Laldinsangi chu topper ni leh in, a nau te pahnih hi 2015 MPSC exam khan an tling rual bawk. Dr. Laldinsangi nau chiah C. Lalmalsawma MPS hi Kolasib SDPO a ni mek a. Chu mi nau leh Laldinfeli MCS hi Champhai SDC ani mek bawk.
Laldinsangi



MCS 2019 Topper Laldinsangi INTERVIEW Questions


Zirna, Khawtlang leh Kohhran hi?
- Hei hi chu a mihring a zir ka ti lo thei lo. Inhmang tak chunga tha taka zir thei an awm laiin chutiang a inhmang pah
thiam lo chi te pawh awm theih a ni a. Mahni inhriatchian a chumi atanga in siamrem thiam a tulin ka hria.

Kohhran, Khawtlang leh nangmah?
- Hmun dangah lehkha zira ka awmbo rei avangin inhmang tho mahila, nasa taka inhman hi ka la nei mumal lo. Tin,
ka exam dawn kha chuan hun a tam lo a, thil ti kawp thiam chi ka nih loh bawk avangin inkhawm pangngai tih loh ah
chuan ka inkhung chawt.



Social media leh nangmah?
- Social media hi chu a hman loh tak tak theih loh a, tin, hman thiam chuan thil tangkai tak a ni a. A tangkai leh a
hlawk zawnga hman hi ka la inzir nasa khawp mai.

Mizo hnam ṭhanmawh bawk nia i hriat?
- Tam tak sawi tur a awma, mahse a langsar ni a ka hriat pakhat chu mahni hna theuh a tih tak tak na leh
rinawmna hi mi tam takin kan tlachham in ka hria.

Read More on Explore Mizoram


Read more »
Tweet Share Share Share Share Share

November 19, 2019
Marcus Lalhriatpuia Kum 13 s/o Dr H Lalnghakliana(Manghaka) Ramhlun Venglai chu Rashtriya Indian Military College(RIMC) Dehradun a luttur zawnna All India Entrance Exam(Written + Interview) Merit list Top ten ah langin Pariatna(8) ani. North East aṭang phei chuan ati ṭha ber ani hial.

RIMC hi Ministry of Defence, Govt. Of India hnuaia zirna ṭha bera ngaih ani meka, Class 8 aṭang chauh admission hi lakṭhin ani. 

India ram State hrang hrang aṭang Naupang tamtak Kum 11-13 inkar te chu luh tumin kumtin entrance anpe ṭhin a, Exam ah hian Seat 25 chauh awmin Competition asân em avangin Jr IAS Academy ti hialin ansawi ṭhin bawk.

RIMC atang hian 80% chu NDA ah an lut thin (lut lo 20% hi chu UPSC Civil service lama kal emaw, Medically unfit an ni thin).

Ahmabak tamtak hi kan ram kan hnam kan sakhua timawi tu atana tluang taka ahlenchhuah ngei theihnan duhsakna kan hlan nghal e.

@Lawrence Sailo
Read more »
Tweet Share Share Share Share Share

November 19, 2019
Zofate zinga pafa All India/Central Service-a lutte :-

1. S.R. Vala, IAS (1962 OR)
Pu Lalduhthlana Ralte, IFS (1983)

2. Rokunga Chawngthu, IPS (1962)
Pu Robert L. Chawngthu, IAS (1997-Bihar)

3. Vanhela Pachuau IAS (1976)
Grace Lalrindiki Pachuau IAS (2012)

4. Thangkhuma Tochhawng, IPS(Postal) -1962
Lalnuntluangi Tochhawng ICAS, (1984)

5. Lalhmingliana Saiawi, IAS(1964-Maharashtra)
Lalmuanpuii Saiawi, IFS (2005)

6. F. Pahnuna, IAS(1965- AGMUT)
Lalrinliana Fanai, IAS (1997- UK)

7. Lalfakzuala, IAS(1965)
Baby Zoremsangi (L) IIS (1997)

8. Lalthanzama IFS (1959)
Lalramthanga Tochhawng IA&AS (1986)


9. C. Lalengliana, IIS
David Lalrinsanga, IPS(1995-AGMUT)
Joseph Rinsailova IPS (Postal) 1999

10. R. Rozika, IA&AS (1968)
R. Lalremruata, ICAS (1986)

11. C. Dothanga, IPS(1975 - AP)
David Zothanpuia Chawngthu, IRS(1994), Christina Zothanpari Chawngthu, IAS(2001-AP)

(An luh Kum leh Cadre hi hriatloh ka nei nual a, tin, ka ziah lan zinga hriatsual palh a awm chuan ngaihdam ka dil e. Ziah hmaih palh pawh ka nei mai thei. Heng bakah hian unau a AIS/Central Service te pawh sawi tur an awm nual a. Chawimawi an phu in an ngaihsanawm ka ti em a, hriatzau kan post a ni e. - Fela Sapkúng)
Read more »
Tweet Share Share Share Share Share

September 21, 2019 2
Mizo pa-in Ph.D (Dental Science) Zir Chhuak

Rev. Lal Lian Vula leh Pi F. Lal Ro Siami te fa lai, an fapa mal Dr. Hosea Lal Rin Muana chuan Sept. 19, 2019 khan Tokyo Medical and Dental University-ah dissertation te tha taka defend a neih zawh hnuin Doctor of Philosophy in Dental Science chu a zo ta a ni.

Hosea Lal Rin Muana hi Feb. 13, 1987 khan Mission Veng, Tahan-ah piang a. A pa rawngbawlna avangin kum 1991 March thla khan Yangon-ah an insawn a. No.2 Middle School, Insein-Yangon-ah Kg - 6 thleng a zir a. A pa rawngbawlna avang bawkin 1999 khan Tahanah an insawn leh a. Pawl 7,8 chu No. 6 Affiliated Miidle School (tuna No. 5 High School ni ta), Tahan-ah a zir zo va. An unau a an thiam theih em avangin Gallile Boarding School-ah pawl 9-10 hi an unau chuan bording neituin tuition fee free-in a kaitir a.

Matric chu Distinction pahnih (Maths & Chemistry-ah) hmuin tha takin a pass a, Dental College hi a lut thei ta a ni. Chuti chuan Hosea hian kum 2009-ah Mandalay Dental College atangin Bachelor of Dental Surgery (BDS) chu tha takin a zir zo va. A nu leh pa te nen an chhungkaw khawsakna Yangon-ah (2003-ah Rawngbawlna vang thoin Yangon-ah an insawn leh a) 2010 atangin private clinic te hawng a, a pa rawngbawlna (Kawl zinga Chanchin Tha hril) te pawh a pui bawk a ni.

Hetiang chung hian Master training pawh a chhunzawm reng a. 2014-ah Master training pawh chu tha takin a zo va. Training pe-tu Janpan Professor hnen atang chuan Japan ram,TMDU-a Ph D zir theihna application chu a fill-up ve a, Pathian zarah a in ziak tling ta! Zirna senso hi a hautak em avangin mahnia tlin chi a ni lo tih chu Dr. Hosea leh a nu leh pa ten an hre reng a ni. An tawngtaina chhanin a awm a, TMDU chuan Japan sawrkar hnenah senso zawng zawng tumsak tura Dr. Hosea tana an dilsakna chu an hlawhtling a. Chuti chuan 2015 atangin TMDU-ah Ph.D chu a zir tan ta a. Harsatna chi hrang hrangte a pal tlang hnuin Spetember 19, 2019 khan Ph.D (Doctor of Philosophy in Dental Science) chu tha takin a zo thei ta a ni.

Zoram khawvel huap pawh hian Ph. D (Dentis) kher hi ka hriat sual loh chuan kan la nei lo va, Dr. Hosea tling thar kan nei hi a chhunawm hle a ni.

(A Pi leh Pute atanga Pathian tih mi, a nu leh paten Chanchin Tha avanga hmusit leh endawng an lo tawrhna, mittui leh chawngheia Lalpa ram zauhna atana asur asa hnuaia an thawhrimna rah chu an tu/fapa Dr. Hosea chungah pawh a lo lang, niin a pa chuan hnuk ulh theuhin a sawi a ni. Tunah hian Dr. Hosea pa ministry pawh hlawhtling takin Lalpan a kaihruai zel a, Yangon-ah Kawl ring thar leh ring lo mite hnenah rawngbawlin an khawsa a ni. 
~By James Fanai)
Read more »
Subscribe to: Posts (Atom)

Contact Form

Name

Email *

Message *

TOM © 2025. All Rights Reserved.
Published by Songate G

Ads Section

Powered by Blogger.